¹ Tamity tao faha dime ambifolo nanjaka Tiberie Kaisara-tamy Pontio Pilato ro governora Jodia, Heroda le mpandily tao Galilia, Filipo rahalahine le mpandily tao amity faritre Itoria vaho Trakonitisy, naho Lysania le mpandily Abilena, ² zisike ty fisorognambey Aniasy vaho Kaiafa- le niavy tamy Jaona anadahy Zakaria tagne agnefetre ty safan'Agnahare ³ Nandeha tagne amireo faritre iaby magnodidy Jordana Re, nitalily ty batisa ty fibebaha ho famotora reo heloko ⁴ Arake ty voasoratre ao amity boke ty tsara Isaia mpamisavisa ty hoe:"Nisy feo raike nikaike mafe bakagne agnefetre ty hoe:'Vognono ty lala Tompo, anaovo mahity ty lalan-kombane. ⁵ Ty baibo iaby ho lembefe, naho ty vohitre vaho ty tazoa hatao gebo, naho ty lala miotake le hamboare mahity, naho ty toera korohotre le hatao lala, ⁶ naho ty nofo iaby le hahita ty famonjean'Agnahare ⁷ Ka nirehake tamireo vahoake ze niavy hataone batisa ty Jaona ty hoe:" Nareo ry foko ty menara! Ia ro nampianatre anareo mba hilahy ty heloke zay hoavy? ⁸ Laha zao, mamokara voa soa ty fibebaha, naho ko manomboke mirehake ao agnate reo ty hoe:' Zahay mana i Abrahama ho raenay,' fa mirehake anareo raho fa Zagnahare le afake mananga anake hoahy Abrahama bakamity vato toa. ⁹ Henanezao ko ty famaky le mitoboke eo amity foto ty hetae. Ka ty hetae iaby ze tsy voa soa le ho tampake naho hatorake agne amireo afo." ¹⁰ Naho reo vahoake le nagnontane aze zisikagne, nanao ty hoe:" Ino are ro hataonay?" ¹¹ Namale re ka nanao tamiereo ty hoe:" Laha misy ndaty mana akanjo lava roe, tokone mizara zay amity ndaty raike ze tsy mana re, naho ze mana sakafo kea le tokone hanao hoe zay." Reo mpamory hetra kea le avy mba hatao batisa, naho nirehake tamine ty hoe:" Mpampianatro, ino ro tsy mahaintsy ataonay?" ¹³ Re nirehake iereo ty hoe:" Ko mamory vola mihoatre naho ze nampandoavenareo." ¹⁴ Miaramila maromaro ka nagnotane aze, nanao ty hoe:" Akore ty miomba anay? Ino ro tsy mahaintsy ataonay?" Re nirehake tamiereo ty hoe:" Ko mangalake vola amity ndaty an-kere, naho ko mita vande ndaty. Mifalea amity karamanareo." ¹⁵ Naho laha niambe mafe ty fahavia Kirisity ty vahoake, le nagnotane tao agnarofone ty mikasike Jaona ty kirai-kiraike, ndra mete ho ire ndra tsy re ro kirisity. ¹⁶ Jaona namale tamity firehafa aze iaby ty hoe:" Laha ty amiko, le manao batisa anareo amity rano raho, fa misy ndaty raike hoavy te mahere mandako ahy, naho tsy soa amiko ndra ty hamaha ty talin-kapane aza. Hanao batisa anareo amity Fagnahy Masy vaho ty arofo Re. ¹⁷ Eo antagnane ty fikororohane mba hagnaliova soa ty ao ampamoloane vaho hamoria ty vare hoagne amity sompine. Fa horoane amity afo tsy mete vonoe ty afoka." ¹⁸ Niarake tamity fagnanara maro hafa avao kea, Jaona nitalily vaovao soa hoahy ty vahoake. ¹⁹ Heroda mpandily Laha fa nagnare naho ty fanambalia ty valin-drahalahine Herodiasy, vaho naho ty zaka raty hafa iaby ze vitane, ²⁰ le ho fagnampe ze iaby zay, le nandeha tagne ampigadra ty Jaona. ²¹ Naho, laha fa7 vita batisa iaby ty ndaty iaby, le natao batisa kea Jesosy, naho laha mboe nivavake re, le nivoha ty lagnitre, ²² naho ty Fagnahy Masy nangalake toera ka nandeha teo amine manahake ty voromahilala, naho nisy feo bakagne an-dagnitse nanao ty hoe:" Riha ro Anako, malalako. Fale Raho naho ty aminao." ²³ Laha fa nanomboke ty asa fanompoane Jesosy, le teo amity telo-polo tao eo Re. Re ro anadahy (arake ty fandineha) Josefa, anagny Hely, ²⁴ anagn' i Matata, anagn'i Levy, anagn'i Melky, anagn'i Janay, anagn'i Josefa. ²⁵ Josefa le anagn'i Matitia, anagn'i Amosa, anagn'i Nahoma, anagn'i Elsy, anagn'i Nagay, anagn'i Mata, ²⁶ anagn'i Matatia, anagn'i Semey, anagn'i Josefa, anagn'i Joda. ²⁷ Joda le anagn'i Jonatana, anagn'i Rase, anagn'i Zerobabela, anagn'i Sealtiela, anagn'i Nery, ²⁸ anagn'i Melky, anagn'i Ady, anagn'i Kosama, anagn'i Elmadama, anagn'i Era, ²⁹ anagn'i Josoa, anagn'i Eliezara, anagn'i Joreima, anagn'i Matata, anagn'i Levy. ³⁰ Levy le anagn'i Simeona, anagn'i Joda, anagn'i Josefa, anagn'i Jonama, anagn'i Eliakima, ³¹ anagn'i Melea, anagn'i Mena, anagn'i Matata, anagn'i Natana, anagn'i Davida, ³² anagn'i Jese, anagn'i Obeda, anagn'i Boaza, anagn'i Salmona, anagn'i Nahasona. ³³ Nahasona le anagn'i Aminadaba, anagn'i Adimina, anagn'i Arny, anagn'i Herzona, anagn'i Fazera, anagn'i Joda, ³⁴ anagn'i Jakoba, anagn'i Isaka, anagn'i Abrahama, anagn'i Tera, anagn'i Nahora, ³⁵ anagn'i Seroga, anagn'i Reo, anagn'i Palega, anagn'i Ebera, anagn'i Sela. ³⁶ Sela le anagn'i Kenana, anagn'i Arpaksada, anagn'i Sema, anagn'i Noa, anagn'i Lameka, anagn'i ³⁷ Metosela, anagn'i Enoka, anagn'i Jareda, anagn'i Mahalalila, anagn'i Kenana, ³⁸ anagn'i Enosa, anagn'i Seta, anagn'i Adama, anan'Agnahare.