¹ Dime amby roapolo tao ty Jotama laha nanomboke nanjaka; nanjaka ene amby folo tao tagne Jerosalema re. Jerosa ro agnaran-drenene; anakampela Zadoka re. ² Nanao ze mare teo amaso Yaveh re, nagnorike ty ohatre nataon-draene, le i Ozia, tamity zaka-iaby. Nijano tamity filira tao antempoly Yaveh avao kea re. Kanefa mboe nivem-bata tamity fomba raty avao ty vahoake. ³ Nagnamboatre ty vavahady ambone ty tragno Yaveh re, naho nagnamboatre maro teo amity tazoa Ofela. ⁴ Fagnampe zay le nagnamboatre tana tagne amity tane tazoa Joda, vaho nagnamboatre rova vaho tilikambo tagne amireo ala re. ⁵ Nialy tamity mpanjaka ty vahoake Amona avao kea re naho resene iereo. Tamize andro zay avao, ro nagnomea ty vahoake i Amona aze talenta volafoty zato, vare tritrike ray ale fatra, vare hordea ray ale fatra. Namea ty vahoake Amona aze manahake zay avao re ty taogne faharoe vaho fahatelo. ⁶ Ka le nihanahere ty Jotama satria nindeha nahity teo agnoloa Yaveh Zagnaharene. ⁷ Naho ty amireo raraha hafa mikasike i Jotama, ty aline iaby, naho reo lalane, ingo, voasoratre ao amity boke reo mpanjaka Israely vaho Joda zay. ⁸ Dime amby roapolo tao re laha nanomboke nanjaka; nanjaka zisike ty ene amby folo tao tamy Jerosalema re. ⁹ Nimate tagne amireo razambeine ty Jotama, naho naleve iereo tao antana Davida re. Ahaza, anadahine, ro lasa mpanjaka nisolo ty toerane.