¹ Vaho tamity faha roe ambine ty folo ty vola, ze vola ty Adara, tamity andro fahatelo amibine folo, lahafa inge hagnatanterake ty lily naho lily ty mpanjaka, tamity andro ze nanategna gniereo fahavalo ty jiosy hahazoa ty fahefa amy gniereo, le nitsimbalike zay. Ty jiosy ro nanam-pahefa tamy reo ze nalae iereo. ² Le nivory tatanane ao reo Jiosy nagnera reo faretse iaby ndre Ahasoerosy mpanjaka, mba hamango reo ze nidineke hampidi-doza iereo. Kea tsy nisy afaka nitsanga handietse iereo, satria fa nipoke tamy reo vahoake iaby ty taho gniereo. ³ Reo mpandily ty faretse iaby, reo governoram-paretse, reo governora, vaho reo mpanao raraha ty mpanjaka, le nagnampe ty Jiosy satria fa nipoke tamy gniereo eo ty taho ndre Mordekay. ⁴ Fa bevata ty Mordekay tatragno ty mpanjaka, vaho niele nagnera ty faretse iaby ty lazane, fa fa ninjare bevata iaze lahilahy Mordekay. ⁵ Le namango reo fahavalone tamity meso ty Jiosy, namono naho nandany iereo, vaho nanao arake izay to gniereo tamy reo ze nalay aze. ⁶ Nahafate naho nandavo ndaty dimanjato iereo tamity fiarova mafe ndre Sosana. ⁷ Nivonoe gniereo ty Parsandata, Dalfona, Aspata, ⁸ Porata, Adalia, ⁹ Parmasta, Arisay, Ariday, Vaizata ¹⁰ vaho reo anake lahy folo ndre Hamana ana dre Hamedota, iaze fahavalo ty Jiosy. Nefa tsy nandrava hanagna iereo. ¹¹ Andro izay avao le tinatetse tamy mpanjaka agne, ty isa gnireo ze mate tagne amity fiarova mafe ndre Sosana. ¹² Le hoe ty mpanjaka tamy Estera mpanjaka vave tihoe: "Namono ndaty dimanjato tao amity fiarova mafe ndre Sosana ty Jiosy, agnate izay reo anake lahy ndre Hamana folo. Le ino zane ro nanoe gniereo tamy reo faritse ty mpanjaka sisa? Kea amizao ino ro ilaenao? Hamea anao zay. Ino ro fangatahanao? Hamea anao zay." ¹³ Le hoe Estera tihoe: "Laha to ty mpanjaka,le ao ty jisoy ze agne Sosana hahazo alala hagnantaterake ty lily androany toy kea hamaray, vaho ao reo fate ty ana ndre Hamana folo lahy hahanto amity hetae fagnatogna." ¹⁴ Le nandily mba hagnantateraha izay ty mpanjaka. Ty lily le niboake bakao Sosana, vaho nahanto gniereo ty ana ndre Hamana folo lahy. ¹⁵ Le nivory reo jiosy iaby ta Sosanao tamity andro faha-efatse ambiny folo ty vola Adara, kea namono ndaty telonjato fagnapine ta Sosana ao, nefa tsy nandrava hanagna. ¹⁶ Reo jiosy sisa ze tagne amy reo faritse ty mpanjaka kea le niarake mba hiaro ty ay gniereo, ka afake tamy reo fahavalone gniereo vaho namono dima arivo naho fito ale tamy reo ze nalae aze. Nefa tsy mba nikasi-tagna ty harea gniereo ze nivonoe kea iereo. ¹⁷ Tamity fahatelo ambine folo vola Adara ro niseho zay. Tamity andro fahaefatse ambine folo kea le nijano iereo ka nanao zay ho andro fagnasa naho fifalea. ¹⁸ Nefa reo jisy ze tagne Sosana niara-nivory tamity andro fahatelo ambine folo naho ty faha-efatse ambine folo. Tamity andro fahadime ambine folo kea le nijano iereo ka nanoene andro fagnasa naho fifalea izay. Izay ro mahavy reo jiosy amy reo ana-bihitse, ze naore ty tragno gniereo tagne ambanevohitse, miambe ty andro faha efatse ambine folo ty vola Adara ho andro fifalea naho fagnasa, vaho andro ze hifagnolora gniereo fagnomeza ara-kane. ²⁰ Le narake ndre Mordekay an-tsoratse ze iaby zay ka nandefa taratasy ho ahy jiosy iaby ze tagne amity faritse iaby ty Ahasoerosy mpanjaka reke, na lavitse na mariketse, ²¹ handilia iereo hiambe ty andro fahefatse ambine folo naho faha dime ambine folo vola Adara izan-tao. ²² Reo ro andro nafaha ty jiosy tamy reo fahavalone, naho vola ze nivaliha ty alahelo gniereo ho hafalea. Nanoe gniereo andro fagnasa naho fifalea zay, vaho fifagnomeza ara-kane, naho fagnomeza ho ahy ty mahantra. ²³ Le nitohiza ty Jiosy ty fankalaza ze fa natombo gniereo, anova arake ze nisorate ndre Mordekay. ²⁴ Tamy ze andro zay ty Hamana anake lahy ndre Hamedoda iaze Agagitay, iaze fahavalo ty Jiosy iaby, le nanao tete-draty handietse ty Jiosy mba handrava iereo, le nanorake ty ppora reke( na hoe, nanao loka reke), mba handrava naho hamingana iereo. ²⁵ Feie lahafa avy tagnoloa ty mpanjaka ty toe-draraha, le nagnakatse lily an-taratasy reke fa ty tete-draty ze vinetsevetse ndre Hamana handiera ty jiosy le tokone hahanto amity hetae reke reketse reo anane lahy. ²⁶ Kea kinay iereo hoe Porima reo andro reo, bakamity agnara hoe Pora. Naho ze iaby voasoratse tagnate ze taratasy zay, naho ze iaby hisa gniereo vaho ze nahazo iereo, ²⁷ le neke ty jiosy ty fomba aman-panao vaovao raike naho andraikitse. Ze fomba zay le ho ahy iereo, ho ahy reo taranane, naho ze iaby miarake amy iereo. Izay le mba hankalaza gniereo ze andro roe zay isan-tao. Hankalaza izay amity fomba toka amity andro mitovy isan-tao iereo. ²⁸ Reo andro reo le ho ankalazae naho ho ambena isake ty taranake mifamdimbe, isan-pianakavia, isan-paritse, vaho isan-tana. Reo jiosy reo naho ty taranane le tsy hijano ty hiambe am-patokia reo andro ty Porima reo, mba tsy hagnalignoa gniereo izay vatane. ²⁹ Estera mpanjaka vave anak'ampela i Abihaila naho i Mordekay iaze jiosy le nanoratse tamin-pahefa feno ka nagnamafe ty taratasy faharoe mikasike i Porima toy. ³⁰ Taratasy ro nalefa tamity Jiosy iaby tagne amy reo faretse ty fanjaka ndre Ahasoerosy 127, nirarie fandriam-pahalema naho fahitia reo jiosy. ³¹ Reo taratasy reo le nagnamafe reo andro i Parima amy reo fotoa ze nitingina izay, arake ze nandilia ndre Mordekay iaze jiosy naho Estera mpanjaka vave ahy reo jiosy. Le neke iereo jiosy ho ahy ty tegnane ze lily zay naho ho ahy reo tarana gniereo, manahake ze fa nagnenkea gniereo ty fotoa ty fifalean-kane naho ty fitagnia kea. ³² Nagnamafe reo lily mikasike andre Porima reo ty lily Estera, vaho voasoratse tagnate ty boky zay.