¹ Naho zao ro niseho, laha nivory nagnodidy Jesosy ty ndaty naho nidranjy ty safan'Agnahare, le nitsanga teo amoro ty Rano Genesareta Re. ² Nahita sambo kele roe nijano teo amoro ty Rano re. Le niakatre tao iereo mpamita naho nanasa ty haratone. ³ Nilitre tao amity raike tamireo sambo kele Jesosy, ze ahy Simona, naho nangatake aze mba handefa zay egne amity rano lavidavitre ty tane. Bakeo le nitoboke re ka nampianatre reo ndaty tegne ambaly ty sambo kele. ⁴ Laha fa nijano nirehake re, le nirehake tamy Simona re ty hoe:" Ento hoagne amity rano laleke ty sambo kele le ampoho ty haratonareo mba hahazoanareo zaka-andrano ao." ⁵ Simona namale Aze ty hoe:" Tompo o, te fa niasa ty hale iaby zahay, fa tsy nahazo ndra ino ino, fa naho ty safanao, le hapoko ty harato." ⁶ Laha fa natao iereo zay, le nahazo zaka-andrano maro vatane iereo, naho niriatre ty harato iereo. ⁷ Ka nanao fihetreke tamireo namane ze tao agnate ty sambokele raike hafa iereo fa iereo le tokone ho avy naho hagnampe iereo. Le niavy iereo ka nameno ty sambokele roe, ka le nanomboke nilepotre ie roe. ⁸ Fa Simona, laha vaho nahita zay, le nihohoke teo antombo Jesosy, nanao ty hoe:" Miala amiko, fa lahilahy mpanonta Raho." ⁹ Fa gaga re, vaho iereo ze niarake tamine, naho ty habey ty zaka-tandrano ao ze niazo iereo. ¹⁰ Tagnate zay ty Jakoba vaho Jaona, anagn'i Zebedio, te mpiaramiasa amy Simona. Jesosy nirehake tamy Simona ty hoe:" Ko matahotre, fa manomboke zao le hagnarato ndaty riha." ¹¹ Laha fa niente iereo tegne antane ty sambo kele iereo, le nagnega ty zaka iaby iereo ka nagnorike aze. ¹² Le nisy ty hoe zao laha mboe tao amity raike tamireo tana Re, le nisy lahilahy feno fagnaboka teo. Laha nahita jesosy re, le nihohoke tamine eo naho nangatake amine, nanao ty hoe:"Tompo, laha mete aminao, le afake magnalio ahy." ¹³ Naho le namototre ty tagnane Jesosy naho nikaiske aze, nanao ty hoe:" Mete raho. Maliova." Teo naho eo le niafake tamine ty fagnaboka. ¹⁴ Rinarane re mba tsy hitalily ndra aminia ia, fa nirehafene tamine ty hoe:" Oriho ty lalanao, miboaha amity mpisoro naho manolora soro hoahy ty fandiova anao, arake ty nandilia Mosesy, mba ho fitsangana vavolombelo amiereo." ¹⁵ Kanefa ty talily miomba aze le niele lavitre kea aza, naho vahoake maro bey ro niarake avy mba hidranjy aze nampianatre naho mba ho afake amity arete iereo. ¹⁶ kanefa mateteke Re le niala nimbaeo amity tane foa naho nivavake. ¹⁷ Naho tamity andro raike tamireo andro nampianarane, le nisy Fariseo vaho mpampiana-dily nitoboke teo te bakamity tana sambehafa ao amity faritre Galilia vaho Jodia, naho kea ty ao amity tana Jerosalema. Ty here Tompo ro tamine ao mba hagnafaha. ¹⁸ Naho nisy lahilahy ilane niavy, nanday lahilahy raike voa ty paralisisa teo amity fandreane, naho iereo le nipay hevetre handaisa aze agnatene ao mba hanaova aze ho agnoloa Jesosy eo. ¹⁹ Tsy nahita hevetre hampilira aze tao agnatene iereo naho reo vahoake, laha zao le