¹ Nimbaeo amity longon-drenene tagne Sekema Abimeleka anagn'i Jerobala naho nirehake tamy iereo vaho ty foko ty longon-drenene iaby ty hoe: ² "Mba ambarao rie zao, mba rey ty mpitarike iaby ao Sekema:'Ino ro mete atao aminareo: mana ty anagn'i Jerobala fitompolo lahy handily eo aminareo, sa raike avao ro mandily eo aminareo?' Tiarovo fa nofotse vaho lio nareo raho." ³ Nirehake tamireo mpitarike Sekema ho ahy iereo logondrenene, naho nagnarine ty hagnorike i Abimeleka iereo, satria hoe iereo ty hoe:" Rahalahintika re." ⁴ Nomea iereo volafoty malineke fitompolo bakao antragno i Bala-berita re, naho nampiasa i Abimeleka hikarama reo lahilahy mpandika lily vaho mahasakisaky raty ze nagnorike aze zane. ⁵ Nimbaeo antragno ty raene tagne Ofra ty Abimeleka, naho nivonoene teo ambone ty vato raike reo rahalahine fitompolo, le reo anagn'i Jerobala. Jotama ro sisa tavela, le ty anagn'i Jerobala faralahy, satria nihaja re. ⁶ Niraike avy ty mpitarike Sekema vaho Beta-milo iaby ka nindeha naho nanao i Abimeleka ho mpanjaka, teo agnila ty hetae terebinta agnila ty ambe ze agne Sekema. ⁷ Laha fa nirehafena ty mikasike zay ty Jotama, le nindeha re naho nitsanga teo ambone ty vohitse Gerizima. Nikaikaike re ka nirehake tamy iereo ty hoe:" Dranogno raho, nareo mpitarike Sekema, mba hidranognan'Agnahare anareo. ⁸ Tamity andro raike le niakatre ty hetae mba hagnosotre mpanjaka raike ho eo amiereo. Satria hoe iereo tamity hetaen'oliva ty hoe:" Manjaka aminay.' ⁹ Nefa hoe ty hetaen'oliva tamiereo:" Tokone hafoeko vao ty diloiloko, ze ampiasae hagnomean-kasy reo zagnahare vaho ty ondaty, mba hahafahako mindeha mihere, ka hitsikefa egne amity hetae hafa avao zane?' ¹⁰ Hoe reo hetae tamity aviavy:' Avia ka manjaka aminay.' ¹¹ Fa hoe kea ty aviavy tamiereo:' Tokone hafoeko vao ty hamamiko vaho ty voa soako, mba hahafahako mihere ka hitsikefa eo amireo hetae hafa avao zane? ¹² Hoe reo hetae tamity voaloboke:' Avia ka manjaka aminay.' ¹³ Hoe ty voaloboke tamiereo ty hoe:'Tokone hafoeko vao ty divay vaovaoko, ze mampifale ty zagnahare vaho ty ondaty, ka hihere naho hitsikefa eo amireo hetae hafa?' ¹⁴ Le hoe ty hetae iaby tamity fati-draketa:' Avia ka manjaka aminay.' ¹⁵ Hoe ty fati-draketa tamireo hetae:' Laha tena te hagnosotre ahy ho mpanjaka eo aminareo nareo, le avia naho mipaia fiaro eo ambane ty aloko. Laha tsy zay, le ao hiakatre bakao amity fati-draketa ty afo naho ao zay hagnoro ty sedera i Libanona.' ¹⁶ Henanekezao are, laha nanao ty mare vaho mahity nareo, tamity nagnanova nareo i Abimeleka ho mpanjaka, naho laha nanao ty soa mikasike i Jerobala vaho ty fokone, naho laha nagnalilo aze arake ze sahaza aze nareo__ ¹⁷ __naho midineke fa nialy ho anareo ty raeko, nanao vy vere ty arofone, naho namonje anareo tamity tagna i Midiana__ ¹⁸ fa henanezao nareo le fa nitsanga handietse ty fokon-draeko naho namono reo anadahine, le ndaty fitompolo, teo ambone vato raike zay. Naho natao nareo mpanjaka eo amireo mpitarike Sekema ty Abimeleka, ana ty mpanompo vavene, satria longonareo re. ¹⁹ Laha manao ty mare vaho