¹ Tamy Dariosa mpanjaka ro mpandily zisike ty efa-tao, tamity andro fahaefatre nanjaka Kisleva(ty vola fahasive), le niavy tamy Zakaria ty safa Yaveh. ² Nandefa i Serezera vaho Regema-meleka naho reo ndatine ty vahoake Betela mba hangatake agnoloa ty tarehe Yaveh. ³ Nirehake tamireo mpisoro ze tao antragno Yaveh tompo ty maro vaho tamireo mpaminane iereo; hoe iereo ty hoe:" Tokone handala amity alala ty fifalian-kane vao raho amity vola fahadime, manahake ze le fa nataoko tao maro reigne?" ⁴ Le niavy tamiko ty safa Yaveh tompo ty maro, nanao hoe: ⁵ "Mirehafa amity vahoake ty tane iaby vaho amireo mpisoro ka anovo hoe:' Laha nifaly hane vaho nandala tamity vola fahadime vaho fahafito nareo zisike ze fito tao zay, feie vao nifaly hane ho Ahy mare nareo? ⁶ Laha nihina vaho nino nareo, feie vao tsy nino vaho nihina ho ahy ty vatanareo avao ro nambara Yaveh tamity vava reo mpaminane taloha, laha mboe nitoboke tao Jerosalema vaho reo tana magnodidy tamity fagnambina naho nitoboke tao Negeva, vaho reo gebo amoron-tsirake agne ahandrefa nareo?"' ⁸ Niavy tamy Zakaria ty safa Yaveh, nanao hoe: ⁹ "Zao ro safa Yaveh tompo ty maro:' Mitsara amity fitsara mare, fagnenkea matoky, naho fandefera. Ao ty ndaty kirai-kiraike hanao zay amity rahalahine. ¹⁰ Ty amity mpivem-bata vaho bode, ty vahiny, naho ty ndaty mahantra__ko mampijale iereo, naho ao tsy hisy aminareo hihevetre raty ty hafa ao agnarofonareo.' ¹¹ Nefa nilietre ty hidranjy iereo naho nagnamafe ty soro iereo. Nagnily ty sofy iereo mba tsy haharey. ¹² Nagnamafe ty arofone manahake ty vato iereo mba tsy haharey ty lala na reo safa Yaveh tompo ty maro. Nandefa reo talily reo ho ahy ty vahoake tamity alala ty fagnahy tamity andro taloha, tamity alala ty vava reo mpaminane Re. Nefa nilietre ty hidranjy ty vahoake, ka meloke mafe tamiereo Yaveh tompo ty maro. ¹³ Naho laha fa nikaike Re, le tsy nidranjy iereo. Manahake zay avao," hoe Yaveh taompo ty maro," ro hikaiha iereo mafe ahy, fa tsy hidranjy Raho. ¹⁴ Fa haeleko amity talio agne amireo firene iaby ze tsy mboe hisane iereo, naho ho lao magnorike iereo ty tane. Fa tsy misy ndaty handrio amity tane na hihere ao amizay satria le fa namadike ty tane iereo soasoa ho tane maike ty vahoake."