¹ Roe amby folo tao Manase laha nanomboke nanjaka; nanjaka zisike ty dime amby dimampolo tao tagne Jerosalema re. ² Nanao ze raty teo amaso Yaveh re, manahake reo zaka raty reo firene ze le fa nahafa Yaveh teo agnoloa ty vahoake Israely. ³ Fa nananga ndraike reo toera agnabo ze rinava Hezekia raene, naho nananga reo alitara ho ahy reo Bala re, nanao reo baon'Aseraha re, naho nihohoke teo amireo kinta ty lagnitre naho nanompo iereo. ⁴ Nagnore alitara fanompoan-tsampe tao antragno Yaveh ty Manase, na le nandily aza Yaveh hoe:" Agne Jerosalema ro itoboha ty agnarako zisikezay." ⁵ Nagnamboatre alitara ho ahy reo kinta ty lagnitre iaby teo amity kianja roe ty tragno Yaveh re. ⁶ Noroane tao ambaibo Ben-hinoma reo anadahine. Nanao fanondro vaho sikily re; namaky fahisaha re; naho nindeha tagne amireo ze mirehake amity mate vaho reo mirehake amireo fagnahy. Nanao zaka-raty maro teo amaso Yaveh re naho nikaike ty helon'Agnahare. ⁷ Ty sare sokitre Aseraha ze namboarene, natobone tao antragnon'Agnahare zay. Ty momba tragno o ro rinehan'Agnahare tamy Davida vaho Solomona anadahine; zao ro nataone:" Ento amity tragno toy vaho agne Jerosalema, ze le fa finiliko tamity foko Israely iaby, ro hametrahako ty agnarako zisikezay. ⁸ Tsy hafindrako amity tane ze tinendreko ho ahy ty razambey iereo sase ty vahoake Israely, laha ohatre ka miambe iaby ze nandiliako iereo, magnorike ty llily, fotsipeke, naho reo lily ze nameako iereo tamity alala Mosesy iereo." ⁹ Tinary Manase hanao raty mihoatre lavitre noho reo firene ze le fa rinava Yaveh teo agnoloa ty vahoake Israely ty Joda vaho ty vahoake tao Jerosalema. ¹⁰ Nirehake tamy Manase vaho tamity ndaty Yaveh, fa tsy niraharaha iereo. ¹¹ Ka niente Yaveh teo amine reo mpifehe ty tafike ty mpanjaka Asyria, ze nangalake Manase tamity sene vy, namehe aze tamity sene vy naho nagnakatre aze ho agne Babylona ¹² Laha tao agnate ty fijalea ty Manase, le nangatake tamy Yaveh, Zagnaharene, naho nagnetre ty vatane teo agnoloa ty Zagnahare reo razambeine. ¹³ Nivavake tamine re; naho Zagnahare ro nangatahane, ka rein'Agnahare ty hatane naho nientene nihere ho agne Jerosalema, tagne amity fanjakane re. Naho le hay Manase fa Yaveh ro Zagnahare. ¹⁴ Tafara zay, Manase le nagnamboatre manda ambalike teo amity tana Davida, teo amity ilane ahandrefa i Gihona, tagne ambaibo, teo amity filira amity Vavahadin-kazandrano. Nagnodidy ty tazoa i Ofela re naho nananga ty manda ho vatane abo. Nametrake mpifehe mahere arofo teo amity tana mimanda iaby Joda re. ¹⁵ Nafahane tsy ho ao antragno Yaveh reo zagnahare hafa, ty sampe, naho reo alitara iaby ze namboarene tegne ambohitse ty tragno Yaveh vaho tagne Jerosalema, naho nariane tagne ambaly ty tana zay. ¹⁶ Naorene ndraike ty alitara Yaveh naho nanolotre soro ho fagnate-pihombogna vaho fagnate-pisaora teo re; nandily Joda hanompo Yavah, ty Zagnahare Israely re. ¹⁷ Na zay aza, ty vahoake le mboe nanao soro teo amireo fitoera abo avao, nefa ho ahy Yaveh arere, zay Zagnahare iereo. ¹⁸ Laha ty amireo zaka hafa mikasike i Manase, ty vavake nataone tamity Zagnaharene, vaho ty reha reo mpahisake ze nirehake tamine tamity angara Yaveh, ty Zagnahare Israely, ingo, voasoratre ao amity asa reo mpanjaka Israely zay. ¹⁹ Ao agnate zay ty tantara ty vavake nataone, vaho ty fihetseham-pon'Agnahare tamizay. Ao avao kea ty hadisoane vaho reo fahadisoane iaby, naho reo toera ze nananganane reo fitoera abo vaho nametrahana reo baon'Aseraha vaho ty saren-jaka voasokitre, taloha ty nangnetreane ty vatane__voasoratre ao amity tantara reo mpahisake zay. ²⁰ Naho nimate tagne amireo razambeine ty Manase, ka naleve iereo tao antragnone. Amona, anadahine, ro lasa mpanjaka nisolo aze. ²¹ Roe amby roapolo tao Amona laha nanomboke nanjaka; nanjaka zisike ty roe tao tagne Jerosalema re. ²² Nanao ze raty teo amaso Yaveh re, manahake ze le fa natao Manase, raene. Nanao soro ho ahy reo saren-jaka voasokitre iaby ze la fa natao Manase raene ty Amona, naho nanompo reo re. ²³ Tsy nagnetre vata teo agnoloa Yaveh re, manahake ze le fa natao Manase raene. Fa kea, ty Amona toy avao le nanao hadisoa maro kea. ²⁴ Nanao hevetre handietse iereo mpanompone naho namono aze tao antragnone avao. ²⁵ Fa ty vahoake ty tane namono reo iaby ze nihevetre handietse i Amona mpanjaka, naho natao iereo ho mpanjaka nisolo aze ty Josia, anadahine.