¹ Nanomboke nanjaka ty Hezekia tamity faha-dime amby roapolo taone; nanjaka zisike ty sive amby roapolo tao tamy Jerosalema re. Ty agnaran-drenene le Abia; anakampela Zakaria. ² Nanao ze mare teo amaso Yaveh re, manahake ty le fa natao Davida raene. ³ Tamity tao voalohane nanjakane, tamity vola voalohane, le namoha reo varavara ty tragno Yaveh Hezekia naho namboatre reo. ⁴ Nampilitre reo mpisoro vaho reo Levita re, naho namory iereo niarake tao amity kianja tamity ilane antignana. ⁵ Hoe re tamiereo hoe:" Midranjigna ahy, nareo Levita! masino ty vatanareo, naho masino ty tragno Yaveh, ty Zagnahare ty razambeinareo, naho afaho hiala amity fitoboha masy ty hateloa. ⁶ Fa nanonta reo razambeintika naho nanao ze raty teo amaso Yaveh Zagnaharentika; nahafoe aze iereo, nagnotake ty tarehe iereo niala tamity toera ze hitoboha Yaveh, naho nagnotake ty lambosy iereo ho amizay. ⁷ Nihilia iereo avao kea reo varavara ty lavaranga naho vinonone ty jiro; tsy nagnoro liten-ketae magnitre iereo na fagnatetre oroa tao amity toera masy ho ahy ty Zagnahare Israely. ⁸ Laha zao le nipoke teo amy Joda vaho Jerosalema ty helo Yaveh, naho nataone hoe ty zaka fagnorohoroa, fampitahora, vaho fagnafaham-baraka iereo, arake ty hisanareo amity masonareo. ⁹ Zay ro antone nahalavo reo raentika tamity meso, vaho nahababo reo anantika lahy, vaho reo anantika vave, naho reo valintika. ¹⁰ Amizao le ato ampoko ty hanao fagnenkea amy Yaveh, ty Zagnahare Israely, mba hiala ty helone mirehetre amintika. ¹¹ Ry anako, ko malay amizao, satria Yaveh le fa nifily anareo mba hitsanga eo agnoloane, mba hanompo aze, naho mba ho mpanompone vaho ho emboke magnitre." ¹² Bakeo le nitsanga reo Levita: le Mahata anadahy Amasay, vaho Joela anadahy Azaria, bakamity ndaty reo Kohalita; naho reo ndaty Merary, Kisy anadahy Abdia, vaho Azaria anadahy Jehalalila; naho reo Gersonita, Joa anadahy Zima, naho Edena anadahy Joa; ¹³ bakamireo anadahy Elizafana, Simry vaho Jeiela; naho bakamireo anadahy Asafa, Zakaria naho Matania; ¹⁴ bakamity anadahy Hemana, Jehiela naho Simei; naho bakamity anadahy Jedotona, Semaia naho Oziela. ¹⁵ Namory reo rahalahine iereo, naho nagnamasy ty vatane, ka nilitre, arake ty nandilia ty mpanjaka, tamity fagnoriha reo safa Yaveh, mba hagnalio ty tragno Yaveh. ¹⁶ Nilitre tao amity efetre agnate ty tragno Yaveh reo mpisoro mba hagnalio zay; niente iereo niakatre ty loto iaby ze hisane tao antempoly Yaveh tao ankianja ty tragno. Nalae reo Levita zay mba hagnafaha zay ao ambaibon-driake Kidrona. ¹⁷ Naho natombo iereo ty fagnamafea tamity andro voaloha ty vola voalohane. Naho tamity andro fahavalo ty vola le nita teo amity lavaranga Yaveh iereo. Naho zisike ty valo andro hafa avao kea le nagnamasy ty tragno Yaveh iereo. Tamity andro fahaene amby folo ty vola voalohane le vita iereo zay. ¹⁸ Bakeo iereo nindeha tagne amy Hezekia, ty mpanjaka, tao amity lampa naho nanao ty hoe:" Le fa nagnalio ty tragno Yaveh iaby zahay, ty alitara ho ahy reo fagnatetre oroa miarake amity ataone iaby, vaho ty latabatre ty mofo ty fiatrefa, miarake amity ataone iaby. ¹⁹ Ka le fa nioma zahay naho le fa nihamasine nay reo zaka iaby ze nafaha Ahaza mpanjaka tamy niasa tsy ampantokia zisike ty fanjakane re. Ingo, eo agnoloa ty alitara