¹ Tamy ze fptoa zay le namea ndre Ahasoerosy Mpanjaka andre Estera Mpanjaka ampela ty hanagna ndre Hamana, iaze fahavalo ty Jiosy, vaho Mordekay nanomboke nanompo tagnoloa ty mpanjaka, fa nivolagne ndre Estera tamy mpanjaka ty fomba nifandrambesa Mordekay tamine. ² Nafaha ty mpanjaka ty peratse tombo-kasene, ze nalaene ndraike tamy Hamana, vaho natolone andre Mordekay zay. Nitingy andre Mordekay ho mpiandraikitse ty hanagna i Hamana ty Estera. ³ Le nivola tamy mpanjaka ndraike ty Estera. Niondreke tamity tane reke ka nitagny laha nangatake tamine ty mba hagnafoagna ty heve-dratine ty Hamana iaze Agagitay, amity teteke ze nidinihene handiera reo Jiosy. ⁴ Le nitingy andre Estera tamity fitogno volamena ty mpanjaka, le niare reke vaho nitsanga nagnoloa ty mpanjaka. ⁵ Hoe reke tihoe: "Laha to ty mpanjaka, vaho laha nahisake fitea tamasonao raho, laha mare agnoloa ty mpanjaka eo zay, vaho mahisake hato amasognao eo, le ao ho sorate ty lily mba hagnafoa reo taratasy nisorate ndre Hamana ana i Hamedata Agagita, reo taratasy ze nisoratene mba hamono reo jiosy ze agne amy reo faritatane ty mpanjaka iaby. ⁶ Fa hataoko akore ro fagnete ty loza miseho amity vahoako? Hataoko akore ty haharetse hanente ty fandrava reo longoko?" ⁷ Nivola tamy Esterta mpanjaka naho tamy Mordekay iaze Jiosy ty Ahasoerosy mpanjaka tihoe: "Ingo, fa nameako andre Estera ty tragno Hamana, vaho nahanto gniereo tamity hetae fagnatogna reke, satria nindeha nagnafike reo jiosy. ⁸ Manorata lily hafa amity agnara ty mpanjaka ho ahy reo jiosy ka tom-boy amy peratse ty mpanjaka zay. Fa ty lily ze fa voasoratse tamity agnara ty mpanjaka vaho voatomboke tamity peratse ty mpanjaka le tsy afake foagna." ⁹ Le voakaike reo mpanora-dala ty mpanjaka tamy ze fotoa zay, tamity vola fahatelo, ze vola ty Sivana, tamity andro fahatelo amby roa-polo ty vola. Ty lily voasoratse le mifogno ze iaby nandilia i Mordekay mikasike reo Jiosy. Izay le nisorate ho ahy reo governoram-paritse, reo governora naho manan-kasy ty faritse ze zisikeo India ka hatragne Etiopia, faritse 127, ho ahy ty isam-paritane nisorate arake ty fivolagnane iaby, vaho ho ahy reo jiosy amity soratse naho fivola gniereo. ¹⁰ Nanoratse tamity agnara i Ahasoerosy Mpanjaka i Mordekay vaho nanomboke izay tamity peratse fitomboan-kase ty mpanjaka. Ty taratasy le nalefane tamity alala ty irake mitiki-tsovaly tsiela fandeha ze nampiasae ho amity fagnompoa ty mpanjaka, nalae tao amity tragnon-tsovaly ty mpanjaka. ¹¹ Nagnomey fahefa reo jiosy isake ty tana ty mpanjaka mba hirae hivory naho hialy mba hiarova ty ay gniereo: mba handripaha, mba hamonoa, vaho mba hamoteha ze herim-pialia bakamy reo vahoake na faritse ze mete hanafike iereo, agnate izay ao reo kolo amanan'ampela, na handrava ty hanagna iereo. ¹² Tokone nahavoa tamy reo faritane ndre Ahasoerosy Mpanjaka iaby zay, amity andro fahatelo ambiny folo amity vola faha-roe ambiny folo, ze volan'Adara. ¹³ Ty dika mitovy tamity lily le tokone naboake ho lily naho naseho am-pahibemaso ho ahy reo vahoake iaby. Reo Jiosy le tokone ho pare hamale fate reo fahavalo gniereo. ¹⁴ Le nitikitse ty sovaline ty mpanjaka ze nampiasae ho amity fanompoa ty mpanjaka irake reo. Nindeha tsy nisy hatak'andro iereo. Naboake bakao amity lapa tagne Sosana avao kea ty lily ty mpanjaka. ¹⁵ Vaho Mordakay niala tagnoloa ty mpanjaka nanao siky fianbena manga naho foty, naho satro-kasy volamena bevata vaho siky lava fognose foty madineke volom-parasy, ka le nikiake naho nifale ty tana ndre Sosana. ¹⁶ Nisy hazava naho hafalea, vaho hafalea naho hasy tamy reo jiosy eo. ¹⁷ Tagne amity faritse kiraidraike naho tagne amity tana kiraidraike, na taia na taia niavia ty lily ty mpanjaka, le nisy hafalea naho haravoa tamy reo jiosy, fanasa naho andro fifalea. Maro tamy reo karaza gnodaty tamity tane ro ninjare jiosy, satria nipoke tamy iereo eo ty taho gniereo jiosy.