¹ Bakeo nitolike naho nanaitre ahy hoe ty ndaty taire amity rorone ty anjele ze nirehake tamiko. ² Hoe re tamiko hoe:" Ino ro hisanao?" Le hoe raho hoe:" Mahisake fanoan-jiro vita amity volamena vatane raho, miarake amity fisi-diloilo eo antampone. Misy lela fanovan-jiro fito eo amizay naho misy fantso fito eo antampo ty lahin-jiro kirai-kiraike. ³ Misy hetaen'oliva roe eo agnila zay, raike reo amity ilane amity tagnan-kavana ty fisi-diloilo naho ty hafa eo amity ilane ankavia." ⁴ Laha zao le nirehake tamity anjele ze nirehake tamiko ndraike raho. Hoe raho hoe:" Ino ro dika reo zaka reo, ry tompoko?" ⁵ Namale ahy ty anjele ze nirehake tamiko naho nanao tamiko hoe:" Tsy hainao vao ty dika reo zaka reo?" Le hoe raho hoe:" Aha, ry tompoko." ⁶ Laha zao le hoe re tamiko hoe:" Zao ro safa Yaveh tamy Zerobabela: Tsy amin-kere na amity ozatre, fa amity Fagnahiko, hoe Yaveh tompo ty maro. ⁷ Ino vao riha, ry vohitse bey? Ho lasa tane gebo eo agnoloa Zerobabela riha, naho hinday ty vato atao lohane re mba hikorake hoe:" Hasoava! Hasoava ho amizay!'" ⁸ Avy tamiko ty safa Yaveh, nanao hoe: ⁹ "Nanao ty foto ty tragno toy ty tana Zerobabela naho hamita zay ty tagnane. Le ho hainao fa Yaveh tompo ty maro ro nagnirake ahy ho aminao. ¹⁰ Ia ro nanao tsinontsino ty andro reo zaka malineke? Hifale reo ndaty reo naho hahisake ty vato pilao egne antagna Zerobabela. (Reo lahin-jiro fito reo ro maso Yaveh te magnente zao iaby zao.)" ¹¹ Bakeo le nagnontane ty anjele raho hoe:" Ino reo hetaen'oliva roe zay mitsanga eo ankavia vaho ankavana ty fanovan-jiro reo?" ¹² nagnontane aze ndraike raho hoe:"Ino reo tehon-ketaemoliva roe agnila reo fantso volamena roe ty misy diloilo volamena mily bakeo amine reo?" ¹³ Bakeo le hoe re tamiko hoe:" Tsy hainao vao hoe ino reo?" Hoe raho hoe:" Aha, ry tompoko." ¹⁴ Laha zao le hoe re hoe:" Reo ro anan-diloilo vaovao te mitsanga magnoloa ty tompo zao tontolo iaby zao."