¹ Naho niakatre manahake ty ndaty raike reo ndaty Israely, bakagne Dana ka zisikagne Beri-sheba, agnate zay avao kea ty tane Gileada, naho niarake-nivory teo agnoloa Yaveh tagne Mizpa iereo. ² Reo bey ty vahoake iaby, ty foko Israely iaby, nandrae ty toera iereo tao amity fiangona ty vahoaken'Agnahare__lahilahy 400.000 mindehana tomboke, ze vogno hialy amity meso. ³ Naho rey reo nadty Benjamina fa niakatre tagne Mizpa reo vahoake Israely. Reo ndaty Israely nanao hoe:" Ambarao anay hoe ino ro nahavy ze zaka-raty zao." ⁴ Ty Levita, valin-drampela raike ze vinono, namale hoe:" Nimbaeo Gibea agne amity faritre i Benjamina raho, izaho vaho ty valiko, mba handany ty hale. ⁵ Zisike ty hale, le nanafike ahy reo mpitarike Gibea, nagnodidy ty tragno naho nikasa ty hamono ahy. Tsinepane vaho naota iereo ty valiko, ka mate re. ⁶ Nalaeko ty valiko naho tinampantampako ty vatane, naho nalefako tagne amity faritre ty lova Israely kirai-kiraike reo, satria nagnantanterake haratia vaho fintohigna manahake zay tagne Israely iereo. ⁷ Amizao, nareo Israelita iaby, ameo ty dinenareo naho manoroa hevetre etoa." ⁸ Niarake-nitsanga manahake ty ndaty raike ty vahoake iaby, naho hoe iereo hoe:" Tsy hisy aminay hombeo amity tragnone, naho tsy hisy aminay hihere ao antragnone! ⁹ Fa amizao kea le zao ro tsy mainsty ataontika Gibea: hanafike iereo arake ty hitariha ty filoka antika tika. ¹⁰ Hangalake lahilahy folo amity zato magnera ty foko Israely iaby tika, vaho zato amity arivo, naho arivo amity ray ale, mba hangalake vatse ho ahy reo ndaty reo, ka laha fa niavy tagne Gibea agne Benjamina iereo, le hosazie amity raty ze natao iereo tagne Israely." 11Laha zao le niharo handietre ty tana, manahake ty ndaty raike, reo miaramila Irsaely iaby. ¹² Nandefa lahilahy tagne amity foko i Benjamina reo foko Irsaely, nanao hoe:" Ino ze raty nataonareo teo aminareo zao? ¹³ Laha zao, ameo anay reo lahilahy raty fagnahy agne Gibea reo, mba hamonoanay aze ho mate reo, naho mba hagnafahanay vatane ze raty zay amy Israely." Fa i Benjamina le tsy te-haharey ty reha reo rahalahine, reo ndaty Israely. ¹⁴ Naho niarake-nivory ty tana reo ndaty Benjamina mba hivogno hialy amity ndaty Israely. ¹⁵ Naho niarake-raike bakao amity tana iereo ty ndaty Israely mba hialy amity miramila enegnarivo vaho roe ale ze le fa voaofa hialy amity meso. Ankotre zay, le nisy lahilahy fitonjato voafily bakamireo vahoake Gibea. ¹⁶ Teo amireo miaramila iaby le nisy lahilahy fito arivo ze havia. Ty kirai-kiraike tamiereo le mahavita mitorake silam-bolo amity vatom-pilatse ka tsy mihere. ¹⁷ Ty vahoake Israely, laha tsy isafe reo bakamy Benjamina, le misake 400.000 ndaty, ty voaoma hialy amity meso. Reo iaby le lahilahy mpialy. ¹⁸ Nitsanga reo ndaty Israely, nindeha tagne Betela, naho nangatake torohevetre tamin'Agnahare; Nagnontane iereo hoe:" Ia ro hanafike voalohane reo ndaty Benjamina ho anay?" naho Yaveh nanao hoe:" Joda ro hanafike voalohane." ¹⁹ Nifoha maray reo ndaty Israely naho namindra ty tobene agnila Gibea. ²⁰ Niakatre hialy amy Benjamina reo ndaty Irsaely. Nametrake reo toera amity aly tagne Gibea iereo. ²¹ Niakatre bakagne Gibea reo ndaty Benjamina, naho namono lahilahy ty tafike Israely roa arivo vaho roe-ale tamize andro zay. ²² Fa nagnamafe vata ty ndaty Israely naho namoro filahara teo amity toera ze nilahara iereo tamity andro voalohane iereo. ²³ Naho niakatre reo ndaty Israely ka nitagny teo agnoloa Yaveh zisike hariva ty andro iereo, naho nipay lala tamy Yaveh iereo. Hoe iereo hoe:" Feie vao tokone hindeha hialy amireo rahalahinay zahay, reo ndaty Benjamina?" Naho Yaveh nanao hoe:" Tafiho iereo!" ²⁴ Ka nindeha nandietse reo miaramila Benjamina reo ndaty Israely ty andro faharoe. ²⁵ Tamity andro faharoe, le niakatre nandietse iereo tagne Gibea Benjamina naho namono lahilahy valo arivo vaho ray ale bakamity ndaty Israely. Iereo iaby le lahilahy voaoma hialy amity meso. ²⁶ Le nindeha niakatre ho agne Betela iaby reo miaramila Israely vaho reo vahoake iaby ka nitagny, naho nitoboke teo agnoloa Yaveh tagne iereo