¹ Laha fa mandily reo firene Yaveh Zagnaharenareo, reo tane ze amea Yaveh Zagnaharenareo ho anareo, naho laha fa mangalake ty tane iereo naho mitoboke tao amity tana iereo vaho ty tragno iereo nareo, ² le mifilia tana telo ho ahy ty vatanareo eo agnivo ty tanenareo ze namea Yaveh Zagnaharenareo anareo ho fanagna. ³ Magnamboara lala naho zarao ho telo ty faritane nareo, ty tane ze nenga Yaveh Zagnaharenareo ho lovanareo, mba hilay agne iaby ze mamono ndaty-hafa. ⁴ Zao ro lily ho ahy ty ndaty ze mamono olon-kafa naho milay hitoboke agne: na ia ia mamono tsy kinahy ty mpirai-belo amine, naho tsy nalay aze taloha__ ⁵ manahake ty laha fa mbaeo agnala miarake amity mpirai-belo amine mba handily hetae, naho manampake ty hetae amity famaky re, naho miala eo amity tahone ty loha ty famaky ka mahavoa ty mpirai-belo le mate re__le tsy maintsy milay agne amity raike amireo tana reo naho mitoboke agne ze lahilahy zay. ⁶ Laha tsy zay le mete ho horihe ty mpamale lio ty raike ze hagnafake ty fiay, naho ty firehetan-keloke ro haharese, laha bey loatre ty halavira, fofoho re naho vono re, na le tsy soa ty ho mate aza ze lahilahy zay, satria tsy nalay ty mpirai-belo amine re taloha. ⁷ Laha zao mandily anao raho hifily tana telo ho anao. ⁸ Laha magnabey ty efetane nareo ty Yaveh Zagnaharenareo, arake ty le fa nifantane tamireo razambeinareo fa hataone, naho ty tane iaby ze nampagnantegnaine fa hamea ty razambey nareo; ⁹ laha ambenanareo reo lily iaby reo, ze handiliako anareo androany__reo lily mba hotea Yaveh Zagnaharenareo vaho hindeha amity lalane zisikagne, le tokone hagnampe tana telo foloay ho ahy ty vatanareo nareo, hafa reo telo. ¹⁰ Anovo zay mba tsy hisy liogn'ondaty tsy manan-tsiny hipoke eo amity tane ze amea Yaveh Zagnaharenareo ho anareo ho lova, mba tsy ho meloke amity lio nareo. ¹¹ Feie laha misy ndaty malay ty mpiara-belo amine, magnoma hevetre hamonoa aze, mitsangana handietse aze, naho mamere aze mba ho mate, naho laha milay agne amity raike amireo tana reo re__ ¹² le tsy maintsy magnirake vaho mangalake aze hihere bakagne reo olobey ao amity tanane, naho magnomea aze eo antagna ty mpamale fate, mba ho mate re. ¹³ Ao ty masonareo tsy anoro fiferenaigna amine; fa kea, foagno tsy ho eo amy Israely ty vono ndaty tsy manan-tsiny, mba hahasoa anareo. ¹⁴ Ko afaha amity mpiari-belo aminareo ty faman-taran-tane ze napetra iereo andro maro tagne aloha, amity lova ze ho lovaenareo, agne amity tane ze amea Yaveh Zagnaharenareo ho fanagnanareo. ¹⁵ Tsy misy vavolombelo toka tokone hitsanga hita ndaty raike amity heloke iaby, na amity hadisoa iaby, amity zaka nanontane iaby; fa amity vava ty vavolombelo roe, na amity vava ty vavolombelo telo, ro hagnamaregna ty zaka iabey. ¹⁶ Laha atao hoe misy vavolombelo tsy mare raike mitsanga mandietse ndaty mba hitsanga vavolombelo hita aze amity sata-raty. ¹⁷ Naho reo lahilahy roe, ze misy tsy fitovian-kevetre, le tsy maintsy mitsanga eo agnoloa Yaveh, eo agnoloa reo mpisoro vaho mpitsara ze mpanompo tamize andro zay. ¹⁸ Reo mpitsara le tokone hanao ontane laleke; henteo, laha sandoke ty vavolombelo naho laha mitsanga vavolombelo tsy mare amity rahalahine, ¹⁹ le anovo amine ze iriene hatao amity rahalahine; naho hagnafake ty raty eo aminareo nareo. ²⁰ Naho reo ze sisa tavela le haharey vaho hatahotre, naho tsy hanao zaka-raty hoe zay eo aminareo sase manomboke eo. ²¹ Tsy tokone hanoro fandefera ty masonareo; ty fiay ro ho solo ty fiay, maso solo ty maso, nife solo ty nife, tagna solo ty tagna, tomboke solo ty tomboke.