1
Ty fitalilia mikasike ani Ninive. Ty boky ty fahisaha ndre Nahoma, iaze Elkositay.
2
Zagnahare sarotene naho mamale fate Yaveh. Mamale fate naho feno siake Yaveh. Mamale raty amy reo mpifampikilily amine ty Yaveh, vaho manohy ty siane ho ahy ty fahavalone re.
3
Mahare-po naho bevata amity herene ty Yaveh; tsy hitalily reo fahavalone ho tsy manan-tsiny na ombia na mbia re. Hanao ty lalane amity tafio-tioke ty Yaveh, vaho ty raho ro lembo ty tombone.
4
Mivola mafe ty riake re ka magnamaike izay; zisike ty renerano iaby re. Kivy ty Basana, vaho in Karmela avao kea; maleme folera i Libanona reo.
5
Mangitikitike amity fagnatreha reo vohitse, vaho miemotse reo haboa; robake amity fagnatreha ty tane, eka vatane, ty tane naho ze ndaty iaby toboke amine ao.
6
Ia ro hahatsanga agnoloa ty siane eo? Ia ro hahatohetse ty firehe ty siane? Mikororoke manahake ty afo ty siane, vinakivakine vatobey reo.
7
Soa ty Yaveh, fiarova mafe amity andro fijalea, vaho matoky amy ze mialoke amine eo re.
8
Fa hanampetse vatane reo fahavalone amity sikilone manempotse kea re; hagnidy iereo amity ieke agne re.
9
Miteteke ino handiera ani Yaveh nareo vahoako? Hamara vatane izay re; tsy hisondrotse fagnidroene ty fijalea.
10
Fa ho vagno tahotse manahake ty ala magnaragnitse; hirekereke ty zaka finomene; ho rava ty afo vatane manahake ty lila maike iereo.
11
Nisondrotse taminao ao, Ninive, ty ndaty ze nivetsevetse zaka raty handiera ani Yaveh, le ndaty ze nandrisike haratia.
12
Ezao ro tsarae Yaveh: "Na le amity tanjane vatane ao vaho maro isake aza iereo, le ho lany iereo; tsy hisy ndaty sasy. Fa iriha, Joda: Na le nampijale anao aza raho, le tsy hampijale anano sasy raho.
13
Vaho hanampake ty jonga reo ndaty aminao ao raho; hanampake reo fehenao raho."
14
Fa nagnomey komandy mikasike anao ty Yaveh, Ninive: "Tsy hisy sasy ty foko hinday ty agnaranao. Handany reo saren-jaka aloalo naho reo saren-jaka aily amy reo tragno reo Zagnaharenao raho. Hialy reo fanasanao raho, satria tsisy dikane riha."
15
Ingo, egne am-bohitse ty tombo ty ndaty ze minday vaovao mahafale, ze mitalily fiadagna! Ankalazao reo fifaleanareo, Joda, vaho vitao ty saragnareo, fa tsy hilay anareo sasy ty raty fagnahy; lany vatane re.