¹ Laha hiakatre hialy amity fahavalonareo nareo, ka mahisake reo soavale, reo kalese, naho vahoake maro agnisa noho nareo, le ko matahotre iereo nareo; fa miarake aminareo Yaveh Zagnaharenareo, Re ze ninday anareo niakatre niala ty tane Egypta. ² Ka laha fa mba amity aly nareo, le tsy maintsy hamonje ty mpisoro ha hirehake amity vahoake. ³ Le hirehake amiereo re hoe:" Midranjigna, ry Israely, hialy amity fahavalonareo nareo. Ao tsy ho rerake ty arofonareo. Ko matahotre na mihovitse. Ko matahotre iereo. ⁴ Fa Yaveh Zagnaharenareo ro hiarake hindeha aminareo mba hialy amity fahavalonareo naho mba hamonje anareo. ⁵ Le tsy maintsy hirehake amy vahoake reo manan-kasy ka hanao hoe:" Misy lahilahy vao ao ze nanao tragno vao ka mboe tsy tinoka zay? Ao re hindeha naho hihere agne antragnone, mba tsy ho mate agnaly re ka ho lahilahy hafa ndraike ro hanoka zay. ⁶ Misy lahilahy vao nambole tanem-boaloboke ka mboe tsy nahazo ty voka zay? Ao re holy, mba tsy ho mate agnaly re ka ndaty hafa ndraike ro hahazo ty voka zay. Misy lahilahy vao ao nifamono taminam-pela nefa tsy mboe nanam-baly aze? Ao re holy mba tsy ho mate agnaly ka ho lahilahy hafa ndraike ro hanambaly aze." ⁸ Le mboe hirehake amity vahoake zisikagne reo manan-kasy hanao hoe:" Misy lahilahy vao ao ze matahotre na rerake am-po? Ao re hindeha naho hihere agne antragnone, mba tsy ho kivy manahake ty arofo kea ty arofo ty rahalahine." ⁹ Ka laha fa baka mirehake amy vahoake reo manan-kasy, le tsy maintsy manendre mpifehe hitarike aze iereo. ¹⁰ Laha fa mindeha hanafike tana nareo, le manaova tolom-pilongoa amireo vahoake reo. ¹¹ Laha magnenke ty tolonareo vaho mamoha ty vavahady ho anareo iereo, le ho lasa andevonareo vaho hanompo anareo ty ndaty iaby ze hisake ao. ¹² Fa laha tsy manao tolom-pilongoa aminareo zay, fa hamaky aly aminareo kea, le tsy maintsy hataonareo faherano zay, ¹³ naho laha fa magnomea faharesea anareo Yaveh Zagnaharenareo ka mametrake iereo eo ambane fehenao, le tsy maintsy vonoenareo ty lahilahy iaby ao amity tana ¹⁴ Fa ty ampela kea, reo kolo malineke, ty biby hare, vaho iaby ze ao amity tane, naho ty harea iaby, le halaenareo ho azo ho anareo zay. Le hihina ho azo reo fahavalonareo nareo. ze namea Yaveh Zagnaharenareo anareo. ¹⁵ Izany ro fomba tsy maintsy ataonareo amireo tana iaby ze tena lavitre anareo, le reo tana tsy bakamity tana ty firene magnarake toa. ¹⁶ Ao amity tana reo ndaty ze amea Yaveh Zagnaharenareo anareo ho lovae reo, le tsy azonareo asia velo ze mete ho manam-pofognay. Fa kea, tsy maintsy ravaenareo vatane iereo: ty Hetita, vaho ty Amorita, ty Kananita, ty Perizita, ty Hivita, naho ty Jebosita, arake ze nandilia Yaveh Zagnaharenareo anareo. ¹⁸ Anovo zay mba tsy hagnanara iereo anareo hanao reo fomba raty, arake ze natao iereo tamireo zagnaharene. Laha manao zay nareo, le hanonta amy Yaveh Zagnaharenareo. ¹⁹ Laha fa ela ro hanovanareo faherano tana raike, laha mialy amine nareo mba hahazoa aze, le tsy azonareo tampahe amity famaky reo hetaene. Satria afake mihina bakamireo nareo, zay ro tsy hahazoanareo mamofoke iereo. Fa ndaty vao ty hetae ao ambaibo ro tokone hataonareo faherano? ²⁰ Reo hetae ze hainareo fa tsy hetae fihane avao, ro azonareo simbae vaho azera; hagnore faherano mandietse ty tana ze mialy aminareo nareo, zisike ty hiravane.