¹ Tafara reo zaka vaho asam-patokia reo, le niavy naho nilitre tao Joda ty Sankeriba, mpanjaka Asyria. Nitobe hanafike reo tana manda re, ze kinasane ho alae. ² Laha fa hisa i Hezekia fa niavy ty Sankeriba naho re nikasa hialy amy Jerosalema, ³ le nifampidineke tamireo mpitarine vaho reo lahilahine manampahefa re ty hampijanogna ty rano reo loharano ze teo ambaly ty tana; le nagnampe aze hanao zay iereo. ⁴ Ndaty maro ro nivory vaho nampijano reo loharano iaby vaho ty rano mily ze namakivaky ty agnivo ty tane. Hoe iereo ty hoe:" Nagnino ty mpanjaka Asyria ro niavy hipay rano bey?" ⁵ Bey herem-po ty Hezekia ka nananga ty manda iaby ze nisimba. Nananga reo tilikambo ho agnabo kea, vaho ty manda hafa agne ambaline avao kea re. Nagnamafe ty Milo tao amity tana Davida avao kea re, naho nagnamboatre zaka-fialia vaho apinga marobey. ⁶ Nametrake mpifehe miaramila teo amity vahoake re. Namory iereo ho eo amine teo amity tane malalake teo amity vavahady ty tana re ka nirehake tamim-pagnamafea iereo. Hoe iereo hoe: ⁷ "Mahereza vaho mimafea. Ko matahotre na kivy noho ty mpanjaka Asyria vaho reo tafike iaby miarake amine nareo, fa misy ndaty momba antika ze bey mihoatre noho reo ze momba aze. ⁸ Sandry ty nofone avao ro momba aze, fa Yaveh, Zagnaharentika, kea ro miomba antika, mba hagnampe antika, vaho hialy ty alintika." Ka le nagnamafe ty vatagniereo tamireo safa Hezekia, mpanjaka Joda reo vahoake. ⁹ Tafara zay, le nagnirake reo mpanompone ho agne Jerosalema ty Sankeriba, mpanjaka Asyria (teo agnoloa Lakisa re, naho ty tafine iaby niomba aze), ho agne amy Hezekia, mpanjaka Joda, vaho ty vahoake iaby ze tagne Jerosalema. Hoe re ty hoe: ¹⁰ "Zao ro safa Sankeriba, mpanjaka Asyria: Ino ro hifaharanao mba hiareta ty faherano agne Jerosalema? ¹¹ Feie tsy mamitake anareo vao ty Hezekia, mba hahavy anareo ho mate ty kere vaho ty arandrano, laha fa mirehake aminareo re ty hoe:' Yaveh Zagnaharentika ro hagnavotre antika eo antagna ty mpanjaka Asyria.'? ¹² Feie vao tsy io Hezekia ao avao ro nagnafake reo fitoboha agnabone vaho reo alitarane naho nandily Joda vaho Jerosalema hoe:' Eo amity alitara raike ro tsy maintsy hanompoanareo, naho eo amizay ro tsy maintsy hagnoroanareo ty soro nareo'? ¹³ Hainareo vao ze le fa nataoko vaho reo razambeiko tamireo vondrogn'ondaty iaby bakamireo tane hafa? Feie afake namonje ty tane iereo teo ambane feheko tamity fomba iaby vao reo zagnahare reo vodro ty ndaty ty tane? ¹⁴ Teo amireo zagnahare reo firene iaby ze rinava ty razambeiko reo, feie nisy zagnahare afake ty namonje ty vahoakene hiala teo antagnako vao? Nagnino ty Zagnaharenareo ro tokone hahavonje anareo eo amity fanjakako? ¹⁵ Ka ko enga handiso fagnantegna vaho hitao anareo amity alala zay ty Hezekia. Ko mino aze, fa tsy nisy zagnahare ty firene na fanjaka afake namonje ty ndatine tsy ho eo antagnako, na nagnafake tsy ho eo antagna reo razambeiko. Ka vaho maike fa ty Zagnaharenareo ro hahavonje anareo amity tagnako?" ¹⁶ Mboe nirehake raty mandietre Yaveh Zagnahare vaho mandietre i Hezekia mpanompone kea reo mpanompo Sankeriba. ¹⁷ Nanoratre taratasy avao kea Sankeriba mba hagnafaha Yaveh, ty Zagnahare Israely, naho nireha-draty tamine. Hoe re ty hoe:" Manahake reo