¹ Miboake handietse anao iaze hanorotoro anao ho poteke maromaroy. Mametraha mpiambe amity manda ty tana eo, ambeno reo lala, hamafeso ty vatagnareo, avorio tafignareo reo. ² Fa fa magnere amity ie ty hasy Jakoba manahake ty hasy Israely ty Yaveh, na le rinava ty mpandrava aza iereo vaho pinoteke sampam-boalobone reo. ³ Ty fiaro reo lahilahy mafe le mena, vaho reo lahilahy be herem-po misiky jaky; mamirapiratse ty metale gnireo kelese amity andro vaho fa nanoe ho vonoe zay, vaho ty lefo kypreso le mitsingevaheva agne amity tioke. ⁴ Mirifotse feno ty lala reo kalese; mifanaretsake etia naho eroa egne amity lalam-bey iereo. Mitovy amity fatike iereo, vaho milay manahake ty helatse. ⁵ Mikaike reo manan-kasy iaze hanorotoro anao ho potekey; mifaminga egne amity lalane iereo; mindeha malaky iereo mba hanafike ty manda ty tana. Vinono ty fiarova bevata mba hiaro reo mpanafike. ⁶ Reo vavahady amity renerano eo le sinere sokafe, vaho robake ho amity faharava ty lapa. ⁷ Nendahe ty siky ndre Hozaba vaho nalae; mangonotse manahake ty voromahilala sady miteve tratra reo mpanompo vavene. ⁸ Manahake ty ranom-parihy mintente ty Ninive, vaho milay manahake ty rano mikoriake ty vahoake. Ty hafa mikoriake tihoe: "Mijanogna, mijanogna," nefa tsy misy mitolike. ⁹ Alao ndevo ty volafotsy, alao ho ndevo ty volamena, fa tsy hisy fiafarane zay, ho ahy ty famirapirata gnireo zaka sarobily Ninive iaby. ¹⁰ Tsisy naho rava ty Ninive. Osa ty fo ty ndaty iaby, nirae nikorovoke ty lohale ty ndaty iaby, amity ndaty iaby ao ty fijalen-bey; kivy iaby ty endre gniereo. ¹¹ Amizao aia ty lavake ty liona, iaze toera ze famaha ty liona tanora, iaze toera fomba ty liona lahy naho vave, miarake amy reo anan-diona, ze natahora gniereo ndra ino ndra ino? ¹² Mamoteke reo hazane ho ahy ty anane ty liona; nagnakenda reo hazane ho ahy ty liona vave re, vaho nameno ty zohy ty amy reo haza, ty lavane amity sisan-taola voapoteke. ¹³ "Ingo, handietse anao raho-izay ro fitalilia Yaveh Tompo ty maro. Horoako amity setroke ao reo kelesenao, vaho handevo reo liona tanora ty meso. ho lanieko amity tanenao reo ndevonao, vaho tsy ho rey sasy ty feo reo mpinday hafagnao."