¹ Vohao ty lalanao, ry Libanona, mba handrava ty afo ty sederanao! ² Mandala, ry hetae Kypreso, fa le nitonta ty hetae sedera! Reo agnabo le fa rinava! Mandala, nareo ry hetae terebinta Basana, fa le fa ripake ty ala bey. ³ Mitoreova reo mpiarake agnondry, fa le fa rava ty hasy iereo! Mitserogna ty feo ty ana ty liona, fa le rava ty rehareha ty Rano Jordana! ⁴ Fa zao ro safa Yaveh Zagnahareko:" Manahake ty mpiarake agnondry, miarake ty agnondry ze ho vonoe! ⁵ (mamono iereo ty mivily aze naho tsy voasaze, naho ty mivarotre aze reo manao hoe:' Isaora anie Yaveh! Le fa lasa mpagnarivo Raho!' fa reo mpiarake miasa ho ahy reo tompon'agnondry le tsy niantsa iereo.) ⁶ Fa tsy hiantsa ty vahoake ty tane sase raho!__zay ro talily Yaveh. Ingo! Ty vatako vatane ro hagnere ty ndaty iaby eo antagna ty namane vaho eo antagna ty mpanjakane, naho handrava ty tane iereo naho tsy hisy na raike amiereo aza hafahako eo antane iereo." ⁷ Ka le lasa mpiarake ty agnondry voalahatre ho vonoe raho, ho ahy reo ze ninday ty agnondry. Nandrae tehe roe raho; ty tehe raike nataoko hoe"Hasoava" naho ty hafa nataoko hoe"Fikambagna". Tamize fomba zay ro niarahako ty agnondry. ⁸ Mpiarake agnondry telo ro vinonoko tao agnate ty volane raike, satria tsy naharetre tamiereo raho, naho nalay ahy avao iereo. ⁹ Le hoe raho tamity tompon'agnondry hoe:"Tsy hiasa ho mpiarake agnondrinao sase raho. Ty agnondry ze mate__le aleo ho mate, ty agnondry ze rava__le aleo ho rava. Ao ty agnondry ze sisa tavela sambe hihina ty nofo ty namane." ¹⁰ Le nalaeko ty teheko" Hasoava" naho sinimbako zay mba handravako ty fagnenkea ze le fa nataoko tamireo fokoko iaby. ¹¹ Tamize andro zay le rava ty fagnenkea, ka reo ze ninday ty agnondry vaho nagnente Ahy le nahay fa nirehake Yaveh. ¹² Le hoe raho tamiereo hoe:" Laha ohatre ka soa aminareo zay, le aloavo ty karamako. Fa laha tsy zay, le engao avao." Ka le niente iereo ty karamako__sekele volafoty telopolo. ¹³ Naho hoe Yaveh tamiko hoe:" Atoboho ao amity fisy raketre ty volafoty, ty viline soa vatane ze nanombagna iereo anao!" Ka le nalaeko ty sekele volafoty telopolo naho natoboko tao amity fisy raketre tao antragno Yaveh. ¹⁴ Bakeo pinoteko ty teheko faharoene, "Fikambagna", mba handrava ty firahalahia Joda vaho Israely. ¹⁵ Hoe Yaveh tamiko hoe:" Alao ho ahy ty vatanao ndraike ty raraha ty mpiarake agnondry gege, ¹⁶ fa ingo, hagnisy mpiarake agnondry eo amity tane raho. Tsy hiraharaha ty agnondry mate re. Tsy hipay ty agnondry robake re, na kea hagnafake ty mandrava. Tsy hamaha ty agnondry ze salama re, fa hihina ty nofo ty agnondry vondrake naho handrasa ty kitro reo. ¹⁷ Loza ho ahy ty mpiarake agnondry tsy soa ze mahafoe ty agnondry! Hagnisy ty sandrine vaho ty masone ankavana anie ty meso! Halazo anie ty sandrine anho ho goa ty masone ankavana!"