¹ Naho Solomona Mpanjaka le nitea ampela vahiny maro: ty anak'ampela Farao vaho reo ampela i Moabita, Amonita, Edomita, Sidoniana, naho reo Hetita- ² reo firene voakasike zay nirehafe Yaveh tamireo vahoake Israely hoe:" Tsy hindeha eo amiereo riha mba hanambaly, na iereo ho eo aminao, satria iereo le hampitolike ty arofonao amireo zagnahare iereo vatane." Kanefa ty Solomona tea reo ampela reo. ³ Nana valy roakemba bey fitonjato vaho valy telonjato ty Solomona. Nampitolike ty arofone reo ampela reo. ⁴ Fa laha fa niha-antetre ty Solomona, le nampitolike ty arofone tamireo zagnaharen-kafa reo valine; fa tsy tena angnakim-po vatane tamy Yaveh Zagnaharene re, manahake ty arofo Davida raene. ⁵ Fa Solomona le nagnorike i Astarta, ty zagnaharem-bave reo Sidoniana, naho nagnorike i Milkoma re, ty sampe raty reo Amorita. ⁶ Nanao ze raty teo amaso Yaveh ty Solomona; tsy nagnorike vatane Yaveh re, manahake ty natao Davida raene. ⁷ Naho nananga toera abo ho ahy Kemosy ty Solomona, ty sampe raty Moaba, teo amity tazoa antignana Jerosalema, naho ho ahy Moloka avao kea, ty sampe raty ty vahoake i Amona. ⁸ Nananga toera abo avao kea re ho ahy reo ampela vahiny iaby, ze nagnoro liten-ketae magnitse vaho nanao soro ho ahy reo zagnahare iereo tamireo ⁹ Meloke tamy Solomona Yaveh, noho ty niotaha ty arofone niala tamine, ty Zagnahare Israely, na le niseho indroe tamine aze Re ¹⁰ naho nandily aze momba o raraha ao vatane, fa tsy tokone hagnorike reo zagnaharen-kafa re. Fa i Solomona le tsy nagnenke ze lily Yaveh. ¹¹ Laha zao le hoe Yaveh tamy Solomona:" Satria nanao zay riha naho tsy nita ty fagnenkeam-pilongoa vaho reo lalako ze nandiliako anao, le halaeko aminao vatane ty fanjaka naho homeiko ty mpanomponao. ¹² Kanefa, noho ty amy Davida raenao, le tsy hanao zay amity androm-piaignanao iaby raho, fa hagnafake zay amity tagna ty ananao. ¹³ Tsy mboe hagnafake ty fanjaka iaby aminao raho; fa hagnomea foko raike ho ahy ty ananao noho ty amy Davida, vaho noho ty amy Jerosalema, ze finiliko." ¹⁴ Le nananga fahavalo raike ho ahy Solomona Yaveh, le i Hadada Edomita. Bakamity fokon-droandria Edoma re. ¹⁵ Laha fa tao Edoma Davida, le niakatre mba handeve ty mate Joaba ty bey ty tafike, ty ndaty iaby ze vinono tao Edoma. ¹⁶ Nitoboke tao zisike ty enem-bola ty Joaba vaho Israely iaby zisike nimateza ty lahilahy iaby tao Edoma. ¹⁷ Fa i Hadada le nalae reo mpanompo ty raene tao Egypta niarake tamireo Edomita hafa, satria ty Hadada le mboe kele. ¹⁸ Niala tao Midiana iereo naho niavy tao Parana, ze nagnala iereo ndaty miarake amine ho agne Egypta, ho agne amy Farao mpanjaka Egypta, ty nagnomea tragno vaho tane naho sakafo hoaze. ¹⁹ Nahisake sitrake bey teo amaso Farao ty Hadada, ka nomea Farao valy re, le ty rahavavem-baline, ty rahavave ty Tapanesa mpanjaka vave. ²⁰ Niterake ajalahy tamy Hadada ty rahavave Tapanesa. Nomea iereo ty agnara hoe Genobata re. Natsanga i Tapanesa tao amity lampa Farao re. Ka nitoboke tao amity lampa Farao teo amireo ana i Farao ty Genobata. ²¹ Laha mboe tao Egypta re, le naharey ty Hadada fa nimate agne amireo razane ty Davida naho i Joaba ty kapitene ty miaramila le mate, hoe Hadada tamy Farao:" Engao raho hindeha mba ho afake hoagne amity fireneko." ²² Le hoe ty Farao tamine:" Fa ino ro tsy ampe anao amiko eto, ro mipay ho agne amity firenenao riha amizao?" Le namale ty hadada hoe:" Tsy misy. Mba engao hindeha rie