¹ Telo amby folo tao ro nagnanova Solomona ty lampane. ² Nagnore ty lampane tamity Ala Libanona re. Zato metatre ty halava zay, dimanpolo metatre ty borine, naho telopolo metatre ty haabone. Namboare tamity andalan'ambe sedera efatre ty lampa niarake tamity ambe sedera teo amireo tsagam-bato. ³ Tinafo tamity sedera ty tragno ze napetrake teo amireo ambe. Reo ambe reo le tinoha tamity tsagam-bato. ⁴ Nisy ambe dime amby efapolo eo, dime amby folo amity andala raike. Nisy ambe teo amireo andala telo, naho ty varavara kele kirai-kiraike le nifanandrife tamity varavara kele telo hafa. ⁵ Ty varavara vaho ty varavara kele iaby le natao ho efa-jato niarake tamireo ambe, naho ty varavara kele nifanandrife tamity varavara kele telo hafa. ⁶ Nisy ambe maro nifampipiteke dimampolo metatre ty halavane naho telopolo metatre ty borine, miarake amity lavaranga eo agnoloa vaho ambe naho tafo. ⁷ Nagnore ty rindry ty sezan-droandria ze hitsara aze ty Solomona, le ty efetragno ty fahamarina. Rinakoke tamity sedera isake ty riha zay. ⁸ Ty tragno Solomona ze nitobohane, tao amity kianja hafa misy ty tanen-dapa, le vinolavola mitovy. Nagnore tragno hoe zay ho ahy ty anak'ampela Farao avao kea re, ty nalaene ho valy. ⁹ Reo tragno reo le rinavake tamity vato lafo vily voapeke, voametatre soa naho voatampake tamity tsofa naho natao nalama tamity zaka-iaby. Reo vato reo le nampiasae ho amity fagnoregna reo vato eo ambonene, vaho tagne ambalike ka hatramity kianja bey avao kea. ¹⁰ Ty fototre naore tamity vato bey, vaho lafo vily ty valo vaho folo metatre ty lavane. ¹¹ Teo ambone le nisy vato lafo vily voapeke ze voamare soa amity habeine, naho ambe sedera. ¹² Nisy andalane vato voatampake telo vaho tampake ambe sedera raike ty kianja bey ty nagnodidy ty lampa manahake ty kianja ao agnate ty tempoly Yaveh naho ty tempoly ty lavaranga. ¹³ Nanampake i Hirama ty Solomona mpanjaka naho ninday aze bakagne Tyro. ¹⁴ Hirama le ana ty mpivem-bata raike tao amity foko i Naftaly; ndaty Tyro ty raene, mpanao asa-tagna amity varahy. Feno hamarea vaho hazavan-tsay naho fahaia mba hanao asa bey amity varahy ty Hirama. Nindeha mbaeo amy Solomona Mpanjaka re mba hiasa amity varahy ho ahy ty mpanjaka. ¹⁵ Namboatre reo ambe roe tamity varahy ty Hirama, valo amby folo metatre ty haabone naho roe amby folo metatre ty magnodidy ty kirai-kiraike. ¹⁶ Nanao kapitaly roe tamity varahy voakosoke re mba hapetrake eo ambone reo ambe. Dime metatre ty haabo ty kapitaly kirai-kiraike. ¹⁷ Makarakara mitarehin-karota vaho tanjomiolake mitarehen-drojo ampiasae ho ahy reo kapitaly ro nandravake ty loha reo ambe fito isake ty kapitaly. ¹⁸ Ka nanao andala ampogamben-dagnitse roe nagnodidy ty loha ty ambe kirai-kiraike ty Hirama mba handravaha reo kapitaly iereo. ¹⁹ Reo kapitaly teo ambone reo ambe ty lavaranga le rinavake tamity lilia, efatre metatre ty haabone. ²⁰ Tao amireo kapitaly tamireo ambe roe reo kea le nahisaha, ampongamben-dagnitse roajanto milahatre magnodidy ty ambone iaby. ²¹ Nananga reo ambe tao andavaranga ty tempoly re. Ty ambe teo ankavana le natao ty hoe Jakina, naho ty ambe teo ankavia le natao ty hoe Boaza. ²² Teo ambone reo ambe le nisy reo hengone manahake ty lilia. Zay ro fomba nandrafeta reo ambe. ²³ Nanao ty koveta tamity vy ty Hirama, folo metatre isake ty sisiny. Dime metatre ty haabone, naho telopolo metatre ty magnodidy ty koveta. ²⁴ Nisy tagnatagna manga tao ambane ty sisine nagnodidy ty koveta, folo isake ty metatre, naho naharo horaike niarake tamity koveta laha ty koveta vatane ro natao. ²⁵ Teo amireo agnombe roe amby folo ty koveta, telo nagnatreke ty avaratre, telo nagnatreke ty ahandrefa, telo nagnatreke ty antimo, naho telo nagnatreke ty antignana. Natoboke teo amity ambonegnireo ty koveta, naho nifagnarine ty faritre ty voly ie iaby. ²⁶ Nateve manahake ty bory ty tana ty koveta, naho ty sisy zay le naore manahake ty sisy ty kope, manahake ty famoa ty lilia. Agnombe rano roe arivo bata ty koveta. ²⁷ Nanao tomboke