¹ Loza ho ahy ty tana feno lio! Feno vande naho hanagna halatse iaby zay; amine ao zisikagne ndevo reo. ² Fa amizao le misy feo ty karanvatsy naho ty feo ty firodorodoa reo sarete, fikatroha reo sovaly, vaho ty firaondrao reo kalese. ³ Misy fanafiha reo mpitikitse sovaly, hela ty meso, famirapira ty lefo, korontam-pate, fate milahatse. Tsy misy fiafarane reo; voafinga ambone gniereo eo ty mpanafike aze. ⁴ Mitsanga zay naho ty fila ty makorele soa tarehe, iaze voatsiriry amity sikily, ze mivarotse firene amity alala ty fivaron-tegna, vaho ty vahoake amity alala ty fanaova sikily. ⁵ "Ingo, hamango anao raho-izay ro fitalilia Yaveh Tompo ty maro-hagnafake ty lambanao amity tarehenao raho vaho haneho reo faretse mahamegnatse amy reo firene, ty hegnanao amy reo fanjaka. ⁶ Hanorake halotoa mamparikoriko aminao raho vaho hanao anao ho raty; hanoeko ho ndaty fihentea ty ndaty iaby riha. ⁷ Vaho ty ndaty iaby ze magnete anao le hilay anao vaho hivola tihoe: "Rava ty Niniva; ia ty mba hitagny aze?" aia ty ahisahako ndaty hankahere anao?" ⁸ Niniva, feie vao riha soa naho i Teba, ze naore amity Renerano Neily, ze nisy rano magnodidy aze, ka ranomasimbe ro rakone, ty riake avao ro mandany? ⁹ Etiopia naho Egypta ro tanjane, Pota naho Lybia ro mpirae aly tamine. ¹⁰ Kanefa nindese ty Teba; agne amity fagnadevoa re; voatorotoro tegne an-doha ty lala anane tanora reo; nanorake filoka ho ahy reo lahillahy manan-kasy reo fahavalone, vaho voafehe tamy reo rojo vy reo lahilahy mafe. ¹¹ Hizare mamo avao kea riha; hiezake hiviny riha, vaho hila fialofa amy reo fahavalo avao kea riha. ¹² Reo fiarova mafe le hanahake reo hetae aviavy miarake amity aviavy masake aloha ty fotoa: laha hozongozogne iereo, le hihintsa am-bava ty mpihina ao. ¹³ Ingo, ty vahoake aminao ao le ampela; reo vavahady ty tanenao le nisokafe midagnadagna ho ahy reo fahavalonao; nandevo ty hiline ty afo. ¹⁴ Mandehana mantsaka rano amity faherano; hamafeso reo fiarovanao mafenao; mandehana amity tanemanga vaho hosekoseho ty feta; alao ho ahy reo biriky ty tave. ¹⁵ Handevo anao agne ty afo, vaho handany anao ty meso. Handevo anao manahake ty fandevogna ty valala ty zaka iaby zay. Anovo maro iasake manahake reo valala vao ty vatgnareo, le ho maro manahake reo valala. ¹⁶ Nampitombo reo mpandratognao mihoatse ty kinta egne amity lagnitse riha; nefa manahake ty valala vao regne; mandroba ty tane iereo ka avy eo le lasa mitily. ¹⁷ Maro manahake reo valala ty roandrian-dahinao, vaho ze mivory amy reo ao manda ao amity andro manintsy. Fa lahafa moboake ty masomndro le mitily agne amity toera tsy hay gnodaty reo. ¹⁸ Mpanjaka Asrya, niazon-tory reo mpiambe agnodrinao; miroro amity fitofane reo mpandilinao. Niele an-bohitse egne ty ndtainao, vaho tsy misy ndra ia ndra ia hamory iereo. ¹⁹ Tsy hisy fagnasitragna azo atao ho ahy ferenao reo. Mafe loatse reo ferenao. Ze iaby mahare ty vaovao mikasike anao le hiteham-pifalea aminao eo. Ia ro afake milay ty haratianao mibaribary?