¹ Miara-miasa amine, zahay avao kea le mampirisike anareo tsy handray ty fahasoava ty Andragnahare fahatane. ² Te nitsara reke tihoe: "Tamy ty fotoa mete le nijane anareo Raho, vaho tamy ty andro ty famonjea le nagnampe anareo Raho. Heteo, henanezao ro andro ty famonjea. ³ Tsy mametrake vato filavoa eo agnoloan'ia na ia zahay, te zahay tsy magniry ty haharate laza ty asa fanompoanay. ⁴ Te kea, zahay le magnaporofo ty vatanay amy ty asanay iaby, te mpiasa ty Andragnahare zahaya. Zahay ro mpiasane amy ty fiareta bey, fahoria, fahaterea, fahasarota, ⁵ reo fofoke, fagnagadra, filiera, amy ty asa mafe, amy reo halike tsy torimaso, amy ty hakere, ⁶ amy ty fahadiova, fahalala, fahareta, fahatsoram-po, amy ty Fagnahy Masy, amy ty vatane fitiava. ⁷ Zahay ro mpiasane ao amy ty tsara ty fahamarigna, ao amy ty here ty Andragnahare. Zahay le mana ty fiarova ty fahamarigna ho ahy ty tagna havana naho ty havia. ⁸ Zahay le miasa amy ty hasy naho amy ty hasalara, amy ty fagnaratia naho ty fiantsa. Zahay le voampanga ho mpamitake feie zahay le to. ⁹ Zahay le miasa manahake regne tsy misy mahay regny feie zahay le mboe fanta-daza. Miasa manahake ty ho mate zahay manahake ty saze noho ty asanay feie tsy manahake ty voaheloke ho mate. ¹⁰ Zahay le miasa manahake ty malahelo, feie le mifale lalandava. Zahay le miasa manahake ty mijale, feie le mampanam-panagna ndaty maro zahay. Miasa manahake ty tsay mana na ino na ino zahay feie manahake ty mana ty raraha iaby. ¹¹ Zahay le nitsara ty to iaby taminareo, Korintiana, vaho ty aforonay le mivoha midagnadagna. ¹² Ty arofonareo le tsy nifehezinay, te nareo ro namehe reo fihetseha ty arofonareo manoka. ¹³ Vaho ho valine ara-drarine-mirehake aminareo manahake ty amy ajaja raho voao hidagnadagna ty arofonare. ¹⁴ Ko mifamatotse amy reo tsy mpino. Te ino ro iraisa ty fahamarigna naho ty fandikan-dalàgna? Te ino ro iaraha ty mzava amy ty maike? ¹⁵ Ino ro mete ho fifagnaraha eo amy ndre Kristy naho Beliala? Na ino ro tokone anjara anagna ty mpino raeke naho amy ty tsy mpino raeke? ¹⁶ Vaho ino ro fifagnaraha misy eo amy ty tempoly ty Andragnahare naho ty sampe? Te tika le tempoly ty Andragnahare velo, arake ty fanitalily ty Andragnahare tihoe: "hitoetse eo amy iareo Raho vaho handeha ao amy iareo. Raho le ho Andragnahare iareo vaho Iareo le ho ndatiko." ¹⁷ Noho zay, "Miboaha iala eo amy iareo, vaho mitokagna," nanao tihoe ty Tompo. "Ko mikasike zaka maloto, vaho Raho handrambe anareo. ¹⁸ Raho le ho Rae ho anareo, vaho nareo ho zanadahiko naho anak'ampelako", hoy ty Tompo tsy misy faharoe.