nimbaeo amity ambone tragno iereo naho nanjotso ty fandrea ty lahilahy bakeo an-tafo tragno, tamity fandreane, tagnivo ty ndaty, tagnoloa Jesosy eo. ²⁰ Laha fa nahita ty finoa iereo, le hoe ty Jesosy ty hoe:" Ralahilahy, vototse ty helonao." ²¹ Nanomboke nagnotane reo mpanora-dily vaho reo Fariseo, ka nirehake ty hoe:" Ia moa ty mirehake raty Ty io? Ia ro afake mamototre ty hadisoa laha tsy Zagnahare arere avao?" ²² Fa Jesosy, nahay ze dine iereo, namale naho nirehake iereo ty hoe:" Nagnino nareo ro magnotane amponareo ao? ²³ Ino ty mora rehafe kea:' Vototre ty helonao' sa ty mirehake ty hoe:' Mitsangana naho mandehana?' ²⁴ Nefa mba hahaianareo fa ty anagn'Ondaty le manam-pahefa hamototre heloke antane eto, le ataliliko aminao, mitsangana, ento ty fandreanao nao mandehana agne antragnonao." ²⁵ Teo naho eo le nitsanga tagnoloa iereo re naho nangalake ty fandrea ze nandreane. Bakeo le niala nandeha antragnone re, nagnomea hasy an'Agnahare. ²⁶ Nahitake iaby naho nagnomea hasy an'Agnahare iereo. Lako tahotre iereo, nanao ty hoe:" Nahita zaka-mahagaga tika androany." ²⁷ Tafara ty nisehoa reo zaka reo, le niala tao Jesosy ka nahita mpamory hetra raike atao ty hoe Levy nitoboke teo amity7 tragno lay ty mpamory hetra. Nirehake tamine re ty hoe:" Magnoriha Ahy." ²⁸ Le nitsanga ty Levy ka nagnorike Aze, ka nienga ty zaka iaby. ²⁹ Le nanao fagnafaram-bey tantragnone ao hoahy Jesosy ty Levy. Maro reo mpamory hetra vaho reo ndaty hafa ze nitoboke teo amity latabatre naho nihina niarake tamiereo. ³⁰ Kanefa reo Fariseo vaho reo mpanora-dily le nitaray tamireo mpianane, nanao ty hoe:" Nagnino riha ro mihina vaho mino miarake amireo mpamory hetra vaho ty ndaty mpanonta hafa?" ³¹ Namale iereo Jesosy ty hoe:" Tsy mipay dokotera ty salama; fa reo marare avao. ³² Tsy avy hikaike ty mare ho amity hibebake raho, fa hikaike ty mpanonta mba hibebake." ³³ Le hoe iereo tamine ty hoe:" Reo mpiana Jaona le mateteke mifaly hane vaho mivavake, naho reo mpianatre reo Fariseo le manao hoe izay koa. Kanefa ty mpiananao le mihina vaho mino." ³⁴ Jesosy nirehake iereo ty hoe:" Feie vao misy ndaty mahavita mampifaly hane ty longo ty mpangalake laha ohatre mboe mitoboke eo amiereo ty mpangalake? ³⁵ Fa hoavy ty andro ty hagnafaha ty mpangalake amiereo eo, naho amize andro zay le hifaly hane iereo." ³⁶ Le nanao fagnohara tamiereo kea Jesosy." Tsy misy ndaty mandriatre tampandamba bakamity lamba vao naho mampiasa zay mba hamboara ty lamba riatre. Laha manao zay re, le hanimba ty lamba vao, naho ty tampandamba bakamity lamba vao le tsy hitovy amity lamba riatre. ³⁷ Tsy misy ndaty magnisy divay vao agnate ty siny holitre riatre. Laha manao zay re, la handriatre ty holitre ty divay vao, naho le hirarake ty divay, naho ho simba ty siny holitre. ³⁸ Fa ty divay vao le tsy mahaintsy atao ao agnate ty siny holitre vao. ³⁹ Tsy misy ndaty baka nino ty divay taloha ka hipay ty vaovao, fa hoe re ty hoe:' Ty taloha ro soa."'