¹ Noho izay aoky ba ho pangalatahaky an'Agnahary, manahaky gny zanaky malala. ² Dra mandehana amigny fitiava, araky gny nitiavan'i Kristy asika avo koa vo nagnomeza gny vatany ho asika, fagnatisy mani-pofo vo soro ho an'Agnahary. ³ Fa sy tokony hisy na dre zaka fizangazanga na kara fahalotoa na sy fahonogna-tegna aza eo amindrareo, fa sy mendriky gny olo-masin'Agnahary reo. ⁴ Aoky sy hisy mamoafaly, resaky adaladala, vo hanihany tafahoasy_fa sy mendriky gny amireo aby. Fa tokony hisy fakasitraha. ⁵ Fa afaky mahazo atoky gny amizao handrareo, fa sy hisy pizangazanga, maloto, na gny piery, zany hoe, panopo sapy_mana lova ao amigny fazakan'i Kristy vo Zagnahary. ⁶ Aoky sy hisy hamitaky andrareo amigny zaka tena foa, akory noho reo raha reo dra avy amigny zanaky gny sy fakatoava gny hasiahan'Agnahary amin'ereo. ⁸ Fa mezy handrareo faela, fa izao handrareo dra fahazava ao amigny Topo. Mandehana manahaky gny zanaky gny mazava, ⁹ (fa gny vokasy gny fahazava dra ao amigny fahasoavan'aby, fahisia, vo fahamarigna). ¹⁰ Dra taliavo ze mahasoa gny Topo. ¹¹ Ka mikamba amireo asa sy mamokasy gny mezy, fa apiharihario koa reo. ¹² Fa mahamegnasy na dre gny manognonogno reo raha ataon'ereo agny amigny mivony aza. ¹³ Fa gny fa hazavanigny fahazava gny raha raiky, dra lasa miharihary. ¹⁴ Fa gny raha aby ze miharihary dra fahazava. Noho izay dra voalaza ho: "Mifohaza, hanao mandry, dra misangana amigny toeranigny maty, dra hamirasy aminao Kristy." ¹⁵ Mitandrema amigny fomba fiegnanao _sy manahaky gny sy hendry fa manahaky gny hendry. ¹⁶ Araroty gny fotoa akory izao andro izao dra rasy. ¹⁷ Noho izay, ka medaladala, fa takaro ho ino gny sitraponigny Topo. ¹⁸ Dra ka manao mamonigny divay, fa mindesa agny amigny fahasola-totra anizay. Fa aoky ho fenonigny Fagnahy Masy, ¹⁹ mifapizaka amindrareo dra hira-pagnahy, mihira dra mikaloa amigny Topo amigny fondrareo aby. ²⁰ Misora mandrakariva amigny raha aby, amigny agnaran'i Jesosy Kristy Toposika ho an'Agnahary gny Ray, ²¹ mifanolora tegna ami-pagnaza ho an'i Kristy. ²² Ry apela, magneke gny valindrareo, manahaky gny amigny Topo. ²³ Fa gny lelahy gny lohanigny vavy manahaky an'i Kristy koa lohanigny fengona, dra Kristy vatany gny pamozy. ²⁴ Fa manahaky gny hagnekenigny fengona an'i Kristy, dra manahaky anizay koa gny tokony hagnekenigny apela gny valiny amigny raha aby. ²⁵ Ry telahy, tiavo gny valindrareo, manahaky gny nitiavan'i Kristy gny fengona vo nagnomezany anazy gny ainy. ²⁶ Nanolosy gny vatany ho anigny fengona Kristy ba afahany magnamasy anazy, tamigny fagnadiova anazy tamigny rano fanasa amigny zaka, ²⁷ ba afahany maneho anazy ho be voninahisy eo aminazy, sy misy pety na ketro na raha manahaky anizay, fa masy sady sy misy diso. ²⁸ Manahaky anizay avo koa gny lelahy dra tokony ho tia gny valin'ereo manahaky gny vatan'ereo. Ze tia gny valiny dra tia gny vatany avokoa. ²⁹ Sy bo nisy mikarakara gny vatany, fa mamaha vo mikarakara anizay soa, manahaky an'i Kristy mamaha gny fengona vo mikarakara anazy avo koa, ³⁰ akory isika dra rasam-batany. ³¹ Noho izay atony zay gny lelahy dra handoa gny ray vo gny reniny dra hikamba amigny valiny, dra izy ro dra ho lasa nofo raiky avo." ³² Lahibe zay fahamarigna sihita zay_ fa izaho dra mizaka momban'i Kristy vo gny fengona. ³³ Kanefa, gny sirairay amindrareo avo koa dra tokony ho tia gny valiny manahaky gny vatany, dra gny apela tokony hagnaza gny valiny koa.