¹ Laha fa vita Solomona ty fanangana ty tragno Yaveh vaho ty lampa ty mpanjaka, naho laha fa nahalefe iaby ze niriene ho vita re, ² le niseho fagnindroene tamy Solomona Yaveh, manahake ty nisehoane tamine tao Gibeona. ³ Naho hoe Yaveh tamine hoe:" Le fa reiko ty vavakenao vaho ty hatanao ze nataonao teo agnoloako. Le fa natokako ho ahy, ty tragno ze nantsanganao toy, mba hametrahako ty agnarako ho ao zisikezay. Ty masoko vaho ty arofoko le ho eo avao amity andro iaby. ⁴ Naho riha, laha hindeha eo agnoloako manahake ty nindehana Davida raenao tamity fahitiam-pone vaho tamity hamarea, hagnenke ze nandiliako anao iaby naho hiambe reo lalako vaho reo liliko, ⁵ le hametrake ty sezan-droandria ty fanjakanao eo amity Israely zisikezay raho, manahake ty nampagnategnako tamy Davida raenao, hoe:' Ty fokonao le tsy hiala eo amity sezan-droandria Israely vatane.' ⁶ Fa laha mivio riha, riha na reo ananao, ka tsymiambe reo liliko vaho reo lalako ze napetrako eo agnoloanao, naho laha mindeha ka manompo zagnaharen-kafa naho mihohoke eo amiereo riha, ⁷ le hafahako amity tane ze nameako iereo Israely; naho ty tragno ze le fa natokako ho ahy ty agnarako toy, le hafahako tsy ho hisa ty masoko, naho Israely le holasa manahake ty zaka fikizahe vaho hihehea eo amireo vahoake iaby. ⁸ Ho rava ho antontam-bato ty tempoly toy, naho iaby ze mandrio eo amizay le ho gaga ka hisiotsioke. Hagnotane iereo hoe:' Nagnino Yaveh ro nanao zao tamity tane vaho tragno toy?' ⁹ Ty hafa hamale hoe:' Satria nahafoe Yaveh Zagnaharene iereo, ze ninday ty razam-bey iereo niakatre ty tane Egypta, naho niraike tamireo zagnaharen-kafa ka nihohoke naho nanompo iereo. Zay ro antone nindaisa Yaveh ze loza iaby zay tamiereo."' ¹⁰ Laha fa tampetre ty roapolo tao ze nahavita Solomona ty fanangana reo tragno bey roe, ty tempoly Yaveh vaho ty lampa ty mpanjaka. ¹¹ Naho hirama mpanjaka Tyra, le nagnomea hetae sedera vaho kypreso, naho volamena ty Solomona-iaby ze nirie Solomona-ka le nomea Solomona Mpanjaka tana roapolo tao amity tane i Galilia ty Hirama. ¹² Niakatre bakao Tyro ty Hirama mba hanente reo tana ze nomea Solomona aze, kanefa tsy nahafale aze zay. ¹³ Naho hoe Hirama:" Fa tana ino toa ameanao ahy toa, ry rahalahiko?" Natao Hirama hoe Tane Kobola reo, ze mboe hikaiha iereo zisikagne naho zisikandroany. ¹⁴ Nampagnatetre talenta volamena 120 ho ahy ty mpanjaka ty Hirama. ¹⁵ Ze magnarake zao ro anto ty fitakea amity asa ze napetra Solomona Mpanjaka: mba hanangana ty tempoly Yaveh vaho ty lampane, mba hanangana Milo vaho ty rindry Jerosalema, naho ty mba hanangana ty manda fiaro Hazora, Megido, naho Gazera. ¹⁶ Niakatre naho nangalake Gazera ty Farao mpanjaka Egypta. Noroane zay naho vinonone reo kananita tao antana. Naho le nomea Farao ty anak'ampelane, valy Solomona, ho fomey ho ahy ty fagnakaram-baly ty tana. ¹⁷ Ka le nahere Solomona natsanga Gazera vaho Beti-horona Ambane, ¹⁸ Baleta vahoTadmora agne angnefetre agne amity tane Joda, ¹⁹ vaho reo tana famoria iaby ze nanagnane, vaho reo tana reo kalesene naho reo tana ty mpitiki-tsoavale, naho iaby ze niriene hatsanga ho zakateane tao Jerosalema, tao Libanona, naho tamity tane iaby eo ambane ty fehene ²⁰ Naho reo vahoake iaby sisa tavela tamireo Amorita, Hitita, Perizita, Hivita, naho Jebosita, ze tsy vahoake Israely, ²¹ reo foko iereo ze tavela niarake tamiereo tao amity tane, ze tsy vita ty ndaty Israely ty nandrava aze iaby_natao Solomona mpiasa antseresere iereo, zisikandroany. ²² Na le zay aza, le tsy natao Solomona mpiasa antseresere reo vahoake Israely. Fa kea, lasa miaramilane vaho mpanompone, manan-kasine, vaho manam-boninahine naho mpifehe reo kalesene naho mpitiki-tsoavalene iereo. ²³ Toa avao kea reo bey ty manam-pahefa mita reo mpagnori-maso ze teo amity asa Solomona, 550 tamiereo, ty nagnori-maso ty vahoake ze niasa. ²⁴ Nifindra bakao amity tana Davida mba ho agne amity tragno ze natsanga Solomona hoaze ty anak'ampela Farao. Tatoy afara, le nananga i Milo ty Solomona. ²⁵ Manolotre fagnatetre oroa vaho fagnate-pilongoa in-telo isan-tao eo ambone ty alitara ze naorene ho ahy Yaveh ty Solomona, magnoro liten-ketae magnitse miarake amireo eo ambone alitara ze eo agnoloa Yaveh. Ka vitane ty tempoly naho ampiasaene zay amizao. ²⁶ Nagnamboatre andian-tsambo tao Ezion-gebera ty Solomona Mpanjaka, ty agnila Elota, teo amoro ty Riake Mena, tao amity tane Edoma. ²⁷ Nandefa mpanompo ho ahy ty andian-tsambo Solomona ty Hirama, tantsambo aze nahay ty riake, niarake tamireo mpanompo Solomona. ²⁸ Nindeha tagne Ofira niarake tamireo mpanompo Solomona iereo. Bakagne ro nindaisa iereo talenta volamena 420 ho ahy Solomona Mpanjaka.