¹ Naho Solomona namory reo olobey Israely, reo mpitarike ty foko iaby, naho reo loha ty foko ty vahoake Israely, teo agnoloane tao Jerosalema, mba hinday ty tomabile fagnenkea Yaveh hiakatre bakagne amity tana Davida, zano hoe, i Ziona. ² Nivory teo agnoloa Solomona Mpanjaka tao amity lanogna iaby ty ndaty Israely iaby, tamity vola Etanima, vola fahafito. ³ Niavy iaby reo ndaty Israely iaby, naho nampiakare reo mpisoro ty tomabile. ⁴ Niente iereo niakatre ty tomabile Yaveh, ty tragno iaze fifanojeha, naho reo fanake masy iaby ze tao agnate lay. Niente reo mpisoro vaho reo Levita niakatre iaby reo zaka iaby reo. ⁵ Niarake nimbeo agnoloa ty tomabile iaby ty Solomona Mpanjaka vaho ty fivondrogna Irsaely iaby, nanao soro agnongdry vaho agnombe tsy hay isahe. ⁶ Nampilire reo mpisoro teo amity fitobohane ty tomabile ty fagnenkea Yaveh, tao amity efetre agnate ty tragno, le tao amity toera masy vatane, ambane ela reo kerobima. ⁷ Fa namelatre ty elane teo amity fitoboha ty tomabile reo kerobima, naho nanaro ty tomabile vaho ty bao ty ninday aze zane. ⁸ Lava vatane reo bao kay ka hisake bakeo amity fitobohane masy teo agnoloa ty efetre agnatene ty ambonene, feie tsy hisake bakegne ambalike reo. Naho mboe reo reo zisikandroany. ⁹ Tsy nisy na ino ino tao amity tomabile laha-tsy reo vato pisake roe ze natobo Mosesy tagne Horeba, tamy Yaveh nanao fagnenkea tamity ndaty Israely laha fa niakatre bakagne amity tane Egypta iereo. ¹⁰ Naho laha fa niakatre bakao amity fitobohane masy reo mpisoro, le nameno ty tempoly Yaveh ty raho. ¹¹ Tsy naha-fitsanga hanompo reo mpisoro noho ty raho, fa nameno ty tragnone ty hasy Yaveh. ¹² Le hoe Solomona hoe:" Namabara Yaveh fa hitoboke ao agnate iem-pito Re, ¹³ kanefa nagnore tragno soa vatane ho anao raho, le toera hitobohanao zisikezay." ¹⁴ Le nitolike ty mpanjaka naho nitso-drano ty vondro Israely iaby, laha teo am-pitsangana ty vondro Israely iaby. ¹⁵ Hoe re hoe:" Ho antsae anie Yaveh, Ty Zagnahare Israely, ty nirehake tamy Davida raeko, naho nahalefe zay tamity tagnane avao, nanao hoe:" ¹⁶ Hatramity nindaisako ty vahoakeko niakatre bakao Egypta, le tsy nifily tana teo amity foko Israely iaby hagnoregna tragno Raho, mba hitoera ty agnarako ao. Kanefa, nifily Davida mba handily eo amy Israely ndatiko Raho.' ¹⁷ Naho tao am-po Davida raeko ty hagnore tragno ho ahy ty agnara Yaveh, ty Zagnahare Israely. ¹⁸ Fa hoe Yaveh tamy Davida raeko hoe:' Fa nataonao tao amponao ty hagnore tragno ho ahy ty agnarako, le soa ty nagnanovanao zay tao amponao. ¹⁹ Na zay aza le tsy hagnore ty tragno riha; fa kea, ty anadahinao, ze terake bakamity voanao, ro hagnore ty tragno ho ahy ty agnarako.' ²⁰ Nitanterahe Yaveh ty rehake ze rinehane, fa nitsanga hisolo ty toera Davida raeko raho, ka mitoboke eo amity sezan-droandria Israely, arake ty nampagnategna Yaveh. Naoreko ho ahy ty agnara Yaveh, ty Zagnahare Israely ty tragno. ²¹ Le fa nagnamboatre