naho nifaly hane zisike hariva tamize andro zay naho nanolotre fagnatetre oroa vaho fagnatem-pilongoa teo agnoloa Yaveh. ²⁷ Nagnontane Yaveh reo ndaty Israely__satria tagne ty tomabile ty fagnenkean'Agnahare tamize andro zay, ²⁸ naho nanompo teo agnoloa ty tomabile ty Fineasy ana i Eliazara anadahy Arona tamize andro zay__"Tokone hiakatre hialy amity ndaty Benjamina, rahalahinay, ndraike vao zahay sa hijano?" Hoe Yaveh hoe:" Tafiho, satria hagnampe anareo handrese iereo Raho hamaray." ²⁹ Ka le nametrake ndaty tagne amity toera mihaja nagnodidy Gibea ty Israely. ³⁰ Nialy tamireo ndaty Benjamina reo ndaty Israely tamity andro fahatelo, naho nametrake ty filaharan'aly nandietse Gibea iereo arake ze la fa nataone taloha. ³¹ Nandeha ka nialy tamireo vahoake ty ndaty Benjamina, naho voaroake niala ty tana iereo. Nanomboke namono ty ilane tamireo vahoake iereo. Teo amity ndaty Israely telopolo teo ro mate tagne ambaibo vaho tegne andala. Ty raike tamireo lala le niakatre nimbaeo Betela, naho ty raike hafa le nimbaeo Gibea. ³² Le hoe ty ndaty Benjamina hoe:" Rese iereo naho nilay lavitre antika, manahake ty tamity voalohane avao." Feie hoe reo miaramila Israely hoe:" Andao tika hilay hihere ka handroake iereo hiala amity tana ho egne andala." ³³ Le nitsanga bakeo amity toera iereo ty ndaty Israely iaby naho nanao filaharan'aly tagne Bala-tamara. Le nilay niakatre bakao amity toerane reo miaramila Israely ze nihaja tao amity toera fihaja tao Mare-gibea. ³⁴ Io nisy lahilahy voamare ray ale bakagne Israely niakatre handietse GIbea, naho nafana ty aly, fa tsy nahay reo Benjamita fa nanany iereo ty loza. ³⁵ Nandrese i Benjamina teo agnoloa Irsaely ty Yaveh. Tamize andro zay, le nahafate ndaty Benjamina 25.100 reo miaramila Irsaely. Reo iaby mate le iereo ze le fa voaoma hialy amity meso. ³⁶ Naho hisa reo miaramila Benjamina fa rese iereo. Nagnomea lala Benjamina reo ndaty Israely, satria natoky reo ndaty ze natobo iereo tagne amity toera fihaja tagne ambaly Gibea iereo. ³⁷ Le nitsanga reo lahilahy nihaja ka nimbaeo Gibea malaky, naho tamity meso iereo ro namonoane ty ndaty iaby ze nitoboke tao antana. ³⁸ Ty famantara nifagnaraha teo amireo miramila Israely vaho reo lahilahy nihaja ambalike le hisy rahon-deboke bey hiakatre bakao antana. ³⁹ Laha fa lasa ty famantara le nilavo lefo tamity aly reo miramila Israely. Naho nanomboke nanafike Benjamina ka nahafate ndaty Israely eo amity telopolo, naho hoe iereo hoe:" Azo antoke fa rese eo agnoloantika iereo, manahake ty tamity aly voalohane." ⁴⁰ Laha fa nanomboke nisy raho niakatre bakao amity tana, le nitolike reo Benjamita ka nahisake deboke nagnambone amity lagnitse bakeo amity tana iaby. ⁴¹ Le nivalike tamiereo ty ndaty Israely. Natahotse reo lahilahy Benjamina, fa hita iereo fa avy amiereo ty loza. ⁴² Laha zao le nilay ty ndaty Israely iereo, nilay tagne amity lala mbaeo agnefetre. Nefa nahatratre iereo ty aly. Niakatre ty tana reo miaramila Irsaely ka nahafate iereo tegne amize nitsanganane. ⁴³ Nagnodidy reo Benjamina iereo, nanao haza-lambo iereo naho nanoseke iereo tagne Noaha, tagne amity lala ty ilane antignana Gibea. ⁴⁴ Valo arivo vaho ray ale ro ndtay mate bakao amity foko Benjamina, iaby tamiereo le lahilahy niavake tamity aly. ⁴⁵ Nihodike iereo naho nilay nimbaeo agnefetre tagne amity vatolampy Rimona. Nahafate ndaty dime arivo hafa tamiereo ty Israelita tegne andala. Nagnia iereo zisikagne iereo, naho nagnorike iereo avao tagne andala mbaeo Gidoma, naho tagne ro namonoa iereo ndaty roa arivo ilane. ⁴⁶ Dime arivo vaho roe ale reo miramila Benjamina iaby lavo tamize andro zay__le lahilahy ze voaoma hialy amity meso; iereo iaby le nihafa tamity aly. ⁴⁷ Nefa lahilahy enenjato ro nihody ha nilay tagne agnefetre, nimbaeo amity vatolampy Rimona. Nitoboke tagne amity vatolampy Rimona zisike ty efe-bola iereo. ⁴⁸ Nihere handietse reo ndaty Benjamina reo miramila Israely naho nanafike vaho namono iereo__ty tana iaby, reo biby hare, naho reo zaka iaby ze hita iereo. Noroa iereo avao kea reo tana iaby tegne amity lala iereo.