mahity tamy Jerobala vaho ty fokone nareo, le tokone hifale amy Abimeleka, naho hagnenga aze hifale aminareo. ²⁰ Fa laha tsy zay, le ao hisy afo hiakatre bakao amy Abimeleka ka hagnoro ty ndaty i Sekema vaho Beta-milo. Ao hisy afo hiakatre bakao amireo ndaty Sekema vaho Beta-milo, mba hagnoro i Abimeleka." ²¹ Nilay naho nipolatitse ty Jotama, naho nindeha tagne Bera re. Nitoboke tagne re satria lavitre i Abimeleka rahalahine zay. ²² Nandily teo amy Israely zisike ty telo tao ty Abimeleka. ²³ Le nandefa fagnahy raty teo amy Abimeleka vaho reo mpitarike Sekema Zagnahare. Namadike ty toky ze nanagna iereo tamy Abimeleka reo mpitarike Sekema. ²⁴ Nanao zay Zagnahare mba ho voavale fate ty rehareha natao tamireo ana i Jerobala fitompolo lahy, naho ho voata ho tompon'antoke reo ndaty Sekema satria nagnampe aze namono reo rahalahine iereo. ²⁵ Ka le nametrake ndaty hiambe teo ambone tazoa reo mpitarike mba hahafaha iereo magnisy aze tampoke, naho sinimba iereo iaby reo ze nadrio teo amiereo teo amize lala zay. Voatao tagne amy Abimeleka zay. ²⁶ Le niavy niarake tamireo longone ty Gala ana i Ebeda naho nimbaeo Sekema. Nana fatokia tamine ty mpitarike sekema. ²⁷ Niakatre tagne ambaibo iereo naho namory voaloboke bakao amity tanem-boaloboke, naho le linialiane zay. Nanao fifalea tao antragno ty zagnaharene iereo, ty nihinana iereo vaho ninomane, naho nagnozogna iereo i Abimeleka. ²⁸ Hoe ty Gala, ana i Ebeda hoe:" Ia moa ty Abimeleka, naho ia ty Sekema, ro le tokone hanompo aze tika? Feie tsy ana i Jerobala vao re? Feie tsy Zebola vao ro lefene? Tompo ty ndaty Hamora, le ty rae Sekema zay! Nagnino tika ro tokone hanompo i Abimeleka? ²⁹ Irieko mba teo ambane fifeheako ty vahoake toy! Le ho nafahako ty Abimeleka. Le nirehake tamy Abimeleka raho hoe:' Kaiho ty tafinao iaby."' ³⁰ Laha fa naharey ty reha Gala ana i Ebeda iaby ty Zebola, manan-kasy ty tana, le nirehetre ty helone. ³¹ Nandefa irake tagne amy Abimeleka re mba hamitaha, nanao hoe:" Ingo, Gala ana i Sekema, naho magnafake ty tana handietse anao iereo. ³² Amizao are, le mifohaza zisike ty hale, riha vaho reo miaramila miarake aminao, ka magnomagna fanafiha tampoke agne ambaibo. ³³ Naho amity maray, vatane vaho mihiratre ty masoandro, le mifohaza maraindray naho manova rodobey egne amity tana. Laha fa miakatre handietse anao re vaho reo ndaty miarake amine, le manova ze afanao amiereo." ³⁴ Ka le nifoha zisike ty hale ty Abimeleka, vaho reo lahilahy iaby ze niarake tamine, naho nametrake fanafiha tampoke handietse i Sekema iereo__nizara ho toko efetre zay. ³⁵ Niakatre ty Gala ana i Ebeda naho nitsanga teo amity filira teo amity vavahady ty tana. Niakatre bakao amity toera fihajane ty Abimeleka vaho reo lahilahy niarake tamine. ³⁶ Laha fa hisa i Gala reo lahilahy, le hoe re tamy Zebola hoe:" Ingo, misy ndaty mizotro bakagne antazoa!" Hoe Zebola tamine hoe:" Hoe ty ndaty ty fahisahanao reo aloke eo amity tazoa." ³⁷ Le nirehake ndraike ty Gala ka nanao hoe:" Ingo, misy ndaty mizotro eo ampagnivoa ty tane, naho misy tokona raike niavy bakeo