¹ Le nitolike raho naho nagnandrandra ty masoko ka nahisake kalese efatre niakatre bakeo agnivo ty vohitse roe; naho reo vohitse roe reo le vita bakamity varahy. ² Ty kalese voalohane le nana soavale mena, ty kalese faharoe nana soavale mainte, ³ ty kalese fahatelo nana sovale foty naho ty kalese fahaefatre le nana soavale sada foty. ⁴ Le namale raho ka nirehake tamity anjele nirehake tamiko hoe:" Ino reo, ry tompoko?" ⁵ Namale ty anjele ka nirehake tamiko hoe:" Reo ro riatre efatre ty lagnitre ze niakatre teo amity toera ze nitsangana iereo teo agnoloa ty Tompo tane iaby. ⁶ Ty raike ze miarake amity soavale mainte le miakatre mbaeo amity firene avaratre; reo soavale foty le miakatre mbaeo amity firene ahandrefa; naho reo soavale sada foty le miakatre mbaeo amity firene antimo." ⁷ Reo soavale mafe reo le niakatre naho nipay hindeha vaho hirererere egne amity tane, ka hoe ty anjele hoe:" Mindehana mirererere egne amity tane!" naho nindeha nirererere era ty tane iaby iereo. ⁸ Le nitaray tamiko re ka nirehake tamiko naho nanao hoe:" Henteo reo ze miakatre ho agne amity firene avaratre; hampijano ty fagnahiko mikasike ty firene avaratre iereo." ⁹ Naho niavy tamiko ty safa Yaveh, manao hoe: ¹⁰ "Mangala fagnatetre amireo tane an-tsesetane_bakagne Helday, Tobia, naho Jedaia_naho mindehana amize andro zay avao naho alao ao antragno Josia ana i Zefania, ty bakagne Babylona zay. ¹¹ Le alao ty volafoty vaho volamena, manova satron-kasy naho atoboho eo amity loha Josoa anadahy Jozadaka, ty mpisorom-bey zay. ¹² Mirehafa amine naho ambarao ty hoe:' Zao ro safa Yaveh tompo ty maro: Toy lahilahy toy, ty agnarane le Rantsana! Hitombo eo amity misy aze re vaho hagnore ty tempoly Yaveh! ¹³ Re ro hagnore ty tempoly Yaveh naho hananga agnabo ty famirapirane zay; le hitoboke vaho handily eo amity sezan-droandriane re. Ho mpisoro eo amity sezan-droandriane re naho hisy ty fazavan-tsay ty fiadagna eo amie roe. ¹⁴ Hatoboke eo amity tempoly Yaveh ty satron-kasy hagnomean-kasy i Helema, Tobia, vaho Jedaia naho ho fahatiarova ty hasoam-pagnahy ty anadahy Zefania. ¹⁵ Naho reo ze lavitre le hoavy vaho hagnore ty tempoly Yaveh, ka ho hainao fa Yaveh tompo ty maro ro nagnirake ahy ho aminareo; fa hiseho zay laha vatane midranjy ty feo Yaveh Zagnaharenareo nareo!"'