varahy folo ty Hirama. Efatre metatre ty halava ty tombone kirai-kiraike naho efatre metatre ty fivelarane, naho telo metatre ty haabone. ²⁸ Manahake zay ty fanoa reo tombone. ²⁹ Nisy takelake teo agnivo reo hetae-kele reo, naho nisy liona, agnombe vaho kerobima teo amireo takelake vaho teo amireo hetae-kele. Teo ambone vaho tao ambane reo liona vaho reo agnombe le nisy feheloha voatefe soa. ³⁰ Nisy kodia varahy efatre vaho tagnan-kodia ty tsanganane iaby, naho nisy fikala tao ambane ty sisine efatre ty koveta. Nasia feheloha ty sisy ty kirai-kiraike reo fikala. ³¹ Fohe manahake ty tomboke ty fisokafa, metatre raike vaho sasane, naho tao agnate ty satro-boninahitre metatre raike ty lavane. Voasoratre teo amity fisokafane, naho ty takela reo le efatre zoro, fa tsy fohe. ³² Tao ambane ty takelake reo kodia efatre, naho ty tagnan-kodia vaho reo fitobohane le tao amity tsangana. Ty haabo ty kodia raike le metatre raike vaho sasane. ³³ Naho natao manahake ty kodia ty kalese reo kodia. Reo fitobohane, reo sisine, reo tagnamasoandrene, vaho reo ivone le natao vy iaby. ³⁴ Nisy sorone efatre tamireo sisine efatre ty tsangana ty kirai-kiraike, natao tao amity tsangana avao. ³⁵ Teo ambone reo tsangana le nisy fehem-barike raike antsasa metatre ty halalene, naho eo ambone ty tsangana ro namehea reo fikala vaho reo takelake. ³⁶ Voasora Hirama Kerobima, liona, vaho hetae rofia ty velara reo fikalagna vaho reo takelake ty nanaro reo toera malalake, naho mihodidy feheloha reo. ³⁷ Zay ro fomba nagnanovane reo tsangana folo. Natao tamity lasitra mitovy iaby iaby, naho nana habey, vaho toera mitovy. ³⁸ Nanao koveta varahy folo ty Hirama. Ty koveta raike le afake magnaja rano efapolo bata. Efatre metatre ty bory ty koveta kirai-kiraike aby naho nisy koveta raike isake ty tsangana folo. ³⁹ Nanao tsangana dime teo amity ilane antimo ty tempoly re naho dime teo amity ilane avaratre ty tempoly. Nataone teo amity sisine antignana ty koveta, magnoloa agne antimo ty tempoly. ⁴⁰ Nanao ty koveta vaho ty lapelene naho ty finga fagniligna ty Hirama. Ka le vitane ty asa iaby ze nataone ho ahy Solomona Mpanjaka tao antempoly Yaveh: ⁴¹ reo ambe soa, vaho reo finga manahake reo kapitaly ty teo ambone reo ambe roe, naho reo hegon'arato roe makarakara mba hanarogna ty finga roe manahake reo kapitaly ze teo ambone reo ambe. ⁴² Nanao reo ampogabein-dagnitse efatre re ho ahy reo hengon'arato roe voavitre: ampongabein-dagnitse roe ho ahy ty harato kirai-kiraike mba hanarogna ty finga roe manahake reo kapitaly ze teo amireo ambe, ⁴³ tsangana folo, vaho koveta folo teo amireo tsangana. ⁴⁴ Nataone tao ambane zay ty koveta vaho reo agnombe roe amby folo; ⁴⁵ reo tavy, reo lapele, reo koveta bey, naho reo zaka hafa iaby avao kea. Natao Hirama tamity varahy voakoseke reo, ho ahy Solomona Mpanjaka, naho ho ahy ty tempoly Yaveh. ⁴⁶ Natobo ty mpanjaka tegne amity tane gebo Jordana reo, tao amity tanemanga agnivo Sokota vaho Zaretana. ⁴⁷ Tsy niente Solomona reo fanake iaby satria bey loatre laha hoente, satria tsy afake niente ty vesa ty varahy. ⁴⁸ Nanao ty fanake iaby ze tao antempoly Yaveh tamity volamena i Solomona: le ty alitara volamena vaho latabatre ze nagnisia ty mofo ty fiatrefa. ⁴⁹ Reo fanovan-jiro, dime eo amity ilane ankavana naho dime eo ankavia, teo aloha ty efetre agnatene, le vita tamity volamena malio, naho reo folera, reo jiro, naho reo lelane le vita tamity volamena malio. ⁵⁰ Reo, kapoake, reo meso, reo koveta, reo sotro, vaho reo fagnoroa liten-ketae magnitse le natao tamity volamena malio iaby. Reo sevily reo varavara ao amity efetre agnatene avao kea, ty toera masy vatane, vaho reo varavara ty efetre bey ty tempoly, le natao tamity volamena malio iaby. ⁵¹ Tamize fomba zay, ro nahavita reo asa iaby ze natao Solomona Mpanjaka ho ahy ty tragno Yaveh. Ka niente Solomona tao agnate reo zaka natoka Davida, raene, vaho reo volafoty, volamena, vaho reo fanake, naho napetrane tao amity efetre famoria tao amity tragno Yaveh reo.