¹ Naho tamize andro zay, le nandefa lily mibaiko ty mibaiko ty hagnisaha ty ndaty iaby velo eto amizao tontolo zao Aogosto Kaisara. ² Zay ro fagnisaham-bahoake natao voalohane tamy Kyrenio ro mpandily ty tane Syria. ³ Laha zao ty ndaty iaby le nimbaeo amity tana nahaviane iaby mba hisoratre agnara hoahy ty fagnisaham-bahoake. ⁴ Le nandeha niakatre bakagne Galilia kea Josefa, bakagne antana Nazareta, hoagne Jodia, tana Davida te atao ty hoe Betlehema, satria re bakamity tragno vaho longo Davida. ⁵ Nandeha tagne re mba hisoratre agnara niarake tamy Maria, ty fofom-baline naho nibetroke. ⁶ Naho laha mboe tagne iereo, le niavy ty andro hiterahane ty anane. ⁷ Niterake kolo lahy re, anane voalohane, naho re nandrakoke lamba-naja Aze vaho nampandre Aze teo amity fihinanam-bilo, satria tsy nisy toera hoaze ty tao amity hotely. ⁸ Nisy mpiarake agnondry tamize faritre zay ty nijano tagne ambaibo, niarake ty agnondrine tamity hale. ⁹ Nisy anjele Tompo niseho tamiereo, naho ty hasy Tompo namirapiratre magnodidy aze, naho feno tahotre bey iereo. ¹⁰ Le nirehake tamiereo ty anjele nanao ty hoe:" Ko matahotre, fa handay vaovao soa ty handay hafaleam-bey hoahy ty ndaty iaby raho. ¹¹ Androany le nisy mpagnavotre te terake hoanareo agne antana Davida! Re ro Kirisity Tompo! ¹² Zao ro famantara zay hamea anareo: Hahita kolo-kele mirakotre lamba-naja naho miroro eo amity fihinanam-bilo nareo." ¹³ Tampoke eo niarake tamity anjele, le nisy tafike ty lagnitre bey niantsa an'Agnahare nanao ty hoe: ¹⁴ "Hasy ho an'Agnahare agne amity ambone vatane, naho hisy fiadagna anie eto antane eo amity ndaty ze teane." ¹⁵ Naho laha fa niala teo amiereo nimbaeo andagnitre reo anjele, ty mpiarake agnondry nifampirehake ty hoe:" Andao tika amizao hoagne Betlehema, naho hagnete ze zaka nisy zao, te nampahaie Tompo antika zay." ¹⁶ Nandeha malaky tagne iereo naho nahita Maria vaho Josefa, naho nahita ty ajakele niroro teo amity fihinanam-bilo. ¹⁷ Tafara ty nahita iereo Aze, le nampahaie iereo ty zaka iaby nirehafe amiereo miomba i kolo o. ¹⁸ Iaby ze naharey zay le gaga ty amity nirehafe ty mpiarake agnondry tamiereo. ¹⁹ Fa Maria kea nanohy nidineke miomba ty zaka iaby ze reine, naho nita rey tao agnarofone. ²⁰ Nihere reo mpiarake agnondry, nagnomea hasy vaho nandaza an'Agnahare naho ty zaka iaby ze rey iereo vaho hita iereo, arake ze nirehafe tamiereo. ²¹ Laha nitampetre ty andro fahavalo, laha fa sinavatre Re, le nomea agnara ty hoe Jesosy, ty agnara nomea ty anjele Aze taloha ty nametraha Aze antroke ao. ²² Naho laha fa losotre ty isa ty andro tinake hiliovane, arake ty lily Mosesy, le nanday Aze niakatre hoagne antempoly tao Jerosalema ty Maria vaho Josefa mba hanolotre Aze eo amy Tompo. ²³ Arake ze voasoratre ao amity lily Tompo ty hoe:" Ty lahy iaby ze voaloham-piterake le hatoka hoahy Tompo." ²⁴ Laha zao le nanolotre soro arake ze voatalily ao amity lily Tompo iereo," domohina roe ndra ana ty voromahilala roe." ²⁵ Naho ingo, nisy lahilahy tagne Jerosalema, Simona ro agnarane, naho ze lahilahy zay le mare vaho mafana arofo. Nipay ty fampionogna Israely re, naho tamine ao ty Fagnahy