¹ Roapolo tao ty Ahaza ro nanomboke nanjaka, naho nanjaka ene amby folo tao tamy Jerosalema re. Tsy nanao ze mare teo amaso Yaveh re, manahake ty natao Davida razambeine. ² Fa kea, nindeha tamity lala reo mpanjaka Israely re; nagnamboatre saren-jaka aily ho ahy reo Bala avao kea re. ³ Fagnampe zay, nagnoro emboke magnitre tao amity Baibo Bena-hinoma re naho nandefa reo anane tao agnate afo, arake reo asa fanompoan-tsampe ty ndaty ze sinere Yaveh hiala tamity tanene taloha ty vahoake Israely. ⁴ Nanao soro vaho nagnoro liten-ketae magnitre tao amity fitoboha agnabo vaho tegne amireo tazoa naho tane ambane ty hetae maintso iaby re. ⁵ Laha zao Yaveh Zagnahare Ahaza, le nanolotre aze teo antagna ty mpanjaka Syria. Naharese aze ty Syriana naho ninday vahoake gadra maro niala tamine eo, ninday iereo nimbaeo Damaskosy. Natolotre teo antagna ty mpanjaka Israely ze naharese aze tamity famonoam-bey avao kea Ahaza. ⁶ Fa Peka anadahy Remalia, le namono miaramila 120 000 tao Joda tao agnate ty andro raike, lahilahy be herem-po iaby iaby, satria iereo le nahafoe Yaveh, ty Zagnahare ty razambey iereo. ⁷ Zikry, lahilahy mahere raike bakagne Efraima, namono i Mahaseia anadahy ty mpanjaka, Azrikama, manam-pehefa eo amity lampa, naho i Elkana, ty miharine ty mpanjaka. ⁸ Ty tafike Israely le nangalake babo 200 000 valy, anadahilahy, naho anakampela bakamireo longo iereo. Nangalake babo maro bey avao kea iereo, ze nientene nihere tagne Samaria. ⁹ Fa nisy mpaminane Yaveh raike tagne, Obeda ro agnarane. Niakatre mba hanalaka ty tafike ze avy bakagne Samaria re. Hoe re tamiereo ty hoe:" Satria Yaveh, ty Zagnahare ty razambeinareo, meloke tamy Joda, le nanolotre iereo teo antagnanareo Re. Fa namono iereo tamin-keloke ze mahatakatre ty lagnitre nareo. ¹⁰ Naho mihevetre ty hita reo lahilahy vaho ampela Joda vaho Jerosalema ho ndevonareo nareo. Fa i nareo vao tsy meloke tamireo hadisoanareo tamy Yaveh Zagnaharenareo? ¹¹ Ka amizao, midranjigna ahy: Alefaso reo gadra, ze nalaenareo tamireo rahalahinareo, fa mirehetre aminareo ty helo Yaveh." ¹² Naho reo mpitarike ty vahoake Efraima ilane__Azaria anadahy Johanana, Berekia anadahy Mesilemota, Jehizkia anadahy Saloma, naho i Amasa anadahy Hadlay, nitsanga handietre reo ze nihere bakagne amity aly. ¹³ Hoe iereo tamiereo hoe:" Ao tsy hinday reo gadra atoy nareo, satria mipay hinday zaka ze hampanonta anay handietre Yaveh nareo, mba hagnampe reo hadisoanay vaho reo zaka-tsy metenay, fa foloay ty hadisoanay, naho misy firehetan-keloke amy Israely." ¹⁴ Ka namototre reo gadra vaho reo babo teo agnoloa reo mpitarike vaho vondro iaby reo lahilahy mitam-pialia. ¹⁵ Niare reo lahilahy ze voatendre tamity agnara naho nangalake reo gadra, vaho nampiakanjo reo iaby tsy nisiky teo amiereo niarake tamireo babo. Nampiakanjoe iereo reigne naho nameane Kapa. Namea iereo hane hohane vaho zaka-hinome iereo. Nitsabo ty fere iereo naho nanao reo malema teo ambone borike iereo. Niente iereo nihere tagne amity longone tagne Jeriko iereo, (atao ty hoe Tana Palma). Bakeo le nihere tagne Samaria iereo. ¹⁶ Tamize andro zay Ahaza Mpanjaka le nandefa mpinday talily tagne amireo mpanjaka Asyria mba hangatake iereo hagnampe aze. ¹⁷ Satria mboe niavy ndraike reo Edomita naho nanafike Joda, ninday reo gadra. ¹⁸ Reo Filistina avao kea le nanafike reo tana reo tane gebo vaho Negeva ao Joda. Nalae iereo ty Beti-semesy, Aialona, Gederota, naho Soko vaho reo ana-bohine, Timna vaho reo ana-bohine, naho Gimzo vaho reo ana-bohine avao kea. Nindeha nitoboke tagne amireo toera reo iereo. ¹⁹ Fa Yaveh nagnetre Joda noho i Ahaza, mpanjaka Israely, satria re nanao raty tao Joda vaho nanonta mafe le mafe tamy Yaveh vatane. 20Tiglato-pilesera, mpanjaka Asyria, le niavy teo amine naho nagnoronta aze laha tokone ho nagnamafe aze. ²¹ Fa Ahaza le nangalake ty tragno Yaveh vaho reo foko ty mpanjaka naho reo mpitarike, mba hagnomea zaka-lafovily ho ahy reo mpanjaka Asyria. Feie tsy nahazoane tombone ty fanoa zay. ²² Io ty Ahaza Mpanjaka ao avao ro nandietre vatane Yaveh tamity andro ty fijalea. ²³ Satria nanao soro tamireo zagnahare Damaskosy re, zagnahare ze le fa naharese aze. Hoe re ty hoe:" Satria nagnampe iereo ty zagnahare reo mpanjaka Syria, le hisoro ho ahy iereo raho, mba hagnampe ahy iereo." Kanefa harava ho aze vaho Israely iaby iereo. ²⁴ Navory Ahaza reo fanake tao amity tragnon'Agnahare naho pinotene. Nahiline reo varavara ty tragno Yaveh naho nanao alitara ho aze teo amity zoro Jerosalema iaby re. ²⁵ Tagne amity tana Joda iaby ro nanovane fitoboha agnabo mba hagnoroa soro ho ahy reo zagnaharen-kafa. Nipay Yaveh, ty Zagnahare reo Razambeine re. ²⁶ Naho ty sisa tamireo asane, vaho reo lalane iaby, voalohane naho farane, le ingo, le fa voasoratre ao amity boke reo mpanjaka Joda vaho Israely. ²⁷ Nimate tagne amireo razambeine ty Ahazia, naho naleve iereo tao amity tana, tao Jerosalema re, fa tsy niente iereo tagne amity kibory reo mpanjaka Israely. Hezekia, ty anadahine, ro lasa mpanjaka teo amity toerane.