¹ Naho ty lahilahy Israely nanao fampagnantegna tao Mizpa hoe:" Tsy hisy amintika hagnomea ty anakampelane hanambaly Benjamita." ² Le nimbaeo Betela ty vahoake ka nitoboke tagne teo agnoloan'Agnahare zisike hariva, naho nitagny mafe tamity feo abone iereo. ³ Hoe iereo nikaike mafe:" Nagnino, ry Yaveh, Zagnahare Israely, ro le niseho tamy Israely zao, ha tsy eto aminay sase ty raike amireo fokonay amizao?" ⁴ Nifoha maray ty vahoake ty tehamaray igne ka nagnore alitara teo naho nanolotre fagnatetre oroa vaho fagnatem-pilongoa. ⁵ Hoe ty vahoake Israely hoe:" Ia taminareo foko Irsaely ro tsy niakatre tao amity fiangona tagne amy Yaveh?" Satria nanao fampagnantegna bey vatane iereo mikasike ty ndaty ze tsy niakatre teo amy Yaveh tagne Mizpa. Hoe iereo hoe:" Tena hovonoe ho mate re." ⁶ Nana fiferenaigna tamy Benjamina rahalahine iereo ty vahoake Israely. Hoe iereo hoe:" Rava tsy ho eo amity Israely ty foko raike amizao. ⁷ Ia ro hagnomea valy reo sisa tavela, satria le fa nanao fampagnantegna tamy Yaveh tika fa tsy hagnenga iereo hanambaly reo anakampelantika?" ⁸ Hoe iereo hoe:" Ia tamireo foko Israely ro tsy niakatre tagne amy Yaveh tagne Mizpa?" Hay fa nisy ndaty niavy tao amity fiangona ty bakagne Jabesy Gileada. ⁹ Fa laha fa nindeha tamity fomba soa ty vahoake, ingo, tsy nisy niavy teo reo vahoake Jebesy Gileada. ¹⁰ Nagnirake roe arivo vaho ray ale tamireo lahilahy bey herim-po vatane miarake amity torohevetre ty fiangona mba hindeha agne Jabesy Gileada ka hanafike iereo, naho hamono iereo, egne fa na le ty kolo aman'ampela aza. ¹¹ "Zao ro anovo:tsy maintsy vonoenareo ty lahilahy iaby vaho ampela iaby ze le niarake niroro tamina-lahilahy." ¹² Nahisake ajampela efajato ze mboe tsy niarake-niroro tamina-lahilahy tamireo velo tao Jabesy Gileada reo lahilahy, ka niente iereo tagne antobe tagne Silo, tagne Kanana iereo. ¹³ Nandefa talily tamireo vahoake Benjamina ze tagne amity harambato Rimona ty fiangona iaby fa nanolotre filongoa ho ahy iarei iereo. ¹⁴ Nihere tamize androm zay reo Benjamina naho nagnomea iereo ty ampela Jabesy Gileada, nefa tsy ampe ho aze iaby reo ty ampela. ¹⁵ Nanegne tamize niseho tamy Benjamina ty vahoake, satria zinara Yaveh reo foko Israely. ¹⁶ Le hoe reo mpitarike ty fiangona hoe:" Hataontika akore ty hagnomea valy ho ahy reo Benjamita ze sisa tavela, satria le fa vinono reo ampela Benjamina?" ¹⁷ Hoe iereo hoe:" Tsy maintsy misy lova ho ahy reo sisa velo Benjamina, mba tsy hisy foko voarava amy Israely. ¹⁸ Tsy afake magnomea valy bakamireo anakampela ho ahy iereo zahay, satria nanao fampagnantegna reo vahoake Israely hoe:' Voaozo ze magnomea valy i Benjamina." ¹⁹ Le heo iereo hoe:" Hainareo fa isan-tao le misy andro fifalea ho ahy Yaveh agne Silo(avara Betela, antignana ty lala miakatre bakagne Betela mbaeo Sekema, naho antimo i Lebona)." ²⁰ Nandily reo lahilahy Benjamina iereo, nanao hoe :" Mindehana ka mihaja naho mandignasa ao amity tanem-boaloboke. ²¹ Mandignasa ty andro ze hiakara reo ajampela bakagne Silo handihy, le miakare malaky bakao amity tanem-boaloboke ka mitsebaha valy bakamireo ajampela bakagne Silo ty kirai-kiraike aby aminareo, bakeo le miheregna agne amity tane Benjamina. ²² Laha fa niavy handietse antika reo rae iereo na reo anadahy iereo, le hirehake tika hoe:' Anoro famindran-gnarofo zahay! Engao iereo hijano satria tsy mba nahazo valy ho ahy ty lahilahy kirai-kiraike zisike ty aly zahay. Tsy manan-tsiny nareo, satria tsy nameanareo iereo ty ananareo ampela." ²³ Natao ty vahoake Benjamina zay. Nalae iereo tamireo ajampela ze nandihy ty isa ty valy ze pinay iereo ka le niente iereo ho valine iereo. Lasa iereo naho nihere tagne amity toeran-dova iereo. Naleo iereo ndraike ty tana vaho nitoboke tao amizay. ²⁴ Le niala ze toera zay ka nindeha noly ty vahoake Israely, sambe agne amity foko vaho ty longone iaby, naho sambe agne amity lovane iaby. ²⁵ Tsy nisy mpanjaka tao Israely tamize andro zay. Sambe nanao ze mare teo amasone ty ndaty iabike.