Masy. ²⁶ Natalily ty Fagnahy Masy tamine fa tsy hahita fate aloha ty hahitahane ty kirisitine Tompo re. ²⁷ Tinary ty Fagnahy, nimbaeo antempoly Simona. Laha fa nanday Jesosy kolo kele nilitre ty rae-amandrenene, mba hanao Aze arake ty fomba ao amity lily, ²⁸ le niraesene ho egne antsandrine Re vaho niantsa an'Agnahare naho nanao ty hoe: ²⁹ " Henanezao engao handeha ampilamina ty mpanomponao, ry Tompoko, arake ty safanao. ³⁰ Fa ty masoko nahita ty famonjeanao, ³¹ te nomagnenao teo amity fiatreha ty ndaty iaby: ³² Le hazava ho fagnambara hoahy ty Jentilisa naho hasy hoahy Israely ndatinao." ³³ Ty rae vaho rene ty kolo le hiake tamity zaka nirehafe mikasike Aze. ³⁴ Nitso-drano aze reo Simona naho nanao tamy Maria renene ty hoe:" Ingo, ty kolo toy le voatendre ho amity fandoava vaho fagnakara ty ndaty Israely maro naho ho famantara ze niliere- ³⁵ naho hisy meso handoake ty fagnahinao- mba ho voa talily ty heve ty arofo maro." ³⁶ Nisy mpamisavisa vave raike atao ty hoe Ana teo. Anakampela Fanoela bakamity foko Asera re. Vatane antetre re. Nitoboke niarake tamity valine fito tao tafara ty nahaverijine aze re, ³⁷ naho mpivem-bata zisike ty efatre amby valompolo tao. Tsy niala ty tempoly zao re fa nanompo tamity fifalian-kane vaho vavake, andro aman'ale. ³⁸ Tamize lera zay avao le namonje marine iereo re naho nanomboke nagnomea fisaora an'Agnahare vaho nitalily ty miomba ty kolo tamity ndaty iaby ze nimabe ty fagnavota Jerosalema. ³⁹ Laha fa nahavita ty zaka iaby nampanoene arake ty lily Tompo iereo, le nihere tagne Galilia, agne amity tana iereo agne Nazareta. ⁴⁰ Nihabey ty kolo naho nihanatanjake, nitombo hamarea, naho ty hasoavan'Agnahare le tamine ao. ⁴¹ Ty rae-amandrene le nimbaeo Jerosalema isan-tao hamonje ty Hafalea ty Pasake. ⁴² Laha fa roe ambifolo tao Re, le nandeha nimbaeo arake ty fomba amity fete ndraike iereo. ⁴³ Naho laha fa baka nitoboke tagne zisike ty andro ty fete iaby iereo, le nanomboke nihere noly iereo. Fa jesosy ajalahy nijano tagne Jerosalema nefa tsy hay ty rae-amandrenene zay. ⁴⁴ Natao iereo fa niarake tamity ndaty niara-dia tamiereo Re, le nandeha zisike ty andro raike iaby iereo. Naho bakeo le nanomboke nipay Aze tagne amireo longone vaho reo namane iereo. ⁴⁵ Laha fa tsy hita iereo Re, le nihere tagne Jerosalema iereo ka nanomboke nipay Aze tagne. ⁴⁶ Laha niafake telo andro, le hita iereo tao antempoly re, nitoboke teo agnivo reo mpampianatre, nidranjy aze iereo vaho nametrake fagnotanea tamiereo. ⁴⁷ Iabe ze naharey Aze le gaga tamity fahaiane vaho reo valen-drehane. ⁴⁸ Laha fa nahita Aze iereo, le hitake. Ty renene nirehake tamine ty hoe:" Anake, nagnino riha ro nanao hoe zao anay? Dranjigno, zaho vaho ty raenao nipay anao tamintebetebe."49Re nirehake tamiereo ty hoe:" Nagnino nareo ro nipay Ahy? Tsy hainareo vao fa tsy mahaintsy ho ao antragnon-draeko Raho?" ⁵⁰ Fa tsy azo iereo ze teane ho rehafe tamize rehake zay. ⁵¹ Le noly niarake tamiereo tagne Nazareta Re vaho nagneke iereo. Ty renene le nagnaja ze zaka iaby zay tampone ao. ⁵² Fa Jesosy niha-nitombo famarea vaho nitombo vata, naho nitombo hatea tamin'Agnahare vaho ty ndaty.