¹ Ingo! Hoavy ty andro Yaveh laha fa ho zarae eo agnivonareo ty babonareo. ² Fa havoriko handietre Jerosalema amity aly ty firene iaby ka ho voababo ty tana. Reo tragno le ho voababo naho ty ampela ho voa-seresere. Ty vaky ty tana le ho voababo, fa ty sisa tavela amireo ndaty le tsy hafaha eo amity tana. ³ Fa Yaveh le hiakatre naho hialy amireo firene manahake aze laha fa mialy amity andro ty aly. ⁴ Amize andro zay ty tombone le hitsanga eo ambone ty vohitse Oliva, ty eo agnila Jerosalema agne antignana. Ty Vohitse Oliva le hitrerake roe naho ho sarahe ty baibo bey naho ty vaky ty vohitse le hihere magnoloa ty avaratre naho ty vakine magnoloa ty antimo. ⁵ Bakeo riha hilay hizotro ty baibo eo agnivo reo vohitse Yaveh, fa ty baibo eo agnivo reo vohitse le hipake zisikagne Azela. Hilay manahake ty nilaisanao tamity horohoron-tane tamireo andro Ozia, mpanjaka Joda riha. Le hoavy Yaveh Zagnahareko naho hiarake amine iaby reo ndaty masy iaby. ⁶ Amize andro zay le tsy hisy hazava, fa tsy hisy na nara na fagnafake. ⁷ Amize andro zay, andro te Yaveh arere avao ro mahay, le tsy hisy andro na hale sase, fa ty hariva le ho lasa andro ty hazava. ⁸ Amize andro zay ty rano velo le hily hiakatre agne Joresalema. Ty vaky reo le hily amity riake antignana naho ty vakine amity riake ahandrefa, amity asara vaho amity asotry. ⁹ Ho mpanjaka amity tane iaby Yaveh. Amize andro zay le hisy Yaveh, Ty Zagnahare toka, naho ty agnarane arere avao. ¹⁰ Ty tane iaby le hanahake Araba, manomboke ao Geba ka zisikagne Rimona antimo jerosalema. Hakare zisikagne Jerosalema naho hitoboke amity toerane arere, zisikagne amity vavahady Benjamina ka hatragne amity toera ze nisy ty vavahady voalohane, hatragne amity vavahady an-jorone, naho zisikagne amity Tilikambo Hananela ka hatragne amireo faneaham-boaloboke ty mpanjaka. ¹¹ Ty vahoake le hitoboke agne Jerosalema naho tsy hisy harava vatane bakaminagnahare handietre iereo sase. Hievlo tsy amim-pisala-sala ty Jerosalema. ¹² Zao ro ho loza ze hagnisia Yaveh reo vahoake iaby nialy nandietre i Jerosalema: ty nofo iereo le ho lo na le mitsanga amity tombone aza iereo. Ty maso iereo le ho lo ao amity tombo iereo naho ty lela iereo ho lo ao ambava iereo. ¹³ Amize andro zay ty tahotre bey bakamy Yaveh le hoavy amiereo. Ty kirai-kiraike le hita ty tagna ty hafa, naho ty tagna ty raike le hiakatre hagnisy ty tagna ty raike hafa. ¹⁴ Joda avao kea le hialy handietre Jerosalema. Hamory ty harea reo firene magnodidy iaby iereo__Volamena, volafoty, naho siky soa maro bey. ¹⁵ Ty loza avao kea le ho amireo soavale vaho reo ampondra, reo rameva vaho reo borike, naho reo biby iaby ao amireo tobe reo avao kea le hijale amize loza zay avao. ¹⁶ Naho zao ro hiseho, iaby ze tavela ao amireo firene ze avy mandietre Jerosalema le hiakatre isan-tao kea mba hiantsa ty mpanjaka, le Yaveh tompo ty maro, naho hiambe ty fifalea ty fialofa. ¹⁷ Laha tsy mindeha miakatre ho agne Jerosalema mba hiantsa ty mpanjaka, le Yaveh tompo ty maro, ty ndaty bakamireo firene iaby ty tane, le tsy hinday ora amiereo Yaveh. ¹⁸ Laha tsy miakatre ty firene Egypta, le tsy hahazo ora iereo. Hisy arete-mandany bakamy Yaveh ze hagnisy reo firene ze tsy hiakatre mba hita ty fifalea ty Fialofa. ¹⁹ Zay ro ho fagnaliloa ho ahy Egypta naho fagnaliloa ho ahy ty firene iaby ze tsy miakatre mba hita ty Fifalea ty Fialofa. ²⁰ Fa amize andro zay, ty lakolosy reo soavale le hirehake hoe:" Atokano ho ahy Yaveh," naho reo koveta ao amity tragno Yaveh le hanahake ty finga boribory eo agnoloa ty alitara. ²¹ Fa ty velagne tanemanga iaby ao jerosalema vaho Joda le hatoka ho ahy Yaveh tompo ty maro naho iaby ze minday soro le hihina amireo naho hampandeve ao agnate reo. Amize andro zay reo mpivarotre le tsy ho ao antragno Yaveh tompo ty maro sase.