¹ Tafara zay Jesosy, laha fa feno ty Fagnahy Masy, le nihere bakagne amity Rano Jordana, naho niente ty Fagnahy Masy tagne angefetre ² te nangala ty devoly fagnahy Aze zisike ty efaplo andro. Tsy nihina ndra ino ino Re zisike reo andro reo, naho tamity andro farane le kere Re. ³ Ty vevoly nirehake tamine ty hoe:" Laha anan'Agnahare Riha, le lilio hinjare mofo o vato o." ⁴ Jesosy namale aze ty hoe:" Voasoratre ty hoe:' Tsy ty mofo avao ro hahavelo ty ndaty."' ⁵ Bakeo niente ty devoly tegne amity toera ambone Jesosy naho natorone Aze tsiela iaby ty fanjaka iaby zao iaby zao. ⁶ Ty devoly nirehake tamine ty hoe:" Homeiko anao ty fahefa iaby vaho ty famirapirane iaby, satria le fa namoeane ahy reo, naho afake ameako, ty ndaty ze teako amea aze. ⁷ Laha zao, laha mihohoke vaho manompo ahy Riha, le ho lasanao zay." ⁸ Kanefa Jesosy namale ka nanao aze ty hoe:" Voasoratre ty hoe:" Hiantsa Tompo Zagnaharenao riha, naho Re arere avao ro ho tompoenao."' ⁹ Bakeo ty devoly le nanday Jesosy tagne Jerosalema naho nataone tegne amity fara-tampo ty tempoly, naho nanao tamine ty hoe:" Laha anan'Agnahare Riha, le antotao baketoy ty vatanao. ¹⁰ Satria le fa voasoratre ty hoe:' Hibaiko ty anjelene ty aminao Re, mba hiaro anao,' ¹¹ naho,' Re ro hagnakatre anao amity tagnane, mba tsy ho tafintohy ty vato ty tombonao."' ¹² Namale aze, Jesosy nirehake ty hoe:" Le fa nambara ty hoe:' Ko mangalake fagnahy ty Tompo Zagnaharenao."' ¹³ Laha fa vita ty fangala ty devoly fagnahy Jesosy, le lasa re naho nienga aze zisike ty hahavia ty andro hafa. ¹⁴ Bakeo Jesosy nihere tagne Galilia tamity here ty Fagnahy, naho ty vaovao miomba Aze le fa niele nagnera ty faritre magnodidy iaby. ¹⁵ Le nanomboke nampianatre tao amity Synagoga iereo Re naho niteagn'i iaby. ¹⁶ Nandeha tagne Nazareta Re, ty tana nahabe aze, naho arake ty fomba fataone, le nilitre tao amity Synagoga tamity andro Sabata Re ka nitsanga mba hamaky tene mafe. ¹⁷ Natolotre aze ty sare taratasy Isaia mpamisavisa. Sinokane ty boke naho hitane ty toera nanorata aze, ¹⁸ "Ty Fagnahy Tompo le amiko ato, satria Re nagnosotre ahy hitalily ty vaovao mahafale hoahy mahantra. Re ro nandefa ahy hitalily fahafaha hoahy reo ze azo, naho hampipoly ty fahitaha hoahy ty goa, hagnafake reo ze ampijale, ¹⁹ hagnombara ty taon-katean'Agnahare." ²⁰ Bakeo le naorene ty taratasy, naherene tagne amity mpiambe, naho nitoboke Re. Ty maso reo iaby tao amity Synagoga le niambe Aze. ²¹ Nanomboke nirehake tamiereo re ty hoe:" Androany ty soratre Masy toy le lefe eo ampijanjignanareo." ²² Iaby tao le nitalily soa ty miomba Aze naho gaga tamity tsaram-pahasoava te nakare ty vava iereo, naho nagnotane iereo ty hoe:" Fa tsy ty anagn'i Josefa ay vao toy io?" ²³ Re nirehake tamiereo ty hoe:" Azo antoke fa hitalily ty ohabola toy amiko nareo ty hoe:' Dokotera, sitrano ty vatanao. Ndra ino ino reinay fa nataonao tao Kapernaomy, le mova hoe izao agne amity tanenao."' ²⁴ Nefa nirehake Re ty hoe:" Rehafeko mare aminareo, tsy misy mpamisavisa voarambe ao amity tanene. ²⁵ Kanefa rehafeko mare aminareo fa maro ty ampela mpivem-bata tagne Israely tamity andro Elia, laha nihily ty lagnitre zisike ty telo tao vaho enem-bola, naho nisy kere bey tamity tane iaby. ²⁶ Nefa ty Elia tsy nalefa ndra tamity raike tamiereo aza, fa tao Zerapata agne Sidona avao, tagne amity mpivem-bata ze nitoboke tagne. ²⁷ Fa maro reo boka tao Israely tamity andro Elisa mpamisavisa, nefa tsy nisy ndra le raike tamiereo aza afake laha tsy Namana Syriana." ²⁸ Ty ndaty iaby tao amity Synagoga le heneke ty heloke laha fa naharey reo zaka reo. ²⁹ Nitsanga iereo, nanere Aze hiala ty tana, naho nandefa Aze tegne ambone ty tazoa ty nioregna ty tagna iereo, mba hitontane amity lavake. ³⁰ Nefa nandeha namakivaky teo agnivo iereo Re le lasa nandeha tagne amity toeran-kafa. ³¹ Bakeo Re le nandeha tagne Kepernaomy, tana raike agne Galilia, naho nanomboke nampianatre iereo tamity Sabata Re. ³² Iereo le nigaga tamity fampianara nataone, satria nirehake tamity fahefa Re. ³³ Naho tao amity Synagoga le nisy lahilahy nisy ty fagnahy maloto ty demonia, naho re le nikorake tamity feo mafe ty hoe: ³⁴ "Ah! Ino ro ifandraisanay aminao, ry Jesosy bakagne Nazareta? Avy mba hamoteke anay vao Riha? Haiko hoe ia Riha- ty Raike Masin'Agnahare!" ³⁵ Jesosy nirehake mafe ty demony, ka nanao ty hoe:" Ko mirehake naho miala amine ao!" Laha fa nanorake ty lahilahy hitonta teo agnivo iereo ty demony, le niala tamine ao, naho tsy namere aze kea. ³⁶ Nigaga iaby ty ndaty iaby, naho nanohy nifampirehake ty miomba zay. Nirehake re ty hoe:" Fa rehake hoe ty akore rie zay?" Baikoene amity fahefa vaho here ty fagnahy maloto le miakatre." ³⁷ Laha zao le nanomboke niele nagnera ty faritre magnodidy ty lazane. ³⁸ Le niala ty Synagoga Jesosy naho nilitre tao antragno Simona. Naho nampijale ty tazo mahere ty rafozam-bave Simona, naho nangatake tamine hoaze iereo. ³⁹ Ka nitsanga teo agnoloane Re naho nirehake mafe ty tazo, le niala tamine zay. Bakeo re le nitsanga naho nanomboke nanompo iereo. ⁴⁰ Laha fa nilenteke ty masoandro, le nanday ty ndaty iaby narere ty arete maro sambehafa amy Jesosy ty ndaty. Nametra-tagna tamity kirai-draike iaby amiereo Re ka nagnafake iereo. ⁴¹ Ty demony avao kea le niala tao amity maro tamiereo, nikorake mafe vaho nanao ty hoe:" Riha ro anan'Agnahare!" Jesosy nirehake mafe reo demonia ka tsy namototre iereo hirehake, satria hay iereo fa Re ro kirisity. ⁴² Vaho maraindray, le nandeha tagne amity toera mangike Re. Vahoake maro bey ro nipay Aze naho nimbaeo amity toera ze nisy Aze. Iereo le niezake ty nita Aze mba tsy hiala eo amiereo. ⁴³ Fa Re nirehake tamiereo ty hoe:" Tsy mahaintsy mitalily ty vaovao mahafale miomba ty fanjakan'Agnahare amity tana maro hafa avao kea Raho, satria zay ro antone nagniraha Ahy etoy. ⁴⁴ Bakeo Re le nanohy nitalily tao amireo synagoga magnera Jodia.