¹ Valo tao ty Josia ro nanomboke nanjaka; nanjaka zisike ty raike amby telopolo tao tamy Jerosalema re. ² Nanao ze mare teo amaso Yaveh, vaho nindeha tamity lala i Davida razambeine, naho tsy mba nivio niankavana na niankavia re. ³ Naho tamity tao fahavalo nanjakane, laha mboe tanora re, le nanomboke nipay ty Zagnahare Davida, razambeine. Tamity tao faha roe amby folo, le nanomboke nandio i Joda vaho Jerosalema bakeo amity fitoera abo re, ty baon'Aseraha, vaho ty saren-jaka voasokitre naho ty saren-jaka vita tamity vy. ⁴ Rinava ty vahoake teo agnoloane reo alitara Bala; tinampane ty alitara ty liten-ketae magnitre ze teo ambone reo. Tinorotorone reo baon'Aseraha vaho reo saren-jaka voasokitre , naho reo saren-jaka vita tamity vy zisike hahavia reigne ho deboke. Naparitane teo amity kibory reo ze nanao soro ho ahy zay ty deboke. ⁵ Noroane teo amity alitarane ty taola reo mpisorone. Manahake zay ty fomba, nandiovane i Joda vaho Jerosalema. ⁶ Nataone manahake zay kea reo tana Manase, Efraima, naho Simeona, ty lala iaby nimbaeo Naftaly, vaho teo amireo hapoteha ze nagnodidy zay. ⁷ Rinavane reo alitara, pinotene ho lasa deboke reo baon'Aseraha vaho reo saren-jaka voasokitre, naho tinampane ty alitara ty liten-ketae magnitre nagnera ty tane Israely iaby; nihere tagne Jerosalema re bakeo. ⁸ Naho tamity tao fahavalo amby folo nanjakane, laha fa voalio Josia ty tane vaho ty tempoly, le nagnirake i Safana anadahy Azalia, Maseia, governora ty tana, naho Joa anadahy Joahaza mpanoratre re, mba hagnamboatre ndraike ty tragno Yaveh Zagnaharene. ⁹ Nimbaeo amy Hilkia, mpisorombey iereo, naho nanao tamine ty vola ze niente tao amity tragnon'Agnahare, ze le fa navory reo Levita, vaho reo mpiambe varavara baka amy Manase vaho Efraima, bakamireo sisa tamy Israely iaby, bakamy joda vaho Benjamina iaby, naho bakamireo vahoake Jerosalema. ¹⁰ Nankine iereo tamireo lahilahy ze nagnori-maso ty asa teo amity tempoly Yaveh ty vola. Reo lahilahy reo ro nagnarama ty mpiasa ze nagnamboatre vaho nagnere ty tempoly tamity lalane. ¹¹ Naloa iereo tamireo mpandrafitre vaho reo mpagnore zay mba hivilia vato voapeke vaho hetae ho fagnametara, naho hamboara ambe ho amity voatre ze rinava reo mpanjaka Joda ilane. ¹² Nanao ty asa tamim-patokia reo lahilahy. Reo mpagnori-masone le Jahata vaho Obadia, reo Levita, bakamity anadahy Merary; naho Zakaria vaho Mesolama, bakamireo anadahy Kehatita. Reo Levita hafa, ze mpitendre zaka-magneno tena mahay iaby, mpanoro reo mpiasa. ¹³ Reo Levita reo le nita reo ze ninday ty fiasa ty tragno bey vaho reo lahilahy iaby ze nanao ty asa sambe hafa. Nisy avao kea reo Levita ze mpanoratre, mpanao, naho mpiambe vavahady. ¹⁴ Laha fa nakare iereo ty vola ze niente tao antragno Yaveh, le hisa Hilkia mpisoro ty boke ty lily Yaveh ze nomea tamity alala Mosesy. ¹⁵ Hoe Hilkia tamy Safana mpanora-dily ty hoe:" Hisako tao antragno Yaveh ty boke ty lily." Niente Hilkia tagne amy Safana ty boke. ¹⁶ Niente Safana tagne amity mpanjaka ty boke, vaho nitalily tamine avao kea, nanao ty hoe:" Reo mpanomponao le manao ty zaka iaby ze nankine tamiereo. ¹⁷ Le fa rinao iereo ty vola ze hisake tao antragno Yaveh, naho nomeane teo antagna reo mpagnori-maso vaho reo mpiasa zay." ¹⁸ Nirehake tamity mpanjaka ty Safana mpanora-dily hoe:" Nomea Hilkia mpisoro boke raho." Naho vinaky Safana tamity mpanjaka zay. ¹⁹ Naho laha fa rey ty mpanjaka reo rehake ty lily, le nandriatre ty akanjone re. ²⁰ Ty mpanjaka nandily i Hilkia, Ahikama anadahy Safana, Abdona anadahy Mika, Safana manora-dily, naho Asaia, mpanompone arere, nanao ty hoe: ²¹ "Mindehana naho agnontaneo ho ahy ty sitrampo Yaveh, naho kea ho ahy reo ze sisa agne Israely vaho agne Joda, noho ty reha ty boke ze le fa hisake. Fa bey zay, le ty helo Yaveh ze le fa nipoke tamintika. Bey zay, noho reo razambeintika tsy nidranjy ty rehafe ty boke ty mba hagnenkea ze voasoratre iaby tao amizay." ²² Naho Hilkia, vaho reo ze nililie ty mpanjaka, le nimbaeo amy Holda mpaminane vave, valy Saloma anadahy Tokehata anadahy Hasra, mpita akanjo ty fisorogna(Nitoboke tao Jerosalema tao amity tana ambane re), naho tamize fomba zay ro nirehafa iereo tamine. ²³ Hoe re tamiereo hoe:" Izaho ro rehafe Yaveh, ty Zagnahare Israely: Ambarao ty lahilahy ze nagnirake anareo tatoy amiko hoe: ²⁴ 'Zao ro safa Yaveh: Ingo, eo ampindaisa loza eto amity toera toy reo vahoakene raho, reo ozo iaby ze le fa voasoratre tao amity boke ze le fa voavaky iereo teo agnoloa ty mpanjaka Joda. ²⁵ Satria le fa nahafoe Ahy naho le fa nagnoro ty liten-ketae magnitre ho ahy reo zagnaharen-kafa iereo, mba hipay ahy amity heloke tamireo zaka iaby natao iereo__laha zao le hirarake amity toera toy ty heloko, naho tsy ho mate zay.' ²⁶ Fa ho ahy ty mpanjaka Joda, ze nagnirake anareo mba hagnontane Yaveh ze tokone hataone, le zao ro ho rehafenao amine:' Yaveh, ty Zagnahare Israely manao hoe: Ty amity rehake ze reinao, ²⁷ satria riha le tso-po, vaho nagnetre-bata teo agnoloan'Agnahare laha fa reinao ty rehane hagnisy ty toera toy vaho reo vahoakene, naho satria riha nagnetre-bata teo agnoloako naho namoteke ty akanjonao vaho nitagny teo agnoloako, le fa nidranjy anao avao kea raho__zay ro fagnombara Yaveh__ ²⁸ ingo, havoriko ho eo amireo razambeinao riha. Ho voavory ao amity kiborinao ampiadagna riha, naho ty masonao le tsy hahisake ty loza ze ho enteko eto amity toera toy vaho reo vahoakene."' Niente reo lahilahy tagne amity mpanjaka ze talily zay. ²⁹ Bakeo ty mpanjaka nagnirake mpinday talily ka namory ty olobey Joda vaho Jerosalema iaby. ³⁰ Naho niakatre tao antragno Yaveh ty mpanjaka, vaho reo lahilahy Joda iaby naho reo vahoake Jerosalema, vaho reo mpisoro, reo Levita, naho ty vahoake iaby, zisike ty bey naho ty kele. Naho vinakine tamiereo ty rehake iaby ty boke ty fagnenkea ze hisake tao antragno Yaveh. ³¹ Nitsanga teo amity fitobohane ty mpanjaka naho nanao fagnenkea teo agnoloa Yaveh, fa hagnorike Yaveh, vaho hiambe reo liline, reo fotsipene, naho reo lalane, amity arofone iaby vaho ty fagnahine iaby, hagnenke reo safa ty fagnenkea ze voasoratre ao amize boke zay. ³² Nirehake tamity ndaty iaby ze hisake tao Jerosalema vaho Benjamina re mba hagnenke ty fagnenkea. Tamity fagnenkea ro nagnanova ty vahoake Jerosalema ty fagnenkean'Agnahare, ty Zagnahare ty razambeiereo. ³³ Nafaha Josia teo tane reo zaka raty iaby ze ahy ty vahoake Israely. Nampanompoene Yaveh, Zagnahareiereo ty ndaty iaby tagne Israely. Fa tamity androne iaby, le tsy nivio tamity fagnoriha Yaveh, ty Zagnahare ty razambeine iereo.