¹ Hoe reo lahilahy i Efraima tamy Gideona ty hoe:" Ino zao zaka nataonao taminay zao? Tsy nikaike anay riha laha nindeha nialy tamity Midiana." Nifamale mafe tamine iereo. ² Hoe re tamy iereo ty hoe:" Ino are ro vitako henanezao laha ohare aminareo? Feie vao ty famoriam-boaloboke Efraima tsy soa kea mihoatre ty fihazam-boalobok'i Abiezera? ³ Zagnahare le fa nagnomea faharesea anareo teo agnoloa ty roandria ty Midiana__le Oreba vaho Zeba! Ino moa ty vitako mihoatre ze vitanareo?" Vagno ty helogniereo tamine laha fa nirehake zay re. ⁴ Avy teo amy Jordana Gideona naho nita zay, re vaho reo lahilahy telonjato ze niarake tamine. Rerake loatre iereo, nefa le mboe nanohy ty fagniagna avao. ⁵ Hoe re tamity ndaty tao Sokota ty hoe:" Mba ameo mofo reo ndaty magnorike ahy, satria rerake loatre iereo, naho zaho hagnia i Zebaha vaho Zalamona, mpanjaka Midiana. ⁶ Le hoe reo manampahefa ty hoe:" Feie vao eo antagnanao ty tagna i Zebaha vaho Zalmona te amizao? Nagnino ro tokone hagnomea mofo ho ahy reo miaramilanao zahay? ⁷ Hoe ty Gideona ty hoe:" Laha fa omea Yaveh faharesea zahay magnoloa i Zebaha vaho Zalamona, le ho riateko amity fatike bakagne agnefetre vaho raketa ty holignareo." ⁸ Niakatre bakao re mba ho agne Penoela naho nirehake manahake zay tamity ndaty tao avao kea, fa ty ndtay tao Penoela namale aze manahake reo famale ty ndaty tao Sokota. ⁹ Nirehake tamity ndaty i Penoela avao kea re nanao ty hoe:" Laha fa tafim-poly ampilamina ndraike raho, le haravako ty tilikambo toy." ¹⁰ Naho niarake tamireo miaramilane tao Karkora ty Zebaha vaho Zalamona, tokone ho lahilahy dime arivo vaho ray ale eo, ty sisa iaby tamity tafike ty vahoake antignana iaby, satria nisy lahilahy 120.000 lavo ze voaofa hialy amity meso. ¹¹ Niakatre ty lala ty mpitoboke antragno ty Gideona, nandrio tao Noha vaho Jogbeha. Nandrese reo tafike fahavalo re, satria tsy nanompo ty fanafiha iereo. ¹² Nilay ty Zebaha vaho Zalmona, naho laha nagnia iereo ty Gideona, le voatsepane reo mpanjaka roe i Midiana__i Zebaha vaho Zalmona__naho nampihorohoroene ty tafike iereo iaby. ¹³ Gideona, anadahign'i Joasy, le nihere bakagne amity aly naho nandrio teo amity lala Heresa. ¹⁴ Nifanoje tamina-jalahy raike bakamity vahoake tao Sokota re naho nipay hevetre tamine. Natalily ty ajalahy aze ty mombamomba reo mpitarike ty Sokota vaho reo olobey tao, fito amby fitompolo lahy iereo. ¹⁵ Naho niavy tao amireo lahilahy Sokota ty Gideona ka nanao ty hoe:" Ingo Zebaha vaho Zalmona, ze nagnafaha nareo ahy vaho nirehafanareo ty hoe:' Tefa naharese i Zebaha vaho Zalmona vao riha? Tsy hainay fa tokone hagnomey mofo rey tafike nao zahay."' ¹⁶ Nalae Gideona reo olobey tao amity tana, naho nililovene tamity fatike bakagne agnefetre vaho raketa reo lahilahy Sokota. ¹⁷ Bakeo le naravane ty tilikambo tao Penoela naho vinonone ty lahilahy tao amize tana zay. ¹⁸ Le hoe ty Gideona tamy Zebaha vaho Zalmona