¹ Tafara Abimeleka, Tola ana i Poa ana i Dodo, lahilahy bakagne Isakara ty nitoboke tagne Samira, tagne amity tane tazoa Efraima, nitsanga mba hagnafake Israely ² Nitsara ty Irsaely zisike ty telo amby roapolo tao re. Mate re naho naleve tagne Samira. ³ Nilimbease Jaira iaze Gileadita re. Nitsara ty Irsaely zisike ty roe amby roapolo tao re. ⁴ Nanagnanake telopolo lahy ty nitikitre borike telopolo re, naho nana tana telopolo iereo, ty atao ty hoe Havota-jaira zisike androany, tagne amity tane i Gileada iereo. ⁵ Mate ty Jaira naho naleve tagne Kamona. ⁶ Nagnampe ty raty ze natao iereo teo amaso Yaveh ty vahoake Israely naho nanompo reo Bala, reo Astarta, reo zagnahare i Arama, reo zagnahare i Sidona, reo zagnahare i Moaba, reo zagnahare ty vahoake Amona, naho reo zagnahare Filistina. Niala Yaveh iereo naho tsy nagnampo aze sase. ⁷ Nirehetre tamy Israely ty helo Yaveh, naho naviline teo antagna reo Filistina vaho teo antagna reo Amonita iereo. ⁸ Namoteke vaho nampijale ty vahoake Israely iereo tamize tao zay, naho nampijale iereo zisike ty valo amby folo tao ty vahoake Israely iaby ze tagne andafe Jordana tagne amity tane reo Amorita, te agne Gileada. ⁹ Naho le nitsake Jordana mba hialy tamy Joda, tamy Benjamina, naho tamity foko Efraima reo Amorita, mba hampijale mafe Israely. ¹⁰ Le nikaike mafe Yaveh ty vahoake Israely, nanao hoe:" Le fa nanonta taminao zahay, satria nienga ty Zagnaharenay zahay naho nanompo reo Bala." ¹¹ Hoe ty Yaveh tamity vahoake Israely:" Tsy nagnafake anareo tamireo Egyptiana, Amorita, Amonita, Filistina, ¹² naho kea tamireo Sidoniana vao raho? Nampijale anareo reo Amalekita vaho reo Maonita; le nikaike mafe Ahy nareo, naho nafahako tamity here iereo nareo. ¹³ Le mboe niala Ahy ndraike nareo naho nanompo reo zagnahare hafa. Laha zao, tsy hagnampe ty andro hagnafahako anareo raho. ¹⁴ Mindehana naho kaiho mafe reo zagnahare ze nitompoe nareo. Engao iereo hagnavotre anareo laha fa misy hasahira nareo." ¹⁵ Hoe reo vahoake Israely tamy Yaveh:" Nanonta zahay. Anovo aminay na ino ino mete ho soa Aminao. Fa kea, mba avoto rie zahay amity andro toy." ¹⁶ Le nagnafake reo zagnahare tsy ie teo amine iereo naho nanompo Yaveh. Naho tsy zaka Yaveh sase ty fijalea Israely. ¹⁷ Le niarake nivory reo Amonita naho nananga tobe tao Gileada. Le niarake avy reo Irsaelita naho nananga ty tobene tagne Mizpa. ¹⁸ Reo mpitarike ty vahoake Gileada nifampirehake hoe:" Ia ty lahilahy ze hanomboke hialy amireo Amonita? Ho lasa mpitarike reo iaby ze nitoboke tagne Gileada re."