¹ Niavy tamiko ty safa Yaveh tompo ty maro, nanao hoe: ² "Zao ro safa Yaveh tompo ty maro: Te vatane i Ziona amity zotom-po foloay Raho naho sarotene noho ty amine amity heloke foloay Raho! ³ Zao ro safa Yaveh tompo ty maro: hihere agne Ziona raho naho hitoboke ao agnivo Jerosalema, fa le kinaike hoe ty Tana ty Hamarea Jerosalema naho ty vohy Yaveh tompo ty maro le hatao ty hoe Ty Vohitse Masy! ⁴ Zao ro safa Yaveh tompo ty maro: Lahy antetre vaho vave antetre ndaike ro ho egne andalambey Jerosalema, naho ty ndaty kirai-kiraike hipay tehe ho egne antagnane satria le fa niha-antetre re. ⁵ Ho feno ajalahy vaho ajampela mihisa egne amireo lalam-bey ty tane. ⁶ Zao ro safa Yaveh tompo ty maro: Amize andro zay laha misy zaka tsy hay atao eo amaso reo vahoake sisa tavela, le tokone tsy ho hay atao eo amasoko kea vao zay?__zay ro talily Yaveh. ⁷ Zao ro safa Yaveh tompo ty maro: Ingo, eo andalam-pagnavota ty ndatiko amity tane fivakia ty andro Raho naho eo amity tane fitsofora ty andro! ⁸ Fa hinday iereo hihere Raho, naho hitoboke ao agnivo Jerosalema iereo, mba ho vahoakeko ndraike iereo, naho ho Zagnahare iereo amity mare vaho amity fahitia Raho! ⁹ Zao ro safa Yaveh tompo ty maro: Riha ze manohy midranjy reo rehake mitovy ze niakatre bakamity vava ty mpaminane laha fa natoboke ty fotora ty tragnoko__ty tragnoko toy, Yaveh tompo ty maro: Hamafeo reo tagnanao mba ho voatsanga ty tempoly. ¹⁰ Fa taloha ze andro zay le tsy nisy vokatre voavory ty ndaty, tsy nisy tambone na ho ahy ty ndaty na ho ahy ty biby, naho tsy nisy filamina ho ahy ty ndaty miakatre na militre bakamireo fahavalo. Le fa nametrake ty ndaty kirai-kiraike handietre ty namane Raho. ¹¹ Fa amizao zay le tsy ho hoe ty tamity andro taloha, hiomba ty sisa ty vahoake toy Raho__zay ro talily Yaveh tompo ty maro. ¹² Fa hafitse ty voa ty filamina; le hagnomea ty voa ty hetae voaloboke naho ty tane hagnomea ty vokam-pamboleane; hagnomea ty mika ty lagnitse, fa hampandovaeko ze zaka zay ty sisa amity vahoake toy. ¹³ Ohatre ho ahy reo firene ty ozo hafa nareo, ry foko Joda vaho foko Israely. Ka le hamonje anareo Raho naho ho fitahia anareo. Ko matahotre; ao homafe ty tagnanareo! ¹⁴ Fa zao ro safa Yaveh tompo ty maro: manahake ty nagnomanako hanao raty aminareo laha fa nahameloke Ahy reo razambeinareo__hoe Yaveh tompo ty maro__naho tsy nandefetre Raho, ¹⁵ ro hagnomanako hanao zaka soa ndraike ho ahy Jerosalema vaho ty foko Joda avao kea amize andro zay! Ko matahotre! ¹⁶ Toa ro zaka ze tsy maintsy hataonareo: Mirehafa ty mare, ty ndaty kirai-kiraike amity namane. Mitsara amity mare, rarene, naho filamina eo amity vavahadinareo. ¹⁷ Ko manao fikasan-draty ao amponareo amity hafa, naho ko tea fiaignan-diso__satria malay reo zaka reo Raho!__zay ro talily Yaveh." ¹⁸ Le niavy tamiko ty safa Yaveh tompo ty maro, manao hoe: ¹⁹ "Zao ro safa Yaveh tompo ty maro: Ty fifalian-kane amity vola fahefatre, vola fahadime, vola fahafito, naho ty vola fahafolo le ho lasa andro ty hafalea, fifalefalea, naho andro soa ho ahy ty foko i Joda! Laha zao teavo ty mare vaho ty filamina! ²⁰ Zao ro safa Yaveh tompo ty maro: Hoavy ndraike ty vahoake, na le reo ze mitoboke amireo tana maro sambehafa aza. ²¹ Hindeha ho agne amity tana hafa ty vahoake ty tana raike ka hanao ty hoe:" Ao hindeha malaky eo agnoloa Yaveh tika ka hipay Yaveh tompo ty maro! Hindeha avao kea tika. ²² Vahoake maro vaho firene mahere maro ro ho avy hipay Yaveh tompo ty maro agne Jerosalema naho hangatake ty fitea Yaveh! ²³ Zao ro safa Yaveh tompo ty maro: Amize andro zay le lahilahy folo bakamity firehake vaho firene iaby ro hita ty moro ty akanjonao naho hanao ty hoe:' Ao hiarake aminao zahay, fa le reinay fa miomba anao ty Zagnahare!"'