¹ "Amize andro zay le hisy loharano hivoha ho ahy ty foko Davida vaho reo vahoake Jerosalema, noho ty hadisoa iereo vaho ty tsy falio iereo. ² Amize andro zay__zay ro talily Yaveh tompo ty maro__ro hamoagnako ty agnara reo sampe amity tane mba tsy ho tiarove sase iereo. Hampiakatre reo mpaminane tsy mare vaho ty fagnahy maloto iereo amity tane avao kea Raho. ³ Laha misy ndaty manohy maminane, le hirehake amine ty raene vaho ty renene ze niterake aze hoe:' Tsy ho velo riha, satria mirehake vande amity agnara Yaveh!' Bakeo ty rae vaho rene ze niterake aze hitomboke aze lefo laha fa maminane zay. ⁴ Amize andro zay ty mpaminane kirai-kiraike le ho megnatre amity fahisahane laha fa eo ampamisavisa re. Reo mpaminane reo le tsy hanao lamba voloe, mba hamitaha ty ndaty sase. ⁵ Fa ty kirai-kiraike hirehake ty hoe:' Tsy mpaminane raho! Lahilahy miasa tane raho, satria ty tane ro lasa asako laha mboeny ajalahy raho!' ⁶ Fa hisy ndaty raike hirehake amine hoe:' Ino reo fere eo agnivo reo sandrinao reo?' naho hamale re ty hoe:' Nifere niarake tamireo ze tao amity tragno reo namako raho."' ⁷ "Ry meso! Akaro amity mpiarake agnondriko, ty lahilahy ze mitsanga eto agnilako ty vatanao__zay ro talily Yaveh tompo ty maro. Asio ty mpiarake agnondry, le hizara reo agnondry! Fa hagnere ty tagnako handietre reo malineke Raho. ⁸ Naho magnera ty tane iaby__zay ro talily Yaveh__le hisy roe ampahatelo zay ho ravae! Ho rava reo ndaty reo; raike ampahatelone avao ro hijano agne. ⁹ Ho enteko amity afo io ampahatelone eo naho ho lioveko manahake ty malio volafoty iereo; ho henteako manahake ty volamena voa hente iereo. Hikaike ty agnarako iereo, ka hamale iereo raho naho hanao ty hoe:' Toy ro Ndatiko!' naho hirehake iereo hoe:' Yaveh ro Zagnahareko!""