¹ Zao ro talily ty safa Yaveh mikasikike ty tane Hadraka vaho Damaskosy. Fa ty maso Yaveh le amity ndaty iaby, naho kea amity foko Israely iaby. ² Ty talily toy avao kea le mikasike i Hamata, ty mifanolotre amy Damaskosy, naho mikasike i Tyro vaho Sidona zay, na le tena mare aza iereo. ³ Le fa nagnore fiaro mafe ho ahy ty vatane ty Tyro vaho namory volafoty manahake ty fotake egne andala. ⁴ Ingo! handrava aze ty Zagnahare naho hanimba ty ozane an-driake, mba ho rava ty afo re. ⁵ Hahisake i Askelona ka hatahotre! Hihovitre mafe avao kea ty Gaza! Ekrona, ho rava ty fagnantegnane! Ho mate agne Gaza ty mpanjaka, naho Askelona le tsy hisy ndaty sase! ⁶ Hanao ty tragnone ao Asdoda reo vahiny, naho handrava ty rehareha reo Filistina Raho. ⁷ Fa hagnafake ty lio iereo bakeo amity vavane Raho naho ty haratia iereo eo agnivo ty nifene. Vaho le ho lasa sisa ho ahy ty Zagnahare manahake ty foko agne Joda iereo, naho Ekrona le ho lasa manahake reo Jebosita. ⁸ Hitobe magnodidy ty taneko raho mba handietre reo miaramila ty fahavalo ka tsy hisy raike aza afake mindeha na mihemotre, fa tsy hisy mpampijale handrio eo amizay sase. Fa amizao le hiambe ty taneko amity masoko Raho! ⁹ Mifalea amity hafaleam-bey, ry anakampela Ziona! Mifalea an-kafalea, ry anakampela Jerosalema! Ingo! Avy amim-pahamarea aminao ty mpanjaka naho magnavotre anao. Magnetre-bata re ka mitikitre eo amity borike, eo ambone anam-borike. ¹⁰ Naho ho ravaeko ty kalese bakagne Efraima vaho ty soavale bakagne Jerosalema, naho ty folese le ho rava amity aly; fa hirehake filamina amireo firene re, naho ty fandiliane le ho avy amity riake ka zisikamity riake, naho zisikamity Renerano ka hatramity faram-bazan-tane! ¹¹ Laha ty aminareo, noho ty lio ty fagnenkeako ao aminareo, le hafahako bakao andavake ze tsy misy rano reo gadranareo. ¹² Mimpolia agne amity fiaro mafe, ry gadra ty fagnantegna! Eka na le amizao aza le mitalily raho fa handietre agnabo roe ambone aminareo, ¹³ fa le nagnenja Joda Ho foleseko raho. Le fa namaha ty anam-poleseko tamity Efraima raho. Le fa nanaitre reo anagnareo lahy raho, ry Ziona, handietre reo anagnareo lahy, ry Grisia, naho le fa nanao anareo manahake ty meso ty mpialy Raho, ry Ziona! ¹⁴ Hiseho amiereo Yaveh, vaho hitifitse manahake ty helatre ty folesene! Fa Yaveh Tompoko hitioke trompetra naho hindeha bakamity tafion-tioke bakagne Temana. ¹⁵ Yaveh tompo ty maro ro hiaro iereo, vaho handrava iereo vaho haharese ty vatom-pilatsene reo. Vaho le hino iereo vaho hibabababa manahake ty ndaty mamon-divay, vaho ho feno divay manahake reo finga iereo, manahake reo zoro ty alitara. ¹⁶ Ka amize andro zay le hamonje iereo Yaveh Zagnaharene; le hanahake ty angondry ty vahoakene iereo, fa iereo ro ho hengo ty satron-kasy, hiakatre eo amity tanene. ¹⁷ Fa akore ty hasoane vaho hasoan-tarehe iereo! Hagniry eo amity vare ty ajalahy naho ty verijine eo amity voaloboke mamy!