amity hetae terebinta reo mpagnandro." ³⁸ Le hoe Zebola tamine:" Aia are reo rehake fieboebonao henanezao, riha ty nirehake hoe:' Ia moa i Abimeleka ro tokone ho tompoentika?' Feie vao tsy nagnaraty reo lahilahy reo riha? Miakara amizao ka mialia amiereo. ³⁹ Niakatre ty Gala naho nitarike reo lahilahy Sekema, naho nialy tamy Abimeleka iereo. ⁴⁰ Nagnia aze ty Abimeleka, naho nilay teo agnoloa i Gala. Maro ro lavo ty fere mamono teo agnoloa ty filira teo ambavahady ty tana. ⁴¹ Nitoboke tagne Amora, ty Abimeleka. Sinere i Zebola hiakatre agne Sekema ty Gala vaho reo longone. ⁴² Ty hamaray le niakatre hoagne ambaibo reo vahoake i Sekema, naho voatao tagne amy Abimeleka zay. ⁴³ Nangalake reo vahoakene re, nizara iereo ho toko telo, naho nagnoma fanafiha tampoke tagne ambaibo iereo. Nijilo re ka nahisake ty ndaty niakatre bakagne antana naho nanafike re ka namono iereo. ⁴⁴ Nanafike naho nanampe ty filira teo amity vavahady ty tana i Abimeleka vaho reo antoko niarake tamine. Reo antoko roe hafa le nanafike reo iaby tagne ambaibo naho namono iereo. ⁴⁵ Nialy handietse ty tana iaby tamy andro zay ty Abimeleka. Nambabo ty tana re, naho namono reo vahoake ze tao amizay. Naropane ty manda ty tana ka nirarahane sira zay. ⁴⁶ Laha fa naharey ty momba zay reo mpitarike teo amity tilikambo i Sekema, le nilitse tao amity fiaro mafe ty tragno i El-berita iereo. ⁴⁷ Nambara tamy Abimeleka fa niarake nivory tao amity tilikambo Sekema ty mpitarike iaby. ⁴⁸ Nindeha niakatre tagne ambohitse Zalmona i Abimeleka, re vaho reo lahilahy iaby niarake tamine. Nangalake famaky ty Abimeleka naho nanampake tsilan-ketae. Napetrane teo antsorone zay naho nibaiko reo lahilahy niarake tamine re hoe:" Ze hisanareo ataoko, malaky ka manova manahake ty nataoko." ⁴⁹ Ka le nanampake tsilan-ketae ty ndaty iaby naho nagnorike i Abimeleka. Navory iereo teo amity rindry ty tilikambo zay, naho noroa iereo, kaiko mate avao kea ty ndaty iaby tao amity tilikambo i Sekema, le lahilahy vaho ampela eo amity arivo zane. ⁵⁰ Le nimbaeo Tebeza ty Abimeleka, naho nitobe tandrife Tebeza re ka nambabo zay. ⁵¹ Feie nisy tilikambo mafe tao amity tana, naho lasa nilay nimbaeo amizay eo reo lahilahy vaho ampela naho reo mpitarike ty tana iaby ka nihily tao. Bakeo le niakatre tegne antafo ty tilikambo iereo. ⁵² Nimbaeo amity tilikambo Abimeleka ha nialy tamizay, naho niakatre niharine ty varavara ty tilikambo re mba hagnoro aze. ⁵³ Feie nisy ampela nampipoke vato fikoseam-bare teo amity loha i Abimeleka ka nahavaky ty karan-dohane. ⁵⁴ Bakeo le nikaike malaky ty ajalahy ze mpinday ty fialiane re, naho nirehake tamine hoe:" Akaro ty mesonao le vono raho, mba tsy hisy hanao ty amiko hoe:' Ampela ro namono aze."' Ka tinombo ty ajalahy re, naho mate. ⁵⁵ Laha fa hisa reo ndaty Israely fa mate Abimeleka, le noly iereo. ⁵⁶ Ka le namale fate ty haratia Abimeleka ze nataone tamin-draene tamity namonoane reo rahalahine fitompolo Zagnahare. ⁵⁷ Naheren' Agnahare teo amity loha iereo avao ty haratia reo ndaty Sekema naho nahire iereo ty ozo i Jotama ana i Jerobala.