zagnahare reigne firene ty tane reigne ze tsy nahavonje ty ndaty iereo teo antagnako, ty Zagnahare Hezekia avao kea le tsy hahavonje ty ndatine hiala tsy ho eo antagnako." ¹⁸ Nikaike mafe ty vahoake Jerosalema ze tao amity rindry tamity fireha ty Jiosy iereo, hampitahora vaho hagnorohoroa iereo, mba hahafaha iereo mahazo ty tana. ¹⁹ Nirehake momba ty Zagnahare Jerosalema manahake ty firehafa iereo momba reo zagnaharene ty ndaty ty tane hafa firene, ze asan-tagna ty ndaty avao, iereo. ²⁰ Hezekia, mpanjaka, vaho Isaia, mpaminane, le nivavake noho ze zaka zay ka nikaike mafe tagne andagnitse re. ²¹ Nagnirake anjele Yaveh, mba hamono reo lahilahy mpialy, reo mpifehe, naho reo manam-pahefa ty mpanjaka tao antobe. Ka le nihere tamin-kegnatre tagne antanene ty Sankeriba. Laha fa nimbaeo amity tragno ty zagnaharene re, le vinono ty ilane tamireo anane tamity meso tagne re. ²² Manahake zay ro nagnavota Yaveh i Hezekia vaho reo vahoake Jerosalema tamity tagna Sankeriba, mpanjaka Asyria, naho tamity tagna reo hafa iaby, ka nagnomea iereo fiadagna tamity fomba iaby. ²³ Maro ty ninday fagnatetre ho ahy Yaveh tagne Jerosalema, vaho fagnomea lafovily ho ahy Hezekia mpanjaka Joda, mba hahavy aze hiakatre teo amaso reo firene iaby nanomboke tamize andro zay. ²⁴ Naho tamize andro zay Hezekia le narare le fa ho nimate. Nivavake tamy Yaveh re, ty nirehake tamine naho nagnomea famantara aze fa ho sintra re. ²⁵ Nefa Hezekia tsy mba namale Yaveh tamize soa namea aze, fa niavognavo ty arofone. Ka le niavy tamine, vaho tamy Joda amity Jerosalema ty heloke. ²⁶ Na zay aza, le nagnetre-bata tamity avognavom-pone avao ty Hezekia, re vaho reo vahoake Jerosalema, ka tsy niavy tamiereo ty helo Yaveh zisike ty andro Hezekia. ²⁷ Nana harea maro vaho hasy vatane ty Hezekia. Nanao efe-tragno famoria ho ahy ty volafoty, volamena, vato lafovily, vaho ho ahy reo hagnitre, naho kea ho ahy reo apinga vaho reo zaka-manan-danja sambe hafa-kara re. ²⁸ Nana tragno famoriam-bokatre ho ahy ty vare, divay vaovao, diloilo, naho tragno fihinanam-bilo ho ahy reo biby hare karazane iaby avao kea re. Nana agnondry aman'ose tao ambalane avao kea re. ²⁹ Fagnampe zay, nanao tana ho aze avao kea re naho nana agnondry aman'ose vaho agnombe maro, fa Zagnahare nagnomea aze harea bey vatane. ³⁰ I Hezekia ao avao ro nanampe ty loharano bakagne ambone tagne Gihona, vaho nagnily zay ho agne amity ilane ahandrefa ty tana Davida. Nisoa tamireo fototrasane iaby Hezekia. ³¹ Na zay aza, ty amity zaka mikasike reo maso voho reo zagnahare Babylona, ze nirahe ho mbaeo amine mba hametra-pagnontanea momba reo ze nahay, ty momba ty famantara mahagaga ze le fa natao teo amity tane, le niala aze ho arere Zagnahare, mba hitsapa aze, naho hahaia iaby ze tao ampone. ³² Laha ty amireo zaka-hafa mikasike Hezekia, ao agnate zay reo asa tsy fivaliham-pagnenkeane, ingo, le fa voasoratre ao amity fahisa Isaia Mpaminane anadahy Amosa reo, vaho ao amity boke reo mpanjaka Joda vaho Israely. ³³ Nimate tagne amireo razambeine ty Hezekia, ka naleve iereo tagne amity tazoa misy reo kibory ty foko Davida re. Nagnomea hasy aze tamity fatene ty Joda iaby vaho ty vahoake Jerosalema. Naho Manase anadahine ro lasa mpanjaka nisolo aze.