¹ Naho i Solomona nanomboke nagnamboatre ty tempoly Yaveh. Zao ro niseho tamity tao faha 480 tafara ty niala ty ana Israely tamity tane Egypta, tamity tao faha efatre ro nanjaka teo amity Israely ty Solomona, tamity vola Ziva, ty vola faharoe. ² Ty tempoly ze namboare Solomona Mpanjaka ho ahy Yaveh le enempolo metatre ty halavane, roapolo metatre ty borine, naho telopolo metatre ty haabone. ³ Ty lavaranga eo agnoloa ty efetragno bey ty tempoly le roapolo metatre ty halavane, mitovy amity bory ty tempoly, naho folo metatre halalene eo agnoloa ty tempoly. ⁴ Reo varavara-kele ty tragno le nataone tere asa naho ty agnatene ty ambalike. ⁵ Nagnamboarane efetre ty magnodidy reo rindry ty efetragno bey, magnodidy ty ambalike vaho ty agnate ty efetre. Nasiane efetre ty magnodidy reo sisine iaby. ⁶ Ty ambane vatane le dime metatre ty borine, ty agnivone le ene metatre ty borine, naho ty farane le fito metatre ty borine. Fa ty ambaline le nahene ty rindry magnodidy ty tragno iaby mba tsy hisarake amireo ambe amity rindry ty tragno. ⁷ Vato voapaike ro nagnamboara ty tragno. Tsy nisy fikala, famaky, na vy masio rey tao antragno tamity nagnamboara aze. ⁸ Ty bakagne antimo ty tempoly le nisy filira tao amity riha ambane, nisy tohatre raike fanganiha mbaeo amity riha voalohane, naho bakeo agnivone ro miakatre mbaeo amity riha fahareo. ⁹ Ka namboare Solomona ty tempoly naho vinitane zay; rinakone ambe vaho hetae sedera pisake ty tragno. ¹⁰ Namboarene teo agnila ty efetragno ty tempoly reo efetre an-danene, dime metatre isake ty andanene; ka hetae sedera ro nampifandrae ty tragno vaho ty hetae sedera. ¹¹ Niavy tamy Solomona ty reha Yaveh, nanao hoe: ¹² "Ty momba ty tempoly ze namboarenao toy, laha hindeha arake ty lalako vaho hanao ty rarene riha, hiambe ty liliko iaby naho hagnorike zay, le hamafeseko aminao ty fampagnantegna ze nataoko tamy Daviva raenao. ¹³ Hitoboke eo amity vahoake Israely raho naho tsy hahafoe iereo." ¹⁴ Ka namboare Solomona ty tempoly naho vinitane zay. ¹⁵ Bakeo le namboarene tamireo hetae sedera ty rindry tao agnate ty tragno. Hatramity tane ka zisikamity valen-driha, le rinakone hetae ty tao agnate reo, naho hetae Kypreso ro nagnarognane ty ambane. ¹⁶ Nataone roapolo metatre zisikeo andambosy ty tragno misy hetae sedera zisikagne ambane ka zisikagne amity valen-driha. Nataone ho efetre agnatene ze efetre zay, ty toera masy vatane. ¹⁷ Ty efe-tragno bey, ty toera masy eo agnoloa ty toera masy vatane, le efapolo metatre ty lavane. ¹⁸ Nisy sedera tao agnate ty tragno, voasokitre sare voatango vaho folera mivelatre. Sedera iaby ty ao agnatene. Tsy nisy rare-bato hisake tagnatene ao. ¹⁹ Nagnoma ty efetragno agnatene tao agnate ty tragno mba hametraha ty tomabile fagnenkea Yaveh tao Solomona. ²⁰ Ty efetragno agnatene le roapolo metatre ty lavane, roapolo metatre ty borine, naho roapolo metatre ty haabone. Fineno Solomona volamena tsy misy fangarone reo rindry naho rinakone hetae sedera ty alitara. ²¹ Fineno Solomona volamena tsy miharo ty agnate ty tempoly naho nampeane rava-bolamena teo agnoloa ty efetragno agnatene naho fineno volamena ty aloha. ²² Ty agnatene iaby le rinakone volamena zisike ty hivita ty Tempoly iaby. Finenone volamena avao kea magnera ty alitara ze ao amity efetragno agnatene. ²³ Nagnamboatre kerobima roe tamity hetae oliva ty Solomona, sambe folo metatre iaby ty lavane, ho ahy ty efetre agnatene. ²⁴ Ty ela ty Kerobima raike le folo metatre ty halavane, naho ty elane hafa le dime metatre avao kea. Ty halava eo amity loha ty elane raike zisikagne amity loha ty elane hafa. ²⁵ Ty loha ty elane raike ka zisike amity loha ty elane raike le manana halava folo metatre. Ty kerobima hafa le mana elane folo metatre. ²⁶ Ty kerobima roe le sambe mitovy halava vaho toera. Ty haabo ty kerobima raike le folo metatre naho manahake zay kea ty kerobima hafa. ²⁷ Napetra Solomona teo agnivo ty tragno i Kerobima. Navelatre reo ela ty kerobima mba hikasiha ty ela ty raike amity rindry raike naho ela ty kerobima hafa hikasike ty rindry hafa. Nifampikasike teo agnivo ty toera masy vatane ty ela iereo. Rinako Solomona tamity volamena ty kerobima. ²⁹ Rinavane tamireo sare ty kerobima ty tragno, hetaen-drofia, naho folera mitiry, ty ambalike vaho ty agnate reo efetre. ³⁰ Rinako Solomona tamity volamena ty gorodo, ty efetre ambalike vaho ty agnatene. ³¹ Namboare Solomona tamity hetaen'oliva reo varavara filira mbaeo amity efetre agnate. Ty tola vaho ty lelam-baravara le ampahadime reo faritre natao. ³² Le nagnamboatre varavara reo tamity hetaen'oliva re, naho nampeane sare sokitre ty kerobima teo amizay, hetaen-drofia, naho folera mitiry. Rinakone tamity volamena reo naho zinarane volamena teo amity kerobima naho hetaen-drofia. ³³ Hoe zay kea, namboare Solomona tamity hetaen'oliva reo varavara filira ao antempoly ze mizara efatre ³⁴ naho ty varavara roe le hetae kypreso. Reo kopake roe ty varavara le mivalo naho reo kopake roe ty varavara hafa le mivalo. ³⁵ Nasiane sare sokitre kerobima teo amiereo, hetaen-drofia, naho folera mivelatre, naho magnisy volamena eo amity asa-sokitre mateteke re. ³⁶ Namboarene tamity vato voapeke andala telo ty kianja tao agnatene naho ambe sedera raike andala. ³⁷ Ty fagnoregna ty tragno Yaveh le natoboke tamity tao hafa efatre, tamity vola Ziva. ³⁸ Tamity tao hafa-raike amby folo, tamity vola Bola, ty vola fahavalo, le vita vatane tamity lafine iaby vaho ty famarita iaby ty tragno. Nandany fito tao ty Solomona nagnamboatre ty tempoly.