¹ Le nitolike raho ka niandrandra ty masoko, ka nahisake, ingo, sare-sare mizotro! ² Hoe ty anjele tamiko hoe:" Ino ro hisanao?" Le namale raho hoe:" Sare-sare taratasy mizotro ro hisako, roapolo metatre ty halavane naho folo metatre ty borine." ³ Le hoe re tamiko hoe:" Toy ro ozo ty miakatre mgnera zao tontolo zao, fa ty mpangalatre iaby le ho ravae manomboke zao ze miore amize rehafene amity andanene, naho iaby ze mirehake fifanta diso le ho ravae ze miore amize rehafene amity agnilane, arake ty reha iereo. ⁴ "Ho akareko zay__zay ro talily Yaveh tompo ty maro__ka hilitre ao antragno ty mpangalatre vaho eo amity tragno ze mifanta diso amity agnarako zay. Hitoboke ao antragnone zay naho hanimba ty hetaene vaho reo vatone." ⁵ Le niakatre ty anjele ze nirehake tamiko naho nirehake tamiko hoe:" Akaro ty masonao ka henteo ze avy eo" ⁶ Le hoe raho ty hoe:" Ino igne?" Le hoe re ty hoe:" Haro misy efaha igne avy igne. Toy ro helo iereo amity tane iaby." ⁷ Le nalae tamity haro ty firake fanakofa naho nisy ampela tao ambane zay nitoboke tao! ⁸ Le nirehake ty anjele hoe:" Haratia toy!" Natorane tao agnate haro ndraike re, naho natorane teo amity fisokafane ty firake fanakofa. ⁹ Nagnandrandra ty masoko raho naho nahisake ampela roe mamonje ahy, naho ty tioke le tegne amity ela iereo__fa nana elatre manahake ty ela ty vano iereo. Nagnakatre ty haro teo agnivo ty tane vaho ty lagnitre iereo. ¹⁰ Ka nirehake tamity anjele ze nirehake tamiko raho hoe:" Ho ente iereo mbaia ty haro?" ¹¹ Le hoe re tamiko hoe:" Hagnamboara tempoly agne amity tane Sinara ho ahy zay, ka laha fa vogno ty tempoly, le hatoetre agne eo amity fotora voaoma ho aze ty haro."