¹ Magnarake zay le nagnakatre ty masoko raho naho nahisake lahilahy niarake tamity taly fimetara tegne antagnane. ² Hoe raho ty hoe:" Hindeha ho aia riha?" Le hoe re tamiko hoe:" Hagnametatre Jerosalema, hagnente ty borine vaho ty halavane." ³ Le lasa ty anjele ze nirehake tamiko naho nisy anjele raike hafa niakatre mba hanalaka aze. ⁴ Hoe ty anjele faharoe tamine hoe:" Milaisa naho mirehafa amity ajalahy igne; atalilio hoe:' Hitobke eo amity tana mivoha Jerosalema noho ty hamaroa ty ndaty vaho reo biby ao amine. ⁵ Fa zaho__zay ro talily Yaveh__le ho lasa manda afo magnodidy aze, naho ho hasy eo agnivone raho. ⁶ Malakia! Malakia! Milaisa bakagne amity tane avaratre__zay ro talily Yaveh__fa zaho le fa nizara anareo hoe ty tioke efatre ty lagnitre!__Zay ro talily Yaveh. ⁷ Eh! Milaisa mbaeo Ziona, nareo ze mitoboke miarake amity anakampela Babylona!"' ⁸ Fa tafara ty nagnomea Yaveh tompo ty maro hasy ahy vaho nandefasane ahy handietre reo firene ze nanimba anareo__fa na ia ia mikasike anareo, le mikasike ty anakandria-mason'Agnahare!__laha fa baka nanao zay Yaveh, le hoe re ty hoe: ⁹ "Zaho vatane ro hamototre ty tagnako amiereo, naho le ho babo ho ahy reo ndevo iereo." Le ho hainareo fa Yaveh tompo ty maro ro nagnirake ahy. ¹⁰ "Miantsa ho amity hafalea, ry anakamplea Ziona, fa zaho vatane ro ho avy vaho hitobe eo aminareo!__zay ro talily Yaveh." ¹¹ Bakeo reo firenem-bey hiarake amy Yaveh amize andro zay. Hoe re ty hoe:" Naho le ho lasa vahoakeko nareo; fa hitobe eo agnivonareo Raho," naho ho hainareo fa Yaveh tompo ty maro ro nagnirake ahy ho eo aminareo. ¹² Fa Yaveh hampandova i Joda hoe ty fanagnane ara-drarene agne amity tane masy naho hifily ndraike i Jerosalema ho aze. ¹³ Ko mirehake, eo agnoloa Yaveh, ry nofo iaby, fa nitsanga bakao amity toerane masy Re!