ty hoe:" Lahilahy manahake ty akore ro vinono nareo tao Tabara?" Namale iereo ty hoe:" Manahake anao avao iereo. Ty kirai-kiraike tamy iereo le manahake ty anaka mpanjaka iaby. ¹⁹ Hoe ty Gideona ty hoe:" Rahalahiko iereo, anadahign'i reneko. Laha velo kea ty Yaveh, laha namonje iereo ho velo nareo, le tsy namono anareo raho. ²⁰ Hoe re tamy Jatera(anadahine voalohane) ty hoe:" Mitsangana naho vono iereo!" Fa ty ajalahy tsy nagnafake ty mesone fa natahotre, satria mboe ajalahy kele re. ²¹ Le hoe Zebaha vaho Zalmona ty hoe:" Mitsangana riha naho vono zahay! Fa arake ty toera ty ndaty avao ty herene." Nitsanga Gideona naho namono i Zebaha vaho Zalmona. Nafahane avao kea ty ravake sarem-bolan-tsina ze tambozo ty rameva iereo eo. ²² Dranjigno ty lahilahy Israely tamy Gideona ty hoe:" Mandilia anay__riha, ty anagnao lahy, naho ty zafekede nao lahy__satria riha ro nagnavotre anay teo amity tagna i Midiana." ²³ Hoe ty Gideona tamy iereo ty hoe:" Tsy handily anareo raho, na ty anadahiko kea aza le tsy handily anareo. Fa Yaveh ro handily anareo. ²⁴ Nitalily tamy iereo ty Gideona ty hoe:" Ao raho hanao fangataha aminareo: le ty hagnomeanareo ahy reo kavy baka rinava." (Nana kavy volamena reo Medianita satria Isimaelita iereo.) ²⁵ Namale iereo ty hoe:" Ankafalea ro hagnomezanay reo anao." Namelatre lamba iereo naho sambe nanorake reo ravake baka rinavane ty lahilahy iaby. ²⁶ Ty lanja ty kavim-bolamena ze nangatahene le sekele volamena 1.700. Ze fandrompaha zay le niampe ty ravake sarem-bolan-tsina, reo ravake, ty akanjo volomparasy ze nanaova reo mpanjaka ty Midiana, naho niampe ty ravake ze nagnodidy ty vozo ty rameva iereo. ²⁷ Nagnamboatre efoda bakamireo kavy ty Gideona naho napetrane tao antanane, tao Ofra zay, naho nampitsangatsangane ty vatane tamity fanompoa zay teo ty Israely iaby. Lasa fitake ho ahy Gideona vaho ho ahy reo ze tao antragnone zay. ²⁸ Ka le rese teo agnoloa ty vahoake Israely iereo Midiana naho tsy namboatre ty loha iereo sase iereo. Naho nilamy zisike ty efapolo tao ty tane tamity andro i Gideona. ²⁹ Jerobala, anadahign'i Joasy, nindeha ka nitoboke tao antragnone. ³⁰ Nana anake fitompolo lahy fokone ty Gideona, satria maro valy re. ³¹ Ty valitsindranone, zay tao Sekema, le niterake ajalahy tamine kea, naho Gideona nognomea aze ty agnara ty hoe: Abimeleka. ³² Gideona, anadahign'i Joasy, le mate iaby amin-kahantera soa naho naleve tao Ofra tao amity kibory Joasy raene, foko i Abiezrita. ³³ Naho laha vaho mate ty Gideona, nihere ndraike reo anagn'Israely naho nampidehandeha ty vatane tamity fanompoa reo Bala. Natao iereo ho Zagnaharene ty Bala-berita. ³⁴ Naho ty vahoake Israely le tsy nahatiaro ty hagnomey laza Yaveh, Zagnahare iereo, ty nagnavotre iereo teo amity tagna reo fahavalo iaby magnodidy. ³⁵ Tsy niambe ty fampagnategnane tamity tragno i Jerobala (na Gideona) iereo, mba ho vale ty soa iaby nataone tamy Israely.