¹ Tamize andro zay le mboe tsy nisy mpanjaka tao Israely. Nipay faritre hitoboha ty foko reo tarana Dana, satria tamize andro zay le tsy nahazo lova tamireo foko Israely vatane iereo. ² Nagnirake lahilahy dime tamireo ndaty maro bey tao amity foko iereo ty vahoake Dana, lahilahy ze mpialy le fa za-draraha bakamy Zora vaho Estaola, mba hindeha ndeha antomboke amity tane, naho hagnente zay. Hoe iereo tamiereo hoe:" Mindehana ka henteo ty tane." Niavy tagne amity tane tazoa Efraima iereo, tagne amity tragno Mika, ka nijano tao iereo ty hale. ³ Laha fa nagneneke ty tragno Mika iereo, le nahay ty fireha ty ajalahy Levita. Ka nijano iereo naho nagnontane aze hoe:" Ia ro ninday anao tatoy? Ino ro ataonao atoy amity toera toy? Nagnino riha ro eto? " ⁴ Hoe re tamiereo hoe:" Zao ro natao i Mika tamiko: Kinaramane ho lasa mpisoro raho." ⁵ Hoe iereo tamine hoe:" Mba agnontaneo rie ty heven'Agnahare, mba hahaianay laha hosoa ty lia ze ombanay." ⁶ Hoe ty mpisoro tamiereo hoe:" Mindehana ampiadagna. Hitarike anareo amity lala tokone hombanareo Yaveh." ⁷ Naho lasa reo lahilahy dime ka niavy tao Laisy, naho nahisake iereo fa nivelo ampilamina ty vahoake, manahake ty fomba niaigna reo Sidoniana, tsy voakoronta vaho voaaro. Tsy nisy nambabo na nampijale iereo tamity fomba iaby tao amity tane. Nitoboke lavitre reo Sidoniana iereo naho tsy nana fahazara taminia ia. ⁸ Nihere tagne amity fokone agne Zora vaho Estola iereo. Le nagnontane iereo ty longone hoe:" Ino ro entenareo?" ⁹ Hoe iereo hoe:" Avia! Andao hanafike iereo! Le fa hisanay ty tane naho vatane soa zay. Tsy hanao na ino ino vao nareo? Ko maleme hanafike vaho hangalake ty tane. ¹⁰ Laha fa mindeha nareo, le hoavy agne amity vahoake ze midineke fa tsy mana fisalasala iereo, naho mivelatre ty tane! Nomean' Agnahare anareo zay__le toera raike ze tsy ahisaha tsy hamaroa amy tane eo." ¹¹ Nisy enenjato lahy bakamity foko i Dana, mitana zaka-fialia, niakatre bakagne Zora vaho Estaola. ¹² Niakatre iereo naho nitobe tao Kiriata-Jearima, ao Joda. Zay ro antone anaova ty ndaty io toera hoe Mahane-dana zisikezao; ao ahandrefa i Kiriata-Jearima zay. ¹³ Niala tao nimbaeo amity tane tazoa Efraima iereo naho niavy tao amity tragno Mika. ¹⁴ Le hoe reo lahilahy dime ze nindeha mba miodikondy tagne amity firene Laisy tamireo longone hoe:" Hainareo vao fa ato amity tragno toa le misy efoda, terafima, saren-jaka voasokitre, naho saren-jaka anidina? Ka manampaha-hevetre amizao ty amize hataonareo." ¹⁵ Ka nivio tao iereo naho niavy tagne amity tragno ty ajalahy Levita, tao antragno Mika, naho nanalama aze iereo. ¹⁶ Naho reo Danita enenjato, nana zaka-fialia, le nitsanga teo amity filira amity vavahady. ¹⁷ Reo Lahilahy dime ze nindeha hisafo ty tane le nimbaeo naho nangalake ty saren-jaka voasokitre, ty efoda, reo terafima, naho ty saren-jaka anidina, laha nitsanga teo amity filira eo amity vavahady niarake tamity lahilahy enenjato minday zaka-fialia ty mpisoro. ¹⁸ Laha fa nimbaeo amity tragno Mika reo ka nangalake ty sare anidina, efoda, reo zagnahare ty tokantragno, naho ty saren-jaka voasokitre, le hoe ty mpisoro tamiereo hoe:" Ino ze ataonareo zao?" ¹⁹ Hoe iereo tamine hoe:" Mitsigna! Anovo eo amity vavanao ty tagnanao naho andao hiarake aminay, naho ho raenay vaho mpisoronay riha. Soa kea ho anao vao ty ho mpisoro ho ahy ty tragno ty lahilahy raike, sa mpisoro ho ahy ty foko raike vaho foko iaby raike ao Israely?" Fale ty arofo ty mpisoro. ²⁰ Nalaene ty efoda, reo terafima, vaho ty saren-jaka voasokitre, naho lasa nagnorike ty vahoake re. ²¹ Le nitolike iereo naho lasa. Natao iereo teo alohane reo kolo malineke, hoe zay kea reo biby hare vaho ty fanagnaiereo. ²² Laha fa lavitre soa ty tragno Mika iereo, le niarake-kinaike reo lahilahy ze tao amireo tragno agnila ty tragno Mika, naho tratre niarake tamireo Danita iereo. ²³ Nikaike mafe reo Danita iereo, le nitolike iereo naho nirehake tamy Mika hoe:" Nagnino nareo ro niarake-kinaike?" ²⁴ Hoe re hoe:" Nangalarenareo reo zagnahare ze namboareko, nalaenareo ty mpisoroko, naho lasa nareo. Ino sisa ro tavela ho ahike? Ino ro hiafahanareo magnontane ahike hoe:' Ino ro mahasosotre anao?" ²⁵ Hoe ty vahoake Dana tamine hoe:" Tsy tokone hagnenga anay haharery iaby ze rehafenao riha, laha tsy zay le hisy ndaty meloke vatane hanafike anao, naho ho vonoe riha vaho ty fokonao." ²⁶ Naho nanohy ty lalane reo vahoake Dana. Laha fa hisa Mika fa mafe loatre ho aze iereo, le niotake re naho nihere tagne antragnone. ²⁷ Nalae ty vahoake Dana ze natao Mika, hoe zay ty mpisoro, naho niavy tao Laisy iereo, tagne amity vahoake ze tsy voaelengele vaho tsy mana fisalasala ka namono iereo tamity meso iereo naho nagnoro ty tana. ²⁸ Tsy nisy na ia ia nagnavotre iereo satria lala lavitre Sidonia zay, naho tsy nana fahazara taminia ia iereo. Tagne amity baibo ze agnila Beti-rehoba zay. Nagnere nagnore ty tana reo Danita ka nitoboke tao. ²⁹ Nomea iereo ty agnara hoe Dana ty tana, agnara Dana razambey iereo, ty raike amireo anadahy Israely. Fa Laisy ro agnara nahazatre ty tana. ³⁰ Natoka ty vahoake Dana ho ahy iereo ty saren-jaka voasokitre. Jonatana ana i Gersoma, ana i Mosesy, re vaho reo anadahine le sambe mpisoro ty foko reo Danita zisike ty andro nahazoa ty tane. ³¹ Naho le nanompo ty saren-jaka voasokitre ze natao i Mika iereo zisike ty andro naha-tao Silo ty tragnon'Agnahare.