¹ Laha zao, sagnatria nijale tamity nofo ty Kirisity, le anovo fialia ty vatanareo ze dineke zay. Fa iaby ze nijale tamity nofo le nitofa tamity hadisoa. ² Voka zay, ty ndaty hoe zay, zisike ty andro sisa hivelognane, le tsy ho velo hoahy ty fagniria ty ndaty sase, fa hoahy ty sitrampon'Agnahare. ³ Fa ampe zay ty andro lasa nanaova ze tea ty jentilisa hatao -hafalea ty nofo, falemelemea, hamamoa, entam-bata mahamegnatre, fihisan-draty, naho reo asa ty fanompoan-tsampe raty. ⁴ Dinehe iereo fa hafa-hafa satria tsy miharo amiereo ao amize fagnaranam-po bey zay nareo, laha zao le hireha-draty miomba anareo iereo. ⁵ Hamale ty raike ze vogno hitsara ty velo vaho ty mate iereo. ⁶ Laha ze antone zao ro nitalilia ty vaovao mahafale tamireo mate avao kea, mba, ndra le tsinara tamity nofo hoe ty ndaty aza iereo, le ho velo hoen'Agnahare ao amity fagnahy. ⁷ Miharine ty fara ty zaka iaby. Laha zao mandineha, naho magnonognam-bata amity dinenao hoahy ty hateam-bavake. ⁸ Ambone ty zaka iaby, managna hatea feno hoahy ty kirai-kiraike iaby, fa ty hatea manaro hadisoa maro. ⁹ Mifampandrosoa tsy am-pitaraigna. 10Fa ty kirai-kiraike aminareo le nandrae fagnomeam-pahasoava, ampiasao fifanompoa zay. Manova zay hoe ty mpitan-draharaha ty fagnomeam-pahasoava maro maimaimpoa an'Agnahare. ¹¹ Laha misy mirehake, ao re hanao zay hoe ty raike mirehake ty rehan'Agnahare. Laha misy manompo, ao zay hoavy amity here te vatien'Agnahare. Manova reo zaka reo mba homean-kasy amity alala Jesosy Kirisity amity fomba iaby Zagnahare. Ao hoahy Jesosy Kirisity ty hasy vaho here zisikagne doria. Amena. ¹² Ry malala, ko raese ho fahafaha ty fitsapa amity arofo ze niseho taminareo, hoe ty hoe nisy zaka hafahafa niseho taminareo. ¹³ Fa kea, ndra le maro aze ty hivelomanareo reo jale Kirisity, mifalea, mba ho afake hifale avao kea nareo naho ho falefale amity fagnambara ty hasine. ¹⁴ Laha niharatie naho ty agnara Kirisity nareo, le voatahy, satria ty Fagnahy ty hasy vaho ty Fagnahin'Agnahare le mitoboke aminareo ao. ¹⁵ Fa ao tsy hisy ndra ia ia aminareo hijale hoe ty mpamono ndaty, mpangalatre, mpanao raty, ndra mpiraharaha ty ahy ty hafa. ¹⁶ Fa laha misy mijale fa Kirisitiana, ao re tsy ho megnatre; fa kea , ao hagnomea hasy an'Agnahare amize agnara zay re. ¹⁷ Fa andro zao hanomboha ty fitsara miarake amity fokon'Agnahare. Laha manomboke antika zay. ino ro ho vokatre hoahy reo ze tsy magnenke ty zaka soan'Agnahare? ¹⁸ Naho laha" ty ndaty mare aza paie tsy ho voavonje, amity fomba akore ro hisehoa ty ndaty tsy an'Agnahare vaho ty mpanota?" ¹⁹ Laha zao ao reo ze mijale naho ty sitrampon'Agnahare hagnanky ty fagnahy iereo amity Mpamoro matoky amity fanoan-tsoa.