¹ Haintika te laha rava ty fitoboha eto an-tane ze itobohantika, le mana tragno bak'amy ty Andragnahare tika. Zay le tragno tsy natao ty tagna ty ondaty, Te tragno zisikam-parane, agne an-dagnitse. ² Te eto amy toy tragno-lay toy tika ro misento, magniry mafe ty hisike ty fitobohantika agne an-dagnitse. Magnire mafe zay tika satria amy ty fanaovantika ³ zay le tsy hohisake tsy misike tika. ⁴ Te laha mboe eto amy ty tragno-lay toy vatane tika, le mifoay, mavesats'enta. Tsy te hialo tika. Te kea, te hisike tika, soa ho atele ty fiaigna ze mete mate. ⁵ Iaze Raeke ze nagnomagna antika ho amy zay raraha zay loatse le Andragnahare, ze nagnome antika ty Fagnahy ho fagnamabara ze ho ave. ⁶ Noho zay le matoke hatragne. Tongava say te lafa ao an-tragno amy ty vata tika, le lavitse ty Tompo. ⁷ Te mandeha amy ty finoa tika, te tsy amy ty fahisaha. ⁸ Noho zay le managna fahatokia tika. Aleontika lavitse ty vata te ao an-tragno miarake amy ty Tompo. ⁹ Le ataontika tanjo zay, na agne an-tragno tika na lavitse zay, soa hahafinaritse Aze. ¹⁰ Te tika iaby le tsy maintse hiboake eo aloha ty seza fitsarà ndre Kristy, soa mete ahazoa ty kiraikiraike ze mifagnarake amy reo zaka vita tao amy ty vata, na ho amy ty soa na ho amy ty rate. ¹¹ Noho zay, ty fahaiza ty tahotse ty Tompo, ro handreseantika lahatse ty ndaty. ty maha tika antika le hisa ty Andragnahare mavaza. Antegnaiko te mazava amy ty feo ty fieretseretanareo avao kea zay. ¹² Tsy miezake ty handrese lahatse anareo ndraeke zahay soa hagnate anay manahake ty mahite arofo. Te kea, magnome antone ho anreo hirehareha noho ty aminay zahay, soa hagnanareo valin-tene ho anhy reo ze mirehareha ty amy ty tarehe ivelane te tsy ty amy ze ao agn'arofo. ¹³ Te laha vere say zahay, le ho ahy ty Andragnahare zay; vaho laha avy say soa zahay, le ho anareo zay. ¹⁴ te ty fitiava ndre Kristy ro manere anay satria azonay antoke ty tihoe: nisy ndaty raeke mate ho ahy ty iaby, vaho noho zay le mate ty iaby. ¹⁵ Mate Reke ho ahy ty iaby, soa tsy ho velo ho ahy ty vata iareo sase reo ze velo te ho Aze ze mate vaho natsanga noho ty fitiava aiereo. ¹⁶ Noho zay antone zay, manomboke zao le tsy mitsara na ia na ia arake ty fomba ty ondaty tika, na le fa nagnete ahy ndre Kristy manahake zay kea tika taloha. Te henanezao tika le tsy mitsara na ia na ia manahake zay sase. ¹⁷ Noho zay, laha misy ndaty ao amy ndre Kristy, le ndaty vaovao reke. Fa lasa reo raraha taloha, Indreo, te evy vaovao iareo. ¹⁸ Reo raraha iaby reo le bak'amy ty Andragnahare. Nampilongoane tamy ty Vatane tamy ty alala ndre Kristy tika, vaho nameine antika ty asa fanompoa ty fampilongoa. ¹⁹ Ty tihoe, ao may ndre Kristy Andragnahare ro mampilongo zao tontolo zao amy ty Vatane, tsy magnisake ty fahadisoa iareo amy iareo. Nankine taminay ty hafatse ty fampilongoa. ²⁰ Kea voatendre ho mpisolo-tegna ndre Kristy zahay, manahake ty tihoe amy ty alalagnay ro hanaova ty Andragnahare ty fikaihane. mangatake anareo zahay, noho re Kristy: "Milongoa amy ty Andragnahare!" ²¹ Nataone lasa soro ho ahy ty hakeontika Kristy. Reke iaze Raeke ze tsy nanao rate zao. Nataone zay soa ho avy fahamarigna ty Andragnahare ao amine tika.