¹ Amize fomba zay, Nareo ampela le tokone hagnenke ty valinareo. Anovo zay ndra le misy lahilahy maro aza tsy magnenke ty tsara, naho mete ho azo iereo ndra tsy aza ty tsara, amity alala ty etam-bata ty valy iereo. ² Fa iereo le hahita ty entam-bata soanareo am-pagnaja. ³ Ao zay ho lefe tsy miarake amireo haingone ambalike: randram-bolo, ravake volamena, ndra akanjo lamaody. ⁴ Fa kea, ao zay ho lefe miarake amize ao agnarofo ty ndaty, vaho ty hasoa maharetre ty Fagnahy soa vaho mangike, te lafo vily eo agnoloan'Agnahare. ⁵ Fa reo ampela masy taloha ro nandravake ty vata iereo toe zay. Nana fatokia an'Agnahare iereo naho nagnenke ty valine iaby. ⁶ Hoe ze ty fomba zay ro nagnenkea Abrahama Saraha vaho nikaihane aze ho tompone. Nareo le anane henanezao laha manao ze soa vaho tsy matahotre ndaty nareo. ⁷ Hoe zay avao, nareo lahilahy le tokone mivelo miarake amity valinareo arake ty hazavan-tsay, hoe ty fanake maleme kea, ty ampela. Tokone ameanareo hasy iereo manahake ty mpiara-mandova ty fagnomea ty havelo. Anovo zay mba tsy ho voasaka ty vavake nareo. ⁸ Farane, nareo iaby, ao hiarake say, hiferegnay, hifankatea manahake ty mpirahalahy, haleme arofo, naho hiambane. ⁹ Ko mamale raty naho raty ndra magnaraty ty mpagnaraty. Mafandietre amizay aza, mitahia zisikagne, fa naho zay ro nikaiha anareo, mba hahafahanareo mandova ty fitahia. ¹⁰ "Ty raike ze te hotea ty fiaigna vaho te hahita andro soa le tokone hampindrano ty lelane amity raty vaho ty sognine amity firehafa fitake. ¹¹ Ao re hiala amity atao ty hoe raty naho hanao ze soa. Ao re hipay fiadagna vaho hitake zay. ¹² Ty maso ty Tompo nahita ty mare, naho ty sofine maharey reo hata iereo. Fa ty tarehe Tompo le mandietre reo ze manao raty." ¹³ Ia ty raike hagnisy anareo laha magniry ty hanao ty soa nareo? ¹⁴ Nefa laha mijale naho ty hamarea nareo, le sambatre. Ko matahotre ze atahora iereo. Ko magnorohoro. ¹⁵ Fa kea, atokano hoe ty masy ao amponareo ty Tompo Kirisity. Mivognona zisikagne hamale ty ndaty iaby ze magnotane anreo ty antone hatokianareo an'Agnahare. Anovo amity halemeam-pagnahy vaho fagnaja zay. ¹⁶ Managna feo ty fandineha malio mba ty ndaty ze magnaraty ty fiaigna soanareo ao amy Kirisity le mete megnatre satria mirehake mandietre anareo iereo hoe ty hoe mpanao raty nareo. ¹⁷ Soa kea, laha Zagnahare ro magniry, fa mijale nareo amity fanoa ty soa naho ty fanoa ty raty. ¹⁸ Te fa nijale naho ty hadisoa avao kea Kirisity. Re ty mare le nijale ho antika, te tsy mare, mba handaisane antika eo amin'Agnahare. Vinono tamity nofo re, fa vinelo ty Fagnahy, le nandeha re naho nitalily hoahy reo fagnahy ze agne ampigadra henanezao. ²⁰ Tsy nagnenke iereo laha fa niambe ty fiatrehan'Agnahare tamity andro Noa, tamity andro ty fanangana sambofiara, naho Zagnahare namonje ndaty kele_fagnahy valo tamity rano. ²¹ Zay ro famanatara ty batisa ze mamonje anareo henanezao_tsy hoe ty fagnaliova ty loto amity vata, fa hoe ty kaike ty feo ty fandineha ho amin'Agnahare_tamity alala ty fitsangana Jesosy Kirisity tamity mate. ²² Kirisity le eo antagnan-kavanan'Agnahare. Niakatre agne andagnitse re. Reo anjele, reo manam-pahefa, naho ty hare le tsy mahaintsy magnenke Aze.