raho." ²³ Nanangam-pahavalo hafa ho ahy Solomona avao kea ty Zagnahare, le i Rezona ana i Eliada, ty nilay i Hadadezera mpanjaka Zoba tompone. ²⁴ Namory ndaty hoaze ty Rezona ka lasa kapitene tafike kele re, laha fa naharesety ndaty Zoba ty Davida. Reo lahilahy Rezona le nimbaeo Damaskosy naho nitoboke tagne, ka finehe i Rezona ty Damaskosy. ²⁵ Fahavalo Israely re zisike ty andro Solomona iaby, niarake tamity koronta ze nanoe i Hadada. Nalay Israely Rezona naho nanjaka teo amy Arama. ²⁶ Naho i Jeroboama ana i Nebata, Efraimita bakagne Zadera, manam-pahefa Solomona, zay Zeroa ro agnaran-drenene, mpivembata raike, le nagnakatre ty tagnane tamity mpanjaka avao kea. ²⁷ Ty antone nananganane ty tagnane tamity mpanjaka le satria nagnore toeratao Milo vaho nanampe ty lavake tamity rindry ty tana ty Davida rae Solomona. ²⁸ Jeroboama le lahilahy raike mahere. Hisa Solomona fa zatovo miasa re, ka nomeane alala nibaiko reo asa iaby tao amity tragno i Josefa. ²⁹ Tamize andro zay, laha fa niakatre i Jerosalema ty Jeroboama, le nahisake aze tegne amity lalana ty Ahia Silonita mpaminane. Naho niakanjo vao Ahia naho iereo roe lahy le arere tao ambaibo. ³⁰ Naho nagnafake ty akanjo vaovao ze tegne amine Ahia ka nizara zay ho roe ambifolo. ³¹ Hoe re tamy Jeroboama:" Mangala tampatampane folo, fa Yaveh, ty Zagnahare Israely, nanao hoe:" Ingo, hagnafake ty fanjaka eo amity tagna Solomona raho ka hagnomea foko folo ho anao ³² (fa Solomona le hana foko raike, noho ty amy Davida vaho vaho noho ty amy Jerosalema-ty tana ze finiliko tamireo foko Israely iaby), ³³ satria nahafoe Ahy iereo naho nanompo i Astarta ty zagnaharem-bave reo Sidoniana, Kemosy ty zagnahare Moaba, naho Moloka ty zagnahare ty vahoake Amona. Tsy nindeha tamity lalako iereo, mba hanao ze mare eo amasoko, vaho hiambe reo lalanako vaho reo liliko, manahake ty natao Davida raene. ³⁴ Kanefa, tsy afake ty fanjaka raike iaby amity tagna Solomona Raho. Fa kea, nanao aze ho mpandily amity andro iaby hifantane, noho ty amy Davida mpanompoko ze finiliko, ty raike ze niambe reo liliko vaho reo lalanako. ³⁵ Fa hangalake ty fanjaka eo antagna ty anane Raho ka hagnomea zay anao, le reo foko folo. ³⁶ Hagnomea foko raike ho ahy ty ana i Solomona raho, mba hana fanilo zisikagne eo agnoloako ao Jerosalema ty Davida mpanompoko, tana ze finiliko mba hasia ty agnarako. ³⁷ Hangalake anao raho, ka handily riha mba handefe iaby ze irienao, le ho mpanjaka eo amy Israely riha. ³⁸ Laha midranjy ze handiliako anao iaby riha, naho laha mindeha amireo lalako vaho manao ze mare eo amasoko, mba hiambe reo lalanako vaho reo liliko, manahake ty natao Davida mpanompoko, le hiarake aminao raho naho hananga tragno azo antoke ho anao, manahake ty nananganako ho ahy Davida, naho hagnomea anao Israely Raho. ³⁹ Hagnasaze reo foko Davida raho, fa tsy ho zisikezay."' ⁴⁰ Ka nikasa ty hamono Jeroboama ty Solomona. Fa i Jeroboama niakatre naho nilay tagne Egypta, tagne amy Sisaka mpanjaka Egypta, le nijano tao Egypta re zisike ty nifateza Solomona. ⁴¹ Laha ty amity raraha hafa mikasike Solomona, iaby ze nataone vaho ty hamareane, feie vao tsy voasoratre ao amity boke reo tantara momba i Solomona reo? ⁴² Nanjaka tao Jerosalema tamireo Israely iaby ty Solomona zisike ty efapolo tao. ⁴³ Nimate tagne amireo razambeine re naho naleve tao amity tana i Davida raene. Le lasa mpanjaka tafarane ty Rehoboama anadahine.