² le tsy maintsy mindeha miakatre reo olobey nareo vaho reo mpitsaranareo, naho tsy maintsy magnametatre reo tana ze magnodidy ty ndaty vinono iereo. ³ Naho reo olobey ty tanam-bey ty agnila ty fate i ndaty igne le tsy maintsy mangalake agnombevave kele bakamity agnombe ao, raike ze tsy mboe nampiasae vatane, naho tsy nisy joka. ⁴ Bakeo le tsy maintsy roahe iereo mizotro amity baibo misy rano mindeha ty agnombe vave kele, baibo ze tsy mboe nasae tamity fangalin'agnombe na nambolea, naho eo amity baibo iereo ro tsy maintsy magnotake ty vozo ty agnombe vave kele. ⁵ Reo mpisoro, foko Levy, le tsy maintsy mamonje marine; satria iereo ro finily Yaveh Zagnaharenao hanompo Aze vaho hitahy ty ndaty amity agnara Yaveh; dranjigno reo tolok'eve iereo, satria ty reha iereo le ho lilim-pitsara amity fifamalea iaby vaho amity famerea. ⁶ Reo ndaty ty tana iaby ze agnila ty ndaty vinono le tsy maintsy manasa ty tagna iereo eo amity agnombe vave kele zay voaotake teo amity baibo ty vozone; ⁷ naho tsy maintsy mamale ty zaka-misy iereo ka manao ty hoe:" Ty tagnanay le tsy nampipoke ty lio, naho tsy nahisake zay ty masonay. ⁸ Mamotora ty vahoake Israelinao, ze le fa navotenao, ry Yaveh, naho ko atao meloke amity fampi-pohan-dio ndaty tsy manan-tsiny ty vahoake Israelinao." Le ho enga ty heloke amity fampi-pohan-dio iereo. ⁹ Amize fomba zay ro hagnafahanao ty lio tsy manan-tsiny eo agnivonao, laha fa manao ze mare eo amaso Yaveh riha. ¹⁰ Laha fa mindeha miakatre hialy handietse reo fahavalonao riha naho Yaveh Zagnaharenao magnomea faharesea anao vaho manao iereo ho eo ambane fehenao, naho mita iereo hoazo riha, ¹¹ laha mahisake ampela soa tarehe eo amiereo riha, naho manam-pagniria amine ka magniry ty hangalake aze ho valinao, ¹² le ho entenao agne antragnonao re; hagnaratre ty lohane re, naho handily ty hohone. ¹³ Naho hagnafake ty akanjo ze nanoane tamie azo re ka hijano ao amity tragnonao naho handala ty raene vaho ty renene zisike ty volane raike. Laha fa baka miroro amine riha naho lasa valine, le ho valinao re. ¹⁴ Fa laha tsy mahazo fagnantrarea amine riha, le hagnenga aze hindeha agne amize iriene homba. Fa tsy azonao atao ty mivarotre azo ho fahazoam-bola, naho tsy azonao atao ty minday aze manahake ty ndevo, satria le fa nagnafa-baraka aze riha. ¹⁵ Laha mana valy roe ty lahilahy raike naho ty raike le tea fa ty raike hejegne, ka sambe niterake kolo ho aze iaby reo roe reo__ty valy tea vaho ty valy heje__laha bakamity heje ty anadahy voalohane, ¹⁶ amity andro ze hampandova ty lahilahy ze hanagnane reo anane, le tsy tokone hanao ty ana ty valy tea ho lahy voalohane aloha ty ana ty valy heje re, ty anake ze lahy voalohane amizao. ¹⁷ Ka kea, tsy maintsy magnenke ze lahy voalohane re, le ty ana ty valy heje, amity alala ty fagnomea aze anjaran-droe amize fanagna iaby; satria io anake eo ro voaloha ty ozane; ka aze ty hazokene. ¹⁸ Laha misy lahilahy raike mana-gnanake mafe-loha vaho mpavande ze tsy mipay ty feo ty raene na ty feo ty renene, naho zay, na le ahiti iereo aza re, le tsy hidranjy iereo; ¹⁹ le tsy maintsy manere aze vaho minday aze miakatre mbaeo amireo olobey ty tanane vaho agne ambavahady ty tanane ty raene vaho ty renene. ²⁰ Tsy maintsy mirehake amireo olobey ty tanane iereo hoe:" Ty anagnay toy le mafe loha vaho mpavande; tsy hagnenke ty feonay re; tea-hane vaho mpinon-toake re." ²¹ Le tsy maintsy mitora-bato aze ho nate iaby ty ndaty iaby ty tanane; naho riha le hagnafake ty raty aminao eo. Ty Irsaely iaby le haharey zay ka hatahotre. ²² Laha nanao hadisoa soa ty mate ty ndaty raike naho vonoe re, ka haraviravinao egne amity hetae, ²³ le tsy azo ajano eo amity hetae zisike ty hale iaby vatane ty fatene. Fa kea, tsy maintsy alevenao amio andro o avao re; satria na ia ia naraviravy le voaozon'Agnahare. Enkeno ty liline mba tsy handoto ty tane ze namea Yaveh Zagnaharenao ho lova riha.