¹ Tamize andro zay, laha fa tsy nisy mpanjaka tao Israely, le nisy lahilahy raike, Levita, nivahiny tagne amity faritre lavitre vatane tamity tane tazoa Efraima. Nangalake ampela hoaze re, vaditsindrano bakagne Betlehema Joda. ² Nefa tsy tokam-po tamine ty vaditsindranone; niala aze rampela naho nihere tagne antragnon-draene tagne Betlehema Joda. Nijano tagne efa-bola re. ³ Naho niare ty valine ka nagnorike aze mba hanambetambe aze holy. Niarake tamine ty mpanompone, vaho ty ampondra roe. Le nientene tagne antragnon-draene re. Laha fa nahisake aze ty rae ty jampela, le fale re. Ty rafozan-dahine, ⁴ ty rae ajampelay, le nanambetambe aze mba hijano telo andro. Nisakafo vaho nino iereo, naho nandany ty haleke tao. ⁵ Nifoha aloha iereo tamity andro fahaefatre, naho nivogno ty hindeha re, kanefa ty rae ty ajampela nirehake tamity vinanto-lahine hoe:" Mihinana mofo hey riha, le mahazo mindeha nareo bakeo." ⁶ Le nitoboke iereo roe ka niarake-nihina vaho nino. Naho hoe ty rae ty ajampela hoe:" Mba metea hanadany ty hale naho mifalea." ⁷ Laha fa nifoha mba hindeha ty Levita, le nisere aze hijano ty rae ty ajampela, nagnova ty hevene re laha zao naho nirorro tao ndraike. ⁸ Tamity andro fahadime le nifoha aloha mba hindeha re, fa ty rae ty ajampela nirehake tamine hoe:" Mihinana hey areke, naho mandignasam-pihila ty andro." Naho le nisakafo iereo roe. ⁹ Laha fa niare mba hindeha ty Levita vaho ty valine naho ty mpanompone, le nirehake tamine ty rafozan-dahine, ty rae ty ajampela hoe:" Ingo, mihariva avao ty andro, naho mifalea. Afake mifoha aloha nareo hamaray naho mindeha moly." ¹⁰ Fa ty Levita tsy vogno ty hiroro. Niare re naho nindeha. Nimbaeo Jebosa re(Jerosalema zay). Nana ampondra nisy lasele roe re_naho niarake tamine ty valine. ¹¹ Laha fa niharine i Jebosa iereo, le fa hohariva ty andro, naho ty mpanompo nanao tamity tompone hoe:" Andao, hindeha tika ao antana reo Jebosita naho hiroro ao amine." ¹² Hoe ty tompone tamine hoe:" Tsy hivio amity tana ty vahiny ze tsy agnate ty vahoake Israely tika. Hombaeo Gibea tika." ¹³ Ty Levita nirehake tamity ajalahy hoe:" Andao, hindeha tika ho agne amity raike amireo toera hafa, naho handany ty hale agne Gibea na Rama." ¹⁴ Le nindeha iereo, naho nitsofotre ty andro laha fa narine Gibea iereo, ao amity faritane Benjamina. ¹⁵ Nivio tao iereo naho niroro tao Gibea. Nindeha iereo naho nitoboke teo ankianja ty tana, fa tsy nisy ndaty na raike nandrambe iereo ty hale. ¹⁶ Fa bakeo le nisy lahilahy antetre raike noly baka niasa tagne ambaibo ty hariva ay. Bakagne amity tane tazoa i Efraima re, naho nivahiny tao Gibea. Nefa ty ndaty nitoboke teo amity toera le Benjamita. ¹⁷ Nagnakatre ty masone re naho nahisake ty mpindeha baka lavitre teo an-kianja ty tana. Hoe ty ante-dahy hoe:" Ho aia nareo? Naho bakaia ty niavianareo?" ¹⁸ Ty Levita nirehake tamine hoe:" Andala bakagne Betlehema Joda ho agne amity faritre lavitre vatane amity tane tazoa Efraima, ty niboahako zahay. Nimbaeo Betlehema Joda raho, naho hindeha ho agne antragno Yaveh, nefa tsy hisy ndaty handrambe ahy. ¹⁹ Mana mololo vaho sakafo ho ahy ty ampondranay zahay, naho misy mofo vaho divay ho ahy vaho ho ahy reo mpanompo-vavenao aty, naho ho ahy ty ajalahinao miarake amireo mpanomponao. Tsy misy zaka-manahira anay." ²⁰ Le nanalama iereo ty ante-dahy hoe:" Ho aminareo ty fiadagna! Izaho ro hiantoke ty zaka-paienareo iaby. Fa ko miroro eto ankianja avao." ²¹ Ka le niente ty lahilahy tagne antragnone ty Levita naho nomeane sakafo reo ampondrane. Nanasa ty tombone iereo naho nihina vaho nino. ²² Laha mboe nampifale ty arofone iereo, le nisy lahilahy maromaro tao an-tana, lahilahy tsy soa, nagnodidy ty tragno, namofoke ty varavara. Nirehake tamity ante-dahy, ty tompon-tragno iereo, nanao hoe:" Akaro ty lahilahy ze niavy ao antragnonao, fa hiarake-hiroro amine zahay." ²³ Niakatre ty lahilahy, tompon-tragno, naho nirehake tamiereo hoe:" Aha, ry rahalahiko, ko manao ze zaka-raty zao tompoko! Satria vahiny ato antragnoko lahilahy io, ka ko manao ze zaka-faly zao! ²⁴ Ingo, ato ty anako ampela verijine vaho ty valine. Magnenga ahy hinday iereo hiakatre zao. Aolagno vaho anovo amiereo ze teanareo hatao amine. Fa ko manao zaka-faly hoe zay amio lahilahy io!" ²⁵ Kanefa tsy nidranjy iereo lahilahy, ka le tsinepa ty lahilahy ty valine naho nakarene teo amiereo re. Nitsepake aze iereo, nagnoloa aze, naho nagnararaotre aze zisike ty hale, naho nenga iereo hindeha re laha maraimbey. ²⁶ Laha fa maraimbey le niavy rampela naho nitonta teo ambaravara tyn tragno ty lahilahy ze nisy ty tompone re, naho le nitsiora teo re zisike ty nazava ty andro. ²⁷ Nifoha ty tompone naho maranidray naho namoha ty varavara ty tragno ka niakatre hanohy ty lalane. Nahisake ty valine nitsake teo ambaravara re, naho ty tagnane teo antokonam-baravara. ²⁸ Le heo ty Levita tamine hoe:" Mifohaza, ndao tika hindeha." Nefa tsy nisy namale. Nasampene teo amity ampondra re, naho nindeha holy agne amine ty lahilahy. ²⁹ Laha fa niavy tagne antragnone ty Levita, le nangalake meso re, naho niraesene ty valine, naho pinotene, isan-taola, ho roe amby folo teteke, naho nampindesene zay nagnera ty Israely iaby. ³⁰ Iaby ze nahisake zay le nirehake hoe:" Zaka mboe tsy nisy nanao na nahisake zisike ty andro niakara Israely bakagne amity tane Egypta zisike androany zao. Dineho zay! Toro-hevetre zahay! Ambarao anay ze tokone hatao!"