¹ Nandefa irake tamy Israely vaho Joda iaby ty Hezekia, naho nanoratre taratasy ho ahy Efraima vaho Manase, fe tokone ho avy ao antragno Yaveh agne Jerosalema iereo, mba hankalaza ty Pasake ho ahy Yaveh, ty Zagnahare Israely. ² Fa ty mpanjaka, reo mpitarine, vaho ty fiangona iaby tagne Jerosalema le niarake-nihevetre, nanam-pakevetre ty hankalaza ty Pasake amity vola faharoe. ³ Tsy afake nankalaza zay teo naho eo anefa iereo, satria tsy ampe reo mpisoro ze nagnamasy ty vatagniereo, na ty ndaty ze niarake-nivory tagne Jerosalema. ⁴ Toe mare teo amaso ty mpanjaka vaho ty fiangona iaby ze tolo-hevetre zay. ⁵ Ka nagnenke ty hanao fagnombara magnera Israely iaby iereo, zisikagne Beriseba ka hatragne Dana, fa ty vahoake le tokone ho avy hankalaza ty Pasake ho ahy Yaveh, ty Zagnahare Israely, tao Jerosalema. Fa iereo le tsy niambe zay niarake tamity vahoake maro isake, arake ze voasoratre. ⁶ Laha zao reo irake le nindeha ninday ty taratasy bakamity mpanjaka vaho reo mpitarine nagnera Israely vaho Joda iaby, arake ty baiko ty mpanjaka. Hoe iereo ty hoe:" Nareo vahoake Israely, miheregna amy Yaveh, ty Zagnahare Abrahama, Isaka, naho Israely, mba hiheregnane amity sisa tavela aminareo ze tafilay bakeo antagna reo mpanjaka Asyria. ⁷ Ao nareo tsy hitovy amity razambeinareo na ty rahalahinareo, ze nanonta tamy Yaveh, ty Zagnahare ty razambey iereo, ka nandravane iereo, arake ty hisanareo. ⁸ Naho ko mafe loha, manahake reo razambeinareo; fa kea, manolora-bata hoahy Yaveh nareo naho milira ao amity fitoerane masy, ze le fa nihamasignene zisikezay, naho manompoa an'Yaveh Zagnaharenareo mba hiala aminareo ty helone. ⁹ Fa laha mihere amy Yaveh nareo, le hahisake fiferenaigna magnoloa reo ze ninday iereo ho gadra ty rahalahinareo vaho ty anagnareo, ka hihere amity tane toy iereo. Fa Yaveh Zagnaharenareo, le mafe-arofo vaho mpandefetre, naho tsy hagnetake ty tarehene aminareo, laha mihere amine nareo." ¹⁰ Ka le lasa reo irake nindeha isan-tana nagnera ty faritre Efraima vaho Manase, ty lala iaby nimbaeo Zebolona, fa nihehe vaho nagnifike iereo ty ndaty. ¹¹ Na zay aza, ty ilane tamity lahilahy Aseraha vaho Manase naho Zebolona le nagnetre-bata ka lasa tagne Jerosalema. ¹² Niavy tamy Joda, avao kea ty tagnan'Agnahare, mba hagnomea arofo raike iereo, mba handefe ty lily ty mpanjaka vaho reo mpitarike tamity alala ty safa Yaveh. ¹³ Vahoake maro, fiangonam-bey vatane, ro tafivory tagne Jerosalema mba hankalaza ty fifalea amity Mofo tsy misy masirasira tamity vola faharoe. ¹⁴ Le nitsanga iereo naho nangalake reo alitara ze tagne Jerosalema, vaho reo alitara iaby ho ahy ty liten-ketae magnitre; natora iereo tagne amity baibon-driake Kidrona zay. ¹⁵ Bakeo le namono ty anakagnondry ty Pasake iereo tamity andro fahaefatre amby folo ty vola faharoe. Megnatre reo mpisoro vaho reo Levita, ka nagnamasy ty vatane vaho ninday fagnatetre oroa tao antragno Yaveh iereo. ¹⁶ Nitsanga tegne amity toerane iaby arake ty fizarane iereo, magnorike reo torolala namea tao amity lily Mosesy, ty lahilahin'Agnahare. Naily reo mpisoro ty lio ze nalaene bakamity tagna reo Levita. ¹⁷ Satria nisy maro tamity fiangona ro tsy nagnamasy ty vatane. Laha zao le namono ty anakagnondry ty Pasake ho ahy ty ndaty iaby tsy voalio vaho tsy afake nagnamasy ty soro iereo ho ahy Yaveh reo Levita. ¹⁸ Fa vahoake marobey, maro tamiereo bakagne Efraima vaho Manase, Isakara vaho Zebolona, ro tsy nagnalio ty vatane re, nefa nihina ty sakafo ty Pasake avao iereo, tsy arake ze fagnanara voasoratre. Le nivavake ho ahy iereo ty Hezekia, nanao ty hoe:" Enga anie Yaveh soa handefetre ty ndaty iaby ¹⁹ ty manefe ty arofone hipay an'Agnahare, Yaveh, ty Zagnahare reo razambeine, na le tsy voalio tamity falio arake ty lala ty fitoboha masy aza re." ²⁰ Ka le nidranjy i Hezekia Yaveh naho nagnafake ty vahoake. ²¹ Ty vahoake Israely ze tagne Jerosalema le niambe tamin-kafaleam-bey ty hafalea amity mofo tsy misy masirasira zisike ty hafitoa. Reo Levita vaho reo mpisoro le niantsa Yaveh isan'andro, nihira niarake tamity zaka-megneno mafe hoahy Yaveh. ²² Naho Hezekia nagnamafe reo Levita iaby ze nahatakatre ty fanompoa Yaveh. Ka le nihina tamim-pifalea zisike ty hafitoa iereo, nanolotre reo soro ho fagnate-piharoa, naho nibebake tamy Yaveh, ty Zagnahare ty razambey iereo. ²³ Naho ty fiangona iaby nanampa-kevetre ty hankalaza hafitoa hafa, ka nanao zay tamin-kafalea iereo. ²⁴ Naho Hezekia mpanjaka Joda nagnomea agnombelahy arivo vaho agnondry fito arivo ho ahy ty fiangona ho fagnatetre; naho reo mpitarike nagnomea agnombelahy arivo vaho agnondry aman'ose ray ale ho ahy ty fiangona. Mpisoro maro isake ro nagnamasy ty vatane. ²⁵ Ty fiangona Joda iaby, miarake amireo mpisoro vaho reo Levita, naho ty vahoake iaby ze niarake avy bakagne Israely, naho reo vahiny ze niavy bakagne amity tane Israely vaho reo ze nitoboke tagne Joda le nifale iaby. ²⁶ Ka le nisy hafaleam-bey tao Jerosalema, fa hatramity andro Solomona ana Davida, mpanjaka Israely, le tsy mboe nahisaha manahake zay tao Jerosalema. ²⁷ Naho nitsanga vaho nitso-drano ty vahoake reo mpisoro, vaho reo Levita. Rey ty feo iereo, naho ty vavake iereo niakatre tagne andagnitse, ty fitoboha masy ze itobohan'Agnahare.