¹ Niambe ty Pasake ho ahy Yaveh tao Jerosalema ty Josia, naho vinono iereo tamity andro fahaefatre amby folo ty vola voalohane reo agnondry ty Pasake. ² Natobone tegne amity fitobohane reo mpisoro ka nampaherezene tamity asa fanompoa ty tragno Yaveh iereo. ³ Hoe re tamireo Levita ze nampianatre ty Israely iaby vaho ze voatoka ho ahy Yaveh hoe:" Atoboho ao amity tragno ze namboare Solomona ana Davida, mpanjaka Israely ty tomabile masy. Ko ente egne amity soronareo sase zay. Naho antsao Yaveh Zagnaharenareo, naho tompo Israely vahoakene. ⁴ Mifandamina nareo arake ty agnara ty firazagnanareo vaho ty fizaranareo, arake reo hevetre sinora Davida, mpanjaka Israely, vaho reo ahy Solomona, anane avao. ⁵ Mitsangana egne amity toera masy, raeso ty toeranareo vaho ty fizaranareo ao amity foko reo rahalahinareo, reo foko ty vahoake, naho alao ty toeranareo vaho ty fizaranareo ao amity foko ty razambey reo Levita. ⁶ Vono ty agnondry ty Pasake, hamasino ty vatanareo, omano ho ahy reo rahalahinao ty agnondry, mba hatao arake ty safa Yaveh ze nomea tamity alala ty tagna Mosesy." ⁷ Nagnomea agnondry telo ale ho ahy ty vahoake iaby Josia naho anak'ose tamireo agnondry aman'ose ho amity fagnatetre ty pasake ho ahy reo iaby ze nagnatreke. Nagnomea agnombe telo arivo avao kea re; reo le bakamity fanagna ty mpanjaka. ⁸ Reo mpitarine le nagnomea fagnate-tsitrampo ho ahy ty vahoake, reo mpisoro, naho reo Levita. Hilkia, Zakaria, naho Jehiela, manam-boninahitre nita ty tragnon'Agnahare, le nagnomea ananm-biby hare 2.600 vaho agnombe telonjato ho fagnatetre ty pasake ho ahy reo mpisoro. ⁹ Konania, vaho Semahia naho Natanaela, rahalahine, vaho Hasabia, Jehiela, naho Jozabada, reo bey ty Levita avao kea, le nagnomea biby hare kele dime arivo vaho agnombe diman-jato ho fagnatetre ty pasake ho ahy reo Levita. ¹⁰ Ka le vogno ty fanompoa, naho nitoboke tegne amity fitoerane reo mpisoro, niarake tamireo Levita arake ty fizara iereo, ho vale ty lily mpanjaka. ¹¹ Vinono iereo ty agnondry ty pasake, naho naily reo mpisoro ty lio ze nalae iereo bakamity tagna reo Levita, naho reo Levita nagnafake ty holy reo anak'agnondry. ¹² Nafaha iereo ty fagnatetre oroa, mba hizara reo ho ahy reo fizara ty foko ty vahoake, mba hagnomea reo ho ahy Yaveh, arake ty voasoratre tao amity boke Mosesy. Natao iereo hoe zay kea reo agnombe. ¹³ Natono iereo tamity afo arake ty torohevetre reo anak'agnondry ty pasake. Laha ty amireo fagnatetre nihamasine, le nampandeveze iereo tao agnate velagne, velagne bey, vaho fagnendaza reo, naho niente iereo malaky tagne amity vahoake iaby zay. ¹⁴ Tafara zay le nagnoma fagnatetre ho ahy ty vata iereo vaho ho ahy reo mpisoro iereo, satria reo mpisoro, foko i Arona, le sahira tamity fanolora ty fagnatetre oroa vaho ty sabora zisike ty hariva, ka le nagnoma reo fagnatetre ho ahy iereo vaho ty mpisoro, foko i Arona, reo Levita. ¹⁵ Reo mpiantsa, foko i Asafa, le tao amity toeragniereo, arake ty torolala Davida, Asafa, Hemana, naho Jedotona mpaminane ty mpanjaka, naho reo mpiambe le tegne amity vavahady iaby. Tsy nahazo niala ty toerane iereo, satria reo Levita rahalahy iereo le nanao fagnomana ho ahy iereo. ¹⁶ Laha zao, tamize andro zay ty asa fanompoa Yaveh iaby le natao ho amity fankalaza ty pasake vaho hanolora fagnatetre oroa eo amity alitara Yaveh, arake ty nandilia Josia mpanjaka. ¹⁷ Ty vahoake Israely ze nagnatreke le niambe ty pasake tamize andro zay, naho bakeo ty hafalea amity mofo tsy misy masirasira zisike ty fito andro. ¹⁸ Tsy mboe nisy fankalaza ty pasake hoe zay tao Israely nanomboke tamity andro i Samoela mpaminane, naho tsy nisy vatane tamireo mpanjaka Israely hafa nankalaza ty pasake manahake ty natao i Josia, niarake tamireo mpisoro, Levita, vaho ty vahoake Joda vaho Israely iaby ze nagnatreke, naho reo vahoake tao Jerosalema. ¹⁹ Nembena zay pasake zay tamity fahavalo amby folo tao nanjaka i Josia. ²⁰ Tafara ze iaby zay, tafara ty nametraha Josia ty tempoly tamity lalane, le niakatre mba hialy amireo Karkemisy tao amity rano Eofrata ty Neko, mpanjaka Egypta, naho Josia nindeha nialy tamine. ²¹ Feie nandefa maso ivo tagne amine ty Neko, nanao ty hoe:" Ino ro tokone hataoko anao, ry mpanjaka Joda? Tsy avy handietre anao raho amizao, fa handietre ty tragno ze hialiako. Nataon'Agnahare nindeha malaky raho, ka manindria arofo amity fanohera an'Agnahare, ze miomba ahy, laha tsy zay handrava anao re." ²² Na zay aza, le nilietse ty hiala aze Josia. Noly nagnova vata re mba hahafahane mialy amine. Tsy nidranjy reo safa Neko ze bakamity vavan'Agnahare re; ka le nindeha nialy tagne amity baibo i Megido re. ²³ Tinify ty mpandefa folese ty Josia mpanjaka, naho hoe ty mpanjaka tamireo mpanompone hoe:" Ento raho, fa tena fere mafa." ²⁴ Ka le nakare reo mpanompone bakao amity kelese re, naho natobone tao amity fagnampe-kelesene. Niente iereo tagne Jerosalema, ze nimatezane re. Naleve tao amity kibory reo razambeine re. Nandala i Josia ty Joda vaho Jerosalema iaby. ²⁵ Nanao antsa fandala ho ahy Josia ty Jeremia; ty mpiantsa lahy vaho vave iaby le mandala i Josia zisike zao. Reo antsa reo le lasa fomba tao Israely; ingo, voasoratre ao amity antsa fandala reo. ²⁶ Laha ty amireo zaka hafa mikasike i Josia, vaho reo asa soa nataone tamity fagnenkea ze voasoratre tao amity lily Yaveh__ ²⁷ naho reo asane, nanomboke tagne amboalohane zisike farane, le voasoratre ao amity boke reo mpanjaka Joda vaho Israely.