¹ Laha fa naharey ty laza Solomona momba ty agnara Yaveh ty mpanjaka vave Sheba, le niavy hitsapa aze amity ontane sarotre re. ² Niavy tagne Jerosalema niarake tamina rodobey lava le lava, nisy rameva ninday zaka-magnitse, volamena bey vatane, naho vato lafovily maro re. Laha niavy re, le nambarane tamy Solomona aiby ze tao ampone iaby. ³ Vinale Solomona ty ontanene iaby. Tsy nisy tsy voavale ty mpanjaka ty ontanene. ⁴ Laha fa nahisake ty hamarea Solomona iaby ty mpanjaka vave Sheba, ty lampa ze naorene, ⁵ ty sakafo teo andatabane, ty seza ty mpanompone, ty asa reo mpanompone vaho ty siky iereo, naho ty mpinday ty kapoakene avao kea, vaho ty fomba nanolorane fagnatetre oroa tao antragno Yaveh, le hisake vatane re. ⁶ Hoe re tamity mpanjaka:" Mare vatane, ty talily ze reiko tagne amity taneko momba ty rehanao vaho ty hamareanao. ⁷ Tsy nino raho laha tsy niavy etoy, naho nahisake maso zay raho amizao. Tsy ampe antsasane amity hamarea vaho hareanao ro voatantara tamiko! Nihoatre ze reiko ty lazanao. ⁸ Sambatre reo valinao, naho sambatre avao kea reo mpanomponao ze mijano magnoloa anao avao, satria maharey ty hamareanao iereo. ⁹ Hoantsae anie Yaveh Zagnaharenao, ty mahisake saotre aminao, vaho nametrake anao teo amity sezan-droandria Israely. Satria tea Yaveh zisikezay Israely, nataone mpanjaka riha, mba hanovanao ty rarene vaho ty hamarea!" ¹⁰ Nomeane talenta volamena 120 naho zaka-magnitse maro vaho vato lafovily ty mpanjaka. Tsy nisy nagnomea zaka-magnitse maro manahake reo ze nomea ty mpanjaka vave i Sheba i Solomona Mpanjaka sase. ¹¹ Naho ty sambo Hirama, ze ninday volamena bakagne Ofira, ninday hetae almoga vaho vato lafovily maro avao kea. ¹² Natao ty mpanjaka tsangam-bato ho ahy ty tragno Yaveh vaho ty lampa ty mpanjaka, naho lokanga vaho valiha ho ahy reo mpiantsa ty hetae almoga. Tsy nisy hetae almoga maro manahake ze niavy na hisake sase zisikandroany. ¹³ Nomea Solomona Mpanjaka iaby ze niriene ty mpanjaka vave Sheba, na ino ino nangatahene, miampe ze fagnomea Solomona aze amity fagnomea ty Mpanjaka. Ka le nihere tamity tanene niarake tamireo mpanompone re. ¹⁴ Naho ty volamena niavy tao amy Solomona tao agnate ty herentao le talenta volamena milanja 666, ¹⁵ laha tsy ty volamena niente reo mpanakalo vaho mpivarotre. Reo mpanjaka iaby tagne Arabia vaho reo governora tao amity firene avao kea le ninday volamena vaho volafoty tagne amy Solomona. ¹⁶ Nanao ampinga bey roanjato vita tamity volamena voatefe ty Solomona Mpanjaka. Sekele volamena enenjato ro nagnanova ty raike tamizay. ¹⁷ Nanao ampinga telonjato vita tamity volamena voatefe avao kea re. Ka volamena telo mane ro nagnanova ty raike tamity ampinga; napetra ty mpanjaka tao amity lampa ty Ala i Libanona reo. ¹⁸ Naho nanao sezan-droandria ivory bey ty mpanjaka naho finognone tamity volamena farane ze manify zay. ¹⁹ Nisy antagna-tohatre ene nimbaeo amity sezan-droandria, naho fohe ty fiankinane. Nisy fametrahan-tagna isake ty sisy seza, naho liona roe mitsanga eo agnilane. ²⁰ Liona roe amby folo ro nitsanga teo amireo antagnan-tohatre, raike isake ty sisy ty antagnan-tohatre ene. Tsy nisy sezan-droandria manahake zay teo amity firene hafa iaby. ²¹ Ty kapoake finoma Solomona Mpanjaka iaby le vita tamity volamena iaby, naho ty kope finoma tao amity Lampa ty Ala i Libanona le vita tamity volamena tsy misy fangarone iaby. Tsy nisy volafoty reo, satria tsy rinae ho lafovily zay tamity andro Solomona. ²² Nana andian-tsambo mpitete riake ty mpanjaka, niarake tamity andian-tsambo i Hirama. Indraike agnate ty telo tao ro ninday volamena, volafoty, naho ivory reo andian-tsambo, naho rajako vaho gidro avao kea. ²³ Nihoatre tamin-karea vaho tamity hamarea noho ty ahy reo mpanjaka iaby teto antane ty ahy Solomona Mpanjaka. ²⁴ Nipay ty hifagnatreke tamy Solomona ty tane raike iaby mba haharey ty hamareane, ze natobon'Agnahare tao ampone. ²⁵ Ninday fagnomea reo ze namangy, fanake volafoty vaho volamena, naho akanjo, akanjo fiaro, naho zaka-magnitse, soavale vaho ampondra avao kea, isan-tao isan-tao ²⁶ Namory kalese vaho mpitiki-tsoavale ty Solomona. Nana kalese 1.400 vaho mpitiki-tsoavale roe arivo vaho ray ale re ty najanone tao amity tana fitoboha ty kalese vaho niarake tamine tagne Jerosalema. ²⁷ Nana volafoty tao Jerosalema ty mpanjaka, maro manahake ty vato teo amity tane zay. Nataone maro manahake ty hetae aviavy tegne amity tane gebo ty hetae sedera. ²⁸ Nana soavale ze vinily tagne Egypta vaho Silisia ty Solomona. Viniline ty mpivarotre ty mpanjaka isan-andiane iereo, naho sambe nana ty viline aby ty andiane raike. ²⁹ Ty kalese le tagne ambaly Egypta ro nivilie naho sekele volafoty enenjato ty raike, naho soavale 150 sekele ty raike. Maro tamireo ro navily tamity mpanjaka ty Hetita vaho ty mpanjaka ty Syriana iaby.