Yaveh reo." ²⁰ Bakeo Hezekia mpanjaka nifoha maray naho namonje reo mpitarike ty tana; nindeha niakatre tagne amity tragno Yaveh re. ²¹ Ninday agnombe lahy fito, agnondrilahy fito, anakagnondry fito, naho oselahy fito ho fagnatetre noho ty hadisoa ho ahy ty fanjaka, ho ahy ty fitoboha masy, naho ho ahy Joda iereo. Nandily reo mpisoro, reo anadahy Arona re, mba hanese reo eo amity alitara Yaveh. ²² Ka le vinono iereo ty agnombe, naho rinae reo mpisoro ty lio ka nafitsene teo amity alitara. Vinono iereo ty agnondry lahy naho failine teo amity alitara ty lio; vinono iereo avao kea reo anakagnondry naho nailine teo amity alitara ty lio. ²³ Niente iereo teo agnoloa ty mpanjaka vaho ty fivondrogna reo oselahy ho fagnatetre noho ty hadisoa; natobo iereo teo amizay ty tagnane. ²⁴ Vinono reo mpisoro zay, naho nanao fagnatetre noho ty hadisoa tamity lio reo teo amity alitara mba hanova fagnavota ho ahy Israely iereo, satria nandily ty mpanjaka fa tokone hisy fagnatetre oroa vaho fagnatetre noho ty hadisoa ho ahy Israely iaby. ²⁵ Natobo Hezekia tao amity tragno Yaveh niarake tamity Kipantso, Harpa, naho lokanga reo Levita, nahalany arake ty baiko Davida, Gada, ty mpahisake ty mpanjaka, vaho Natana, ty mpaminane, satria bakamy Yaveh tamity alala reo mpaminanene ty baiko. ²⁶ Nitsanga niarake tamireo zaka-magneno Davida reo Levita, naho reo mpisoro niarake tamireo trompetra. ²⁷ Nandily iereo mba hanolotre ty fagnatetre oroa ho eo amity alitara Hezekia. Laha fa nanomboke ty fagnatetre oroa, le nanomboke avao kea ty antsa Yaveh, niarake tamireo trompetra, mbamity zaka-magneno Davida, mpanjaka Israely. ²⁸ Nifale iaby ty fiangona iaby, niantsa reo mpiantsa, naho nilay reo mpampagneno trompetra; nitohy zisikagne reo iaby reo zisike ty hivita ty fagnatetre oroa. ²⁹ Laha fa vita iereo ty fagnatetre, le nihohoke vaho nitsaoke ty mpanjaka vaho reo iaby ze nagnatreke niarake tamine. ³⁰ Hafa zay, Hezekia, ty mpanjaka, vaho reo mpitarike le nandily reo Levita mba hiantsa antsa ho ahy Yaveh tamity safa Davida vaho Asafa mpahisake. Niantsa antsa tamin-kafalea iereo, naho nihohoke vaho niantsa. ³¹ Le hoe Hezekia hoe:" Amizao le nagnamasy ty vatanareo ho ahy Yaveh nareo. Avia eto ka ento ho ao antragno Yaveh reo soro vaho reo fagnate-pisaora." Niente ty fiangona reo soro vaho reo fagnate-pisaora, naho reo iaby ze nana arofo feno fagniria le ninday fagnatetre oroa. ³² Agnombelahy fitompolo, agnondrilahy zato, naho anakagnondry lahy roanjato ro isa reo fagnatetre oroa niente ty fiangona. Ho fagnatetre oroa ho ahy Yaveh iaby reo iaby. ³³ Agnombe enenjato vaho agnondry telo arivo reo fagnatetre voahasy. ³⁴ Fa tsy ampe reo mpisoro laha hagnolitre ty angozy reo fagnatetre oroa, ka le nagnampe iereo ty rahalahine, reo Levita, zisike ty nivita ty asa, naho mandram-piafaha reo mpisoro nagnamasy ty vatagniereo, fa niambe ty hagnamasy ty vatagniereo kea noho reo mpisoro ty Levita. ³⁵ Fagnampe zay, le nisy fagnatetre oroa maro bey; nampiarahe tamity sbora ty fagnate-piharoa reo, naho nisy fagnatetre nome ho ahy ty fagnatetre oroa iaby. Ka le nilamy soa ty fanompoa tao antragno Yaveh. ³⁶ Nifalefale Hezekia, naho ty vahoake iaby avao kea, noho zay le fa nomanen'Agnahare ho ahy ty ndaty, satria vita tsiela ty asa.