¹ Le nifoha maray ty Jerobala (Gideona zay), vaho ty vahoake iaby ze niarake tamine, naho nitobe teo agnila ty loharano i Haroda iereo. Ty tobe i Midiana le tao avara iereo tao am-baibo agnila ty vohitse More. ² Le hoe ty Yaveh tamy Gideona ty hoe:" Maro loatre amiko reo miaramila, mba hagnomeako faharesea ho anao eo amireo Midianita, mba tsy hirehareha Israely amiko, hanao ty hoe:' Ty harinay ro namonje anay.' ³ Naho henanekezao, ambarao eo antsofy ty vahoake ka lazao ty hoe:" Na ia ia matahotre, na ia ia mihovitre, le ao re hihere ka hiala ao am-bohitse Gileada."' Le lasa ty ndaty roe arivo vaho roe ale noho zay, naho ty ray ale kea nijano. ⁴ Le hoe ty Yaveh tamy Gideona ty hoe:" Mboe maro loatre avao ty ndaty. Ento mizotro egne amity rano iereo, naho hazotroko ho anao egne ty isagn'iereo. Laha hoe raho aminao ty hoe:' Ty raike toy ro hiraike aminao,' le hiarake aminao re; fa laha hoe raho ty hoe:' Ty raike toy tsy hiarake aminao,' le tsy hiarake aminao re." ⁵ Le niente Gideona nizotro tegne amity rano ty ndaty, naho hoe ty Yaveh tamine ty hoe:" Atokano iaby ze mitselake ty rano, manahake ty fitselake ty amboa, aminireo ze mandohaleke ambane mba hino." ⁶ Lahilahy telonjato ro nitselake. Ty sisa tamity lahilahy kea nandohalike mba hino rano. ⁷ Le hoe ty Yaveh tamy Gideona ty hoe:" Amity alala reo telonjato lahy ze nitselake ty rano, ro hagnavotako anareo, vaho hagnomezako anareo ty fandresea eo amireo Midianita. Ao ty lahilahy hafa iaby hihere agne antanane iaby." ⁸ Ka le nangalake reo vatiane vao reo trompetrane reo ze voafily. Nampolie Gideona ty lahilahy Israely iaby, ty lahilahy iaby mba sambe ho ao antragnone, nefa nitanane reo telonjato lahy. Naho ty tobe Midianita le tambanene tao am-baibo. ⁹ Tamio haleke eo le hoe ty Yaveh tamine ty hoe:" Mifohaza! Agnisio ty tobe, fa homeiko anao ty faharesea zay. ¹⁰ Fa laha matahotre ty hizotro kea riha, le mizotro ao antombe miarake amy Pora mpanomponao, ¹¹ naho dranjigno ze rehafe iereo, le hatanjake ty herem-ponao amity fanafiha ty tobe." Naho le nizotro niarake tamy Pora mpanompone, tao amireo toera fiambena ty tobe Gideona. ¹² Ny Midianita, ty Amalekita, vaho ty mdaty iaby bakagne antignana le niraike nitoboke tao am-baibo, maro le maro manahake ty tokom-balala. Tsy hay isafe ty rameva iereo; maro tane ty faseke egne amoron-driake iereo. ¹³ Lafa fa niavy tao ty Gideona, le nisy lahilahy reike nitalily nofy tamity namane. Le hoe ty lahilahy ty hoe:" Ingo! Nagnonofy raho, naho nahisake mofo hordea boribory nihodikody tao antombe i Midiana. Le niavy tao antragno zay, naho nidofotre aze mafe vaho nitonta ka nivalike ambone ambane, ka le pisake." ¹⁴ Le hoe i Lahilahy raike igne ty hoe:" Tsinontsino zay mihoatre ty meso i Gideona (anadahign'i Joasy), Israelita. Lefa nagnomea aze faharesea teo amireo Midiana, vaho ty miaramilane iaby ty Zagnahare." ¹⁵ Laha fa reign'i Gideona ndraike ty talily nofy vaho ty dika zane, le nihohoke nivavake re. Le nihere tao antombe Israely re ka nanao ty hoe:" Mifohaza! te fa nomea Yaveh anareo tyt faharesea ty miaramila Midiana." ¹⁶ Le zinarane ho vondro telo ty telonjato lahy, naho nomeane trompetra vaho siny foa iereo iaby, miarake amireo fanilo agnate ty siny kirai-kiraike. ¹⁷ Le hoe re tamy iereo ty hoe:" Manentea ahy ka anovo ze ataoko. Henteo! laha fa avy eo amity sisy ty tobe raho, le tsy maintsy hataonareo ze hataoko. ¹⁸ Laha fa mitioke ty trompetra raho, le zaho vaho iaby ze miraike amiko, le tiofo magnodidy ty tobe iaby avao kea ty trompetranareo ka mikoraha ty hoe:' Ho ahy Yaveh vaho Gideona!"' ¹⁹ Le niavy teo antsisy ty tobe ty Gideona vaho ty zato lahy ze niarake tamine, tamity fiatomboha ty agnivo ty lera vatane. Laha teo am-panoloa mpiambe vatane reo Midianita, le tiniogniereo ty trompetra naho vinaky iereo ty siny ty tegne antagna iereo. ²⁰ Nitiofegnireo vondro telo reo trompetra naho vinakine reo siny. Nitana iereo tamity tagna ankavia reo fanilo naho tamity tagna havana kea reo trompetra mba hitiofa zay. Le nikorake mafe iereo ty hoe:" Ty meso Yaveh vaho i Gideona." ²¹ Nitsanga nagnodidy ty tobe tamity fitobohane iaby ty lahilahy Midiana iaby. Le nikai-kaike iereo naho lasa nilay. ²² Laha fa nitiofegniereo ty trompetra telonjato, le natao Yaveh nifagnisy tamity meso reo Midianita vaho ty namane naho ty tafine iaby. Le nilay zisikagne Beti-Sita zisikagne Zereraha ty miaramila, zisikagne amity faritane Abela-mehola, agnila i Tabata. ²³ Kinaine mafe reo lahilahy Israely bakagne Naftaly, Asera, naho Manase iaby, naho nagnia ty Midiana iereo. ²⁴ Le nagnirake mpinday talily nagnera ty tane tazoa i Efraima iaby Gideona, nanao ty hoe:" Mindehana mizotro handietse ty Midiana ka araho maso ty rano i Jordana, zisikagne Beti-bara, mba hampidranogna iereo." Le niarake nivory ty lahilahy Efraima iaby ka nagnara maso reo rano, zisikagne Beti-bara vaho ty renerano Jordana. ²⁵ Voatsepa iereo ty roandria Midiana roe, Oreba vaho Zeba. Nivonoe iereo tagne amity vatolampy i Oreba ty Oreba, naho nivonoe iereo tagne amity fameaham-boalobok'i Zeba ty Zeba. Le nagnia ty Midiana iereo, naho niente iereo teo amy Gideona ty loha i Oreba vaho i Zeba, ty tagne amity lafine raike hafa i Jordana.