fiboha ho ahy ty tomabile agne raho, ty misy ty fagnenkea Yaveh, ze nataone tamireo razantika tamy ninday iereo niakatre bakao amity tane Egypta Re." ²² Nitsanga teo agnoloa ty alitara Yaveh ty Solomona, teo agnoloa ty vondro Israely iaby, naho namelatre ty tagnane ho agne amity lagnitse. ²³ Hoe re hoe:" Ry Yaveh, Zagnahare Israely o, tsy misy Zagnahare manahake anao na agne amity lagnitse ambone na eto ambane tane, te mita ty tsy fivaliham-pagnekeane amireo mpanomponao ze mindeha eo agnoloaneo amity arofone iaby; ²⁴ Riha ze nita ty fampagnategnanao tamy Davida raeko mpanomponao. Egne, nirehake tamity vavanao Riha naho nataonao tamity tagnanao zay, manahake ty androany. ²⁵ Amizao are, ry Yaveh, Zagnahare Israely, anovo ze nampagnategnaenao tamy Davida raeko mpanomponao, laha fa nirehake Riha hoe:' Tsy ho rava aminao ty hana fasahiragna hitoboke eo amity sezan-droandria Israely eo amasoko, laha miambe ty hindeha eo agnoloako ty fokoko, manahake ty nindehananao teo agnoloako.' ²⁶ Amizao are, ry Zagnahare Israely, mivavake raho mba ho lefe ty fampagnategna nataonao tamy Davida raeko mpanomponao. ²⁷ Fa tena hitoboke etoy antane vatane vao ty Zagnahare? Ingo, zao tontolo zao vaho ty lagnitse aza tsy tandre anao__sandrake fa ty tempoly ze naoreko toy! ²⁸ Kanefa mba dranjigno rie ty vavake ty mpanomponao vaho ty hatane toy, ry Yaveh Zagnahareko; midranjigna ty kaike vaho ty vavake atao ty mpanomponao eto agnoloanao androany. ²⁹ Enga anie ka hivoha amity tempoly toy andro aman'kaleke ty masonao, eo amity toera ze nirehafenao hoe:" Ho ao ty agnarako vaho ty fiatrehako.'__mba hidranjigna ty vavake hatao ty mpanomponao ty magnatreke ty toera toy. ³⁰ Ka midranjigna ty hata ty mpanomponao vaho ty Israely ndatinao laha fa mivavake magnatreke ty toera toy zahay. Eka, midranjigna bakagne amity toera itobohanao, bakagne andagnitse; naho laha fa midranjy Riha, le mba mamotora. ³¹ Laha manonta amity namane ty ndaty raike ka tsy maintsy hampanove fifanta, naho laha avy ka manao fifanta eo agnoloa ty alitaranao ato amity tragno toy re, ³² le midranjigna bakagne andagnitse ka miasa; tsarao reo mpanomponao, mba hasiake ty meloke naho hampihere ze nataone ho eo amity lohane avao, naho hagnombara ty maray mba ho tsy manan-tsiny, vaho hamale soa aze noho ty hamareane. ³³ Laha fa resy ty fahavalo ty Israely ndatinao satria nanonta taminao, ka laha mihere aminao iereo, magnenke ty agnaranao, mivavake, naho mangatake famotora bakaminao ato amity tempoly toy__ ³⁴ le midranjigna agne andagitse rie naho mamotora ty hadisoa ty Israely ndatinao; ento mihere agne amity tane ze nomeanao ty razane iereo. ³⁵ Laha mihily ty lagnitse ka tsy misy ora satria nanonta taminao ty vahoake__laha mivavake miatreke ty toera toy iereo, magnenke ty agnaranao, naho miala amity hadisoane laha fa bake nampijalenao__ ³⁶ le midranjigna agne andagnitse naho mamotora ty hadisoa ty mpanomponao vaho ty Israely ndatinao, laha fa magnanatre iereo ty lala soa ze tokone hombane Riha. Mandatsaha ora eo amity tanenao, zay nameanao ho lova ty ndatinao. ³⁷ Laha atao ty hoe misy kere eo amity tane, na atao hoe misy arete-mandrava, hamaiha ty vare na mate foty, valala na sompanga; na atao hoe misy fahavalo manafike ty vavahady ty tana ao amity tane iereo, na misy loza na arete__ ³⁸ naho laha atao ndraike hoe misy vavake vaho hatake natao ty ndaty raike na ty Israely vahoakenao iaby__ze sambe mahay ty loza agne ampone iabike laha mamelatre ty tagnane ho amity tempoly toy re. ³⁹ Le midranjigna agne andagnitse, ty toera hitobohanao, mamotora naho miasa, naho valeo soa ty ndaty iaby noho ze ataone; Riha mahay ty arofone, fa Riha le riha avao ro mahay ty arofo ty ndaty iaby. ⁴⁰ Anovo zay mba hampitahotse iereo aminao amity andro iaby hivelogna iereo eo amity tane ze nomeanao ty razanay. ⁴¹ Fagnampe zay, mikasike reo vahiny ze tsy agnate Israely vahoakenao: laha avy bakagne amity firenen-davitse re noho ty Agnaranao__ ⁴² fa mihendrea momba ty agnaranao bey, ty tagnanao mahere, naho ty sandrinao miakatre iereo__laha fa avy vaho mivavake magnatreke ty tempoly toy iereo, ⁴³ le midranjigna rie agne andagnitse, ty toera hitobohanao, naho anovo iaby ze angatahe ty vahiny aminao. Anovo zay mba hahaiane ty vondro'gnodaty iaby eto antane ty agnaranao ka hatahora iereo Anao, arake ty atao Israely ndatinao arere. anovo zay mba hahaia iereo fa ty tragno ze naoreko toy le kaihe amity agnaranao. ⁴⁴ Laha atao hoe mindeha miakatre hialy amity fahavalo ty ndatinao, na ino ino fomba nandefasanao iereo, naho laha mivavake aminao, Yaveh, magnatreke ty tana ze voafilinao iereo, naho magnatreke ty tragno ze naoreko ho ahy ty agnaranao. ⁴⁵ Le midranjigna ty vavake vaho ty hata iereo agne andagnitse, naho ameo rarene re. ⁴⁶ Laha atao hoe manonta aminao iereo, satria tsy misy ndaty tsy manonta, naho laha atao hoe meloke amiereo Riha ka manolotre iereo ho eo amity fahavalo, ka alae ty fahavalo ho azo ho agne amity tanene iereo, na lavitse na marine. ⁴⁷ Naho laha atao ty hoe tiarove iereo fa agne amity tane ze nanovanao sese-tane aze iereo, naho laha atao hoe mibebake iereo ka mipay soatre aminao agne amity tane reo nahazo aze reo. Laha mirehake iereo hoe:' Nanao zaka tsy mete zahay naho nanonta. Raty entam-bata zahay.' ⁴⁸ Ka mihere aminao amity arofone iaby vaho ty fagnahine iaby agne amity tane reo fahavalone ze nahazo aze iereo, naho laha atao hoe mivavake aminao manandrife ty tanene, ze nomeanao ty raza iereo, naho manandrife ty tana ze finilinao iereo, naho manandrife ty tragno ze naoreko ho ahy ty agnaranao. ⁴⁹ Le midranjigna ty vavake iereo vaho ty hata iereo famonjea, agne andagnitse, ty toera hitobohanao, naho hagnamare ty raraha ho ahy iereo Riha. ⁵⁰ Mamotora ty ndatinao, ze nidiso taminao, vaho ty hadisoane iaby ty nandikane ty lilinao. Mahazo iereo magnoloa ty fahavalone ze ninday aze ho azo, mba hiferenaigna ty fahavalo iereo ty vahoakenao avao kea. ⁵¹ Vahoakenao ze finilinao iereo, ze navotenao bakagne Egypta manahake ty bakao amity fata fandrehetam-by. ⁵² Mivavake raho mba hivoha amity hatane ty mpanomponao vaho ty hata Israely ndatinao ty masonao, mba hidranjy iereo na mbia na mbia hikaihane anao. ⁵³ Fa navahenao teo amireo vahoake ty tane iaby iereo mba ho anao naho handrae reo fampagnategnanao, arake ty nihazavaenao tamity alala Mosesy mpanomponao, tamy ninday ty razanay niakatre Egypta Riha, ry Tompo Yaveh." ⁵⁴ Ka laha fa baka nanao ze vavake vaho hatake iaby ty tamy Yaveh ty Solomona, le nitsanga bakeo agnoloa ty alitara Yaveh re, laha fa baka nandohalike vaho namelatre ty tagnane nagnatreke ty lagnitse. ⁵⁵ Nitsanga re naho nitso-drano ty vondro Israely iaby tamity feo mafe, nanao hoe:" ⁵⁶ "Antsae anie ty Yaveh, ty nagnomea fitofa ho ahy Israely ndatine, tamity fitanane ty fampagnategnane iaby. Tsy nisy rehake poke bakamity fampagnategna soa Yaveh ze nataone tamy Mosesy mpanompone. ⁵⁷ Hiomba antika anie Yaveh Zagnaharentika, manahake ty niombane reo razantika. ⁵⁸ Tsy hienga antika anie Re na hahafoe antika, mba hatongilane ho amine ty arofontika, mba hivelo amity lalane iaby vaho hiambe reo lily aman-dalane naho reo fotsipene, ze nandiliane reo razantika. ⁵⁹ Ao reo rehake ze nambarako. ze nangataheko teo agnoloa Yaveh, ho agnila Yaveh Zagnaharentika andro aman'ale, mba hagnomeane rarene ty mpanompone vaho ty Israely ndatine, arake arake ze paie isan'andro; ⁶⁰ mba ho hay ty firene iaby eto antane fa Yaveh, ro Zagnahare, naho tsy misy Zagnahare hafa! ⁶¹ Ka ao ho mare amy Yaveh Zagnaharentika eo amity lalane naho hiambe reo liline, manahake ty androany." ⁶² Ka le nanolotre soro ho ahy Yaveh ty mpanjaka vaho reo Israely iaby niarake tamine. ⁶³ Nanolotre soro fagnate-pilongoa ty Solomona, nataone ho ahy Yaveh: agnombe roa arivo vaho roa ale naho agnondry 120.000. Ka le nitokana ty mpanjaka vaho reo vahoake Israely iaby ty tragno Yaveh. ⁶⁴ Ty andro io avao le natoka ty mpanjaka ty agnivo ty kianja teo agnoloa ty tempoly Yaveh, fa teo ro nanolorane ty fagnatetre oroa, ty fagnatetre vare, naho ty sabora ty fagnate-pilongoa, satria kele loatre laha handraesa ty fagnatetre oroa, ty fagnatetre hohane, naho ty sabora reo fagnate-pilongoa ty alitara varahy ty teo agnoloa Yaveh. ⁶⁵ Ka natao Solomona, mbamireo Israely iaby niarake tamine, ze fivodrognam-bey, zisikagne Lebo-hamata ka zisikagne amity baibon-driake Egypta, teo agnoloa Yaveh Zagnahare zisike ty fito andro naho zisike ty fito andro hafa kea, ze mira efatre amby folo andro ty raraha tamize andro zay. ⁶⁶ Naho tamity andro fahavalo le nampoly reo vahoake re, naho nitso-drano ty mpanjaka iereo ka noly tagne antragnone tamity arofo falefale vaho fale noho ty amity hasoa iaby natoro Yaveh tamy Daviva mpanompone, naho tamy Israely ndatine.