¹ Naho laha fa vita iaby iaby zay, le niakatre ho agne amireo tana Joda ty vahoake Israely iaby ze tagne ka nanorotoro reo vato vaho nanampake reo baon'Aseraha, naho rinava iereo ty fitoboha agnabo vaho reo alitara tao amy Joda vaho Benjamina, vaho tao Efraima naho Manase iaby, mandram-pamoteha iereo aze iaby. Le nihere ty vahoake Israely iaby, ty kirai-draike tagne amity fanagnane vaho ty tanane iaby. ² Tinendre Hezekia ty fizara reo mpisoro vaho reo Levita voalamy arake ty fizara iereo, ty lahilahy kirai-draike tinendre tamity asane, le reo mpisoro vaho reo Levita. Tinendrene iereo mba hanao ty fagnatetre oroa vaho fagnate-piharoa, mba hanompo, mba hanolotre fisaora, naho mba hiantsa eo amireo vavahady ty tempoly Yaveh. ³ Tinendrene avao kea ty anjara ty mpanjaka ho ahy ty fagnatetre oroa bakamireo fanagnane arere, zay le, ho ahy ty fagnatetre oroa maray vaho fagnatetre oroa hariva, naho ty fagnatetre oroa ho amity andro Sabata, reo vola vaovao, vaho ty andro fifalea voatendre, arake ze voasoratre ao amity lily Yaveh. ⁴ Hafa zay, nandily ty vahoake ze nitoboke tagne Jerosalema mba hagnomea anjara ho ahy reo mpisoro vaho reo Levita re, mba hahafaha iereo mifantoke amity fagnenkea ty lily Yaveh. ⁵ Vatane vaho nalefa ty baiko, le namea ty vahoake Israely tamity falalan-tagna reo voaloham-bokatre ty vare, divay vaovao, diloilo, tantele, vaho ty bakamireo vokatre tagne ambaibo. Niente iereo ty ampahafolo ty zaka iaby; za vatane maro. ⁶ Ty vahoake Israely vaho Joda ze nitoboke tao amireo tana Joda avao kea le ninday ty ampahafolo ty biby hare vaho agnondry, naho ty ampahafolo reo zaka-masy ze natoka hoahy Yaveh Zagnahare iereo, naho navory iereo ho ie zay. ⁷ Tamity vola fahatelo ro nanomboha iereo namory ty fandraisa anjarane ho isane, ka finara iereo tamity vola fahafito. ⁸ Laha fa niavy naho nanente reo antontane ty Hezekia vaho reo mpitarike, le nisaotre Yaveh vaho ty Israely vahoakene iereo. ⁹ Bakeo Hezekia nagnontane reo mpisoro vaho reo Levita momba reo antontane. ¹⁰ Azaria, mpisorombey, bakamity foko Zadoka, namale aze naho nanao hoe:" Satria reo vahoake nanomboke ninday fagnatetre tao antragno Yaveh, le nihina zahay ka voky, naho feno ambine, satria le fa nitahie Yaveh ty vahoakene. Reo zaka bey vatane eto reo ro ambine." ¹¹ Le nandily ty hagnomena tragno famoria ao antragno Yaveh ty Hezekia, ka le nomane iereo zay. ¹² Bakeo niente iereo tamim-patokia ty fagnatetre, ty ampahafolone vaho reo zaka ze ahy Yaveh. Konania, Levita, ro mpita ty amireo, naho Simey, rahalahine, ro faharoe nagnampe aze. ¹³ Jehiela, Azazia, Nahata, Asahela, Jerimota, Jozabada, Eliala, Jismakia, Mahata, naho Benaia ro mpita teo ambane fehe Konania vaho Simey rahalahine, tamity hamarea Hezekia, mpanjaka, vaho Azaria, manam-boninahitse teo amity tragnon'Agnahare. ¹⁴ Kore anadahy Jimna Levita, mpiambe varavara teo antignana ty vavahady, ro teo amity fagnatetre an-tsitrampo ho an'Agnahare, nita ty fizara reo fagnatetre ho ahy Yaveh vaho reo fagnatetre masy vatane. ¹⁵ Teo ambane fehene ro nisy i Edena, Miamina, Jesoa, Semaia, Amaria, naho Sekania, tao amity tana reo mpisoro. Fineno iereo fatokia reo anjara fanompoa, mba hagnomea reo fagnatetre reo ho ahy ty rahalahy iereo isam-pizara, le ty manan-danja vaho ty tsy manan-danja. ¹⁶ Namea iereo avao kea reo lahilahy telo tao ro miakatre, ze voaisake tao amity fitana an-tsoratre reo razambeine ze nilitre tao antragno Yaveh, arake ze tinake ty fanao andavanandro, mba hanao ty asa tao amireo anjara fanompoane vaho fizara iereo. ¹⁷ Zinara iereo ho ahy ty mpisoro arake ty fitana antsoratre reo razambeine, naho hoe zay kea ho ahy reo Levita roapolo tao ro mihoatre, arake ty asa fanompoane vaho fizara iereo. ¹⁸ Tafilitre agnate zay ty anane malineke, reo valine, reo anadahine, naho reo anakampelane, magnera ty tana iaby, satria iereo le natoky tamity fiambena ty vatagniereo ho masy. ¹⁹ Ho ahy reo mpisoro, le reo foko Arona, ze tagne ambaibo tagne amireo ana-bohitre tao antane iereo, na tagne amity tana iaby, le nisy lahilahy tinendre tamity agnara mba hagnomea anjara ho ahy reo lahilahy iaby teo amireo mpisoro, vaho ho ahy reo iaby ze voaisake tao amity fitana antsoratre reo razambeine teo amireo Levita. ²⁰ Natao Hezekia nagnera Joda iaby zay. Nataone ze soa, mare, naho matoky teo amaso Yaveh, Zagnaharene. ²¹ Isake ty foto-trasa ze natombone tao amity fanompoa tao antragnon'Agnahare, ty lily, naho reo lalana, mba hipaia ty Zagnaharene, le nataone tamity arofone iaby